السيستم داون عبارة مشهورة أوى أول مرة أسمعها لما أشتغلت فى الأى تى يعنى نظم المعلومات وقعدت أسمعها فى الشغل 14 سنة خدمة (مش فى ثانوى) توازيا مع سماعها فى حتت كتيرة غير الشغل تروح السوبر ماركت و بعد ماتشترى تموين الشهر بتاعك وممكن كمان بتاع مامتك أو حماتك تيجى تحاسب تلاقى طابور طويييييييييييييييييل تسأل فيه ايه يقولك اصل السيستم داون أو تيجى تحاسب بالفيزا الفيزا ماتشتغلش والكاشير يبصلك شزرا وكأنك نصاب مع أن السيستم برضة داون وتروح البيت يبقى عندك حاجة مهمة تعملها على النت غير الشات والفيس بوك تبص تلاقى النت قاطع (ده غير قاطع بتاعة اللبن) تكلم الشركة بتاعة ليه تضيقها على نفسك يقولوا لك (بعد ماتفضل على السماعة تقريبا من ربع الى نصف الى تلتة ارباع ساعة بس الشهادة لله بيقولوا لك بقى لك كام دقايق ويردوا عليك سيستم برضة) معلش اصل السيستم داون – داون أزاى مش أنتوا بتوع السيستم لا اصلهم قطعوا الكابل بتاع النت الى فى البحر مش كابل واحد لا اتنين (كومبو) – أول الشهر تروح البنك علشان تقبض ب أى تى أم تلاقى الماكينة تقولك لايمكن أتمام معاملتك لانك تعديت الحد المسموح للسحب يجيلك ذهول وأحتمال تتشل لوقلبك ضعيف علشان حتفتكر أن حد سرق المرتب وبسرعة تفكر فى الجمعية الى أنت داخلها ومصروف الولاد والسلفة الى عليك وينقذك من شيطان أفكارك بتاع الامن ويقولك بكل ثقة ياأفندم السيستم واقع لوسامحت أدخل جوة (جوة البنك مش الاى تى أم) وفكرت أهرب شوية مع نفسى فى رمضان وأروح عمرة وأخدت فلوس كاش معايا علشان لو أحتجت أى حاجة لاأسحب ولا اشترى بالفيزا علشان ماأسمعش الكلمة أياها وبعد اسبوعين من أروع الايام وأنا فى مطار جدة بعد ماخلصت الاجراءات وقعدت فى صالة الانتظار قعدت أدور على ست كبيرة كنت بساعدها فى كتابة الاوراق وكده علشان مش بتعرف تقرأ ولاتكتب وفاتت ساعة وأتنين وتلاتة كنت لاحظت خلالهم أن ناس كتير من المجموعة مش موجودة ومش باين لهم أى أثر والمغرب أدن وفطرنا والطايرة ميعادها جه ولاحس ولاخبر وفجأة الباب أتفتح ودخلت بقية المجموعة (يجى 50 واحد وواحدة) سألت الست كنتوا فين ياحاجة قالت لى اصل يابنتى (الحمد لله لقيت حد أكبر منى) السيستم كان داون (الست مش بتفك الخط) أنا لولا خفت العمرة تروح منى كنت لطمت على وشى – بس هو الا ليه دايما بيقولوا السيستم داون أوداوين أو وااااييييع (من وقع) وعمرهم مابيقولوا النظام داون!!! تفتكروا خايفين أحس نفهم أنه النظام اياه !!!!
"قلمى"
ههههههههههههههههههههههههه ممكن فعلا
ردحذف