الشوبينج\shopping

نظرا لانى دلوقت ربة منزل (مش بخطرى ولكن بخطر الاقتصاد الحر والازمة الاقتصادية الى قالوا مش حتأثر على العمالة المصرية بس ده حأكتب عنه بعدين) فأنا رايقة بقالى شهرين ولازم اقول على الحاجات الى غظتنى ولسة غيظانى وماكنش عندى أبدا وقت أكتب عنها لانى كنت بأدور فى ساقية دلوقتى عندى وقت وبلوج فلازم ابوح واكيد فى شخص واحد على الاقل حيكون متغاظ من نفس الحاجات

معظم البائعين فى مصر لايعرفون أبسط أصول معاملة الكاستمر (حلوة كاستمر ديه) أى الزبون وكل ما تقول لحد كده يقولك ياشيخة ده أنت مفترية دول زى الفل فعلا أخر فل بأمارة كم حكاية حأحكيهلكم فى السريع > أهلا بكم فى مصر< قلتها لزميلات عزيزات من سوريا كانوا جايين فرع الشركة فى مصر للتدريب وبعدين قلت أنزل أوريهم بلدنا والف معهم علشان كانوا أول مرة يجوا مصر وعايزين يشيلوا كل حاجة فيها لاهلهم علشان يفراحوهم بحجات مصر الزميلات دول بسكوتات فى منتهى الرقة واللطف وتبقى خايف ليتكسروا منك وأنت ماشى (سواء كنت زميل أوزميلة لانهما أمانة) دخلنا محل شنط جلد حريمى شيك جدا وبعد ماواحدة أختارت شنطة شيك وبمبلغ لقت فيها خدش بسيط جدا فطلبت من البائع تغيرها فللامانة البائع راح ورجع وقالها للاسف مافيش غير ديه ولما كان الخدش بسيط لايكاد أن يلاحظ زميلتى كانت بتفكر تأخدها وفى تو اللحظة البائع قال لها بصى ماتخافيش ده مش خدش ده تراب وراح بالل (من بلل) صباعه فى بقه ومسح لها الشنطة!! مستعجل أنك تحط بصمة تفتك ليه ياغبى ماهى كانت خلاص حتأخد الشنطة!! تفتكروا أنا كملت معاهم الشوبينج أكيد لا لآن الارض كانت أتشقت وبلعتنى بسرعة قبل ما أسمعهم بيقولوا لى عمار يامصر – والله العظيم ديه حقيقى حصلت السنة الى فاتت ممكن اقول لكم أسم المحل بس مش حاقدر اديكم نمرة مدام يسرا السورية لانها غيرتها علشان مكلمهاش تانى

نيجى بقى للبريك >(فترة الراحة فى العمل) <ساعات تبقى ماشى فى المول أو فى الشارع تعجبك حاجة فى الفاترينة عادى يعنى تدخل تتفرج عليها وأول ما تيجى داخل تلاقى بتوع المحل بيحاجزوا عليك علشان ماتدخلش اصلهم فى بريك وغالبا حتلاقيهم لامين من بعض وجايبين كشرى من المحل الى جنبهم وبيأكلوا أو يقولوا لك فيه جرد!! طيب هم ليه مش بيقفلوا المحل أو يحطوا ورقة انهم فى بريك؟؟ حتى المحلات الصغيرة الى هى عملة زى الكشك أو النصبة الى لا ليها باب ولافاترينة لها برضة بريك بأمارة لما جيت أمد ايدى وابص على أيشارب البنت قالت لى توء توء (يعنى أياك تلمسيه) أحنا فى بريك قلت لها ده أنا حاشوفه بس ( بكل بلاهة) قالت لى توء توء بكل ارف وهى قاعدة حاطة رجل على رجل أحنا فى بريك (أحنا مين ده مافيش غيرها) قلت أمشى يا منى وبلاش تتعصبى البنت برضة معذورة أكيد انت قطعتى جلسة اليوجا بتعتها – ومشيت بس أنا لسة متغاظة من ساعتها نفسى أعرف بريك أيه لما هى قاعدة على كرسى قدام كشك!!!

وفيه بقى >الخنقة بتاعة يا أفندم< لما تدخل مطعم حلو بابتسامة حلوة تلاقى واحد يوريك مكانك أتفضلى يا أفندم وبعدين واحد تانى يجيب المنيو أتفضلى ياأفندم وبعدين واحد تالت يجى يأخد أوردر الاكل تكلى ايه ياأفندم وبعدين واحد رابع يجى يقولك تحب تجرب شوربة النهاردة يا افندم الخامس بقى يجى يقولك أنا فلان لو فيه أى حاجة أنا تحت أمرك يا أفندم وواحد سادس غير الى فاتوا دول كلهم يجيب لك الاكل ويحطه فى منتهى الرشاقة والشياكة وتلاقى الاكل بيعمل تش من كتر ماهو سخن بون ابيتى ياأفندم (بالهنا والشفا)وأول ما أحط الاكل فى بقى (وهو مولع) يجى يسألنى بكل سحر الابتسام ايه الاخبار يا أفندم فابتسم بكل بلاهة متناهية لان الاكل فى بقى وأهز رأسى مش عارفة ازاى بيفهم أن الاكل عاجبنى ويمشى علشان يرجع تانى لما اجى احاسبه ايه الاخبار يا أفندم ما لسة بدرى ما أنت منورانا (على اعتبار أنى لمبة أصله مش ممكن يكون بيعاكس واحدة قد امه) – ايه ياجماعة تفتكروا أنامفترية لا كده عاجب ولا كده عاجب بس يعنى أيه أفندم؟؟

أخر واحدة بقى علشان يبقى ختام الشوبينج مسك >محلات الحقد الطبقى والعنصرى< تدخل المحل وااااااااااااو يادوب فيه تلت أربع حاجات محطوطين بطريقة حلوة جدا

- الله حلو ده أوى ده أنا باقول لصاحبتى - ترد تقول ايوه عندى واحد زيه شكله تقريبا (ده أيشارب اه برضة) - من فضلك سعره كام أنا لصاحب المحل - صاحب المحل ألف جنيه يا أفندم (مرة أخرى والله العظيم الحلفان علشان التمن وافندم)

- صاحبتى باستظراف ده بالراس
- صاحب المحل بكل سحر الابتسام أصله سينيه يا أفندم
- صاحبتى همست لى يعنى ايه سينيه؟؟
- فعملت نفسى معرفهاش ومشيت يا كدابة أنت مش لسة قايلة عندك واحد زيه
- وكفاية كده ولو أحتجتوا أى شوبينج كلمونى انا فى مدينة نصر عند الشوبنج كله وبرضة عندى اصحاب جدعان للشوبينج فى وكالة البلح ووسط البلد لكن منعرفش نروح مصر الجديدة - بس الاحسن فى الظروف الاقتصادية ديه تبطلوا تشتروا خالص حتى الاكل

"قلمى"