الأحد، مايو 31، 2009

رسالة شكر

صديقى أتدرى ماهى لغة (النوشو)؟ هى لغة نسائية خاصة وسرية جدا أخترعتها بعض النساء الصينيات فى أحدى المناطق النائية بجنوب الصين
وعبر سنوات صداقتنا العشر تفاعلت لغة خاصة بيننا من خلال تواصلنا كلغة النوشو فجمعتنا

فليس كل ما يبهج حبا وليس بالضرورى كل ما يمنحه الرجل لامرأة عشقا

وبدأت لغتنا وتميزنا بأوجاع وطن لم تحتمله أنت فرحلت عنه لاجل مستقبل أفضل لك ولعائلتك

وبعد الرحيل تشككت أنا دوما أن تدوم صداقتنا فى هذا الزمن الردىء الذى لا يبقى حتى على صلة الرحم

فلم يجمعنا يوما ليل واحد ولانفس النهار ولكن تجمعنا سماء زرقاء واسعة بنجوم متوهجة


وتواصل قد يكون مدى أو جزرى أحيانا ولكن تبقى لغة الارتقاء هى السائدة بيننا

رسائل متبادلة لها رونق خاص ليست كسائر الرسائل فلا تشوبها شائبة ليست برسائل أحبة ولا برسائل عابرة

خرائط لسيرة حياتنا المهنية

ملفات لحياة أطفالنا وعبثهم وشبابهم

حالات مرض وعمليات ووفاة

صور أسفارعمل وبيوت أنتقلنا اليها

كتب - أفلام - ملخصات لاخر القراءات - خواطر أن وجدت

رؤية عن أحوال البلد وعن المستقبل

وائتمانى فى توزيع زكاة مالك سنويا

رنين الهاتف مرة كل سنة لحالات الطوارىء ولكن بيننا ملايين الكلمات مفكوكة الشفرة التى لايدرك رموزها سوانا

وما يميزك المقدرة على أحتواء التفاصيل حتى وأن أختفت ولكنك قادر على استدعائها فورا

لاتملك عصا سحرية ولاحلول لديك لضحالة الاحوال ولكنك وأن كنت هناك فأنت هنا

صديقى أنا لا أعرف كيف اصيغ عبارات ثناء أو شكر ولكنى أثق فى لغة النوشو الخاصة بنا لتفيدك كم ممتنة لك أنا لسؤلك عنى عبر الاف الاميال ولزوجتك الطبيبة ولصديقك الطبيب لتشخيص مرضى

وددت لو أخط اليك الاف الكلمات لاذكر العديد من مواقفك الجليلة - ولكنى ببساطة أحمدالله أن منحنى باقة مميزة من الصديقات والاصدقاء الاوفياء وأنت بينهم فيا صديقى الرجل تسلم لى -

" قلمى "

الخميس، مايو 28، 2009

أنا والعذاب والصداع

أنا والصداع متلازمة لاتنفصل أعتدت عليه وبمرور سنوات العمر اصبح لى الخبرة فى مجابهته والتقليل من أثاره الهجومية القاتلة على شرايين دماغى أو هكذا كنت اظن حتى ليلة الاحد حين فوجئت بقوة تنميلية جارفة (بدون مقدمات) تسرى بسرعة جنونية بدأ من أعلى الرأس حتى أخمص القدم من جانبى الايمن فوجدت صعوبة والم فظيع عند الحركة ولانى رأيت نظرة الجزع فى عينى أبنى قمت بالاتصال بدكتور صديق لاسأله - هو أنا بيحصلى ايه؟؟؟ - فقال لى عليك بقياس الضغط فأخذنى أبنى وزوجى لاقرب صيدلية لقياس الضغط الا أن الصيدلى نصحنا بالذهاب فورا لمستشفى عين شمس التخصصى (لا أعرف لماذا) ولما كنت أكره هذه المستشفى فقد طلبت من زوجى الذهاب لمستشفى كليوباترا بمصر الجديدة لاننا أعتدنا عليها (3 حالات طوارىء سابقة لزوجى حفظه الله) ومن هنا بدأت رحلة ليلة ويوم من العذاب التى سأقصها بدون مبالغات , وأن لوحظ القليل من الروح المرحة الساخرة من خلال السرد فهى أكيدا لم تكن متوفرة لحظات الحدث - عند وصولنا للمستشفى وجدت صديق أبنى فى أنتظارنا (الساعة 2 صباحا) رغم الالم الذى كنت أشعر به لم تفتنى تلك اللافتة الرقبقة ولا أنه كان يساعدنى فى التحرك الذى كنت أجد فيه صعوبة بالغة !! وبدأت أجراءات وأسئلة - حصل لك أيه - حصل لك ده قبل كده - عندك سكر لا - عندك ضغط - لا (بس طلع الضغط عالى فى ذلك اليوم !!!) وبعد التأكد من قواى العضلية الى لسة بخيرها أخبرنى الدكتور (الطوارىء) أن التنميل شىء مقلق ويستلزم أشعة مقطعية على المخ - ماشى - وطبعا لاننا على أعتاب أخر الشهر (أوله زى أخره) ربنا ألهمنى أنى أجيب كارت البنك معايا وسحبنا من ماكينة المستشفى ألف جنيه أحتياطيا - والاشعة المقطعية طلعت ب 250 وأنا فى أنتظار النتيجة عملوا لى تحليل سكر (سليم) ورسم قلب (سليم) برضة - وبعد شوية لقيت الدكتور بيوشش زوجى سألتهم فيه أيه قالوا لى أن مافيش أخصائى موجود يقدر يقرأ نتيجة الاشعة المقطعية ولانهم شاكين فى حاجة ناحية الشمال فلازم أشرفهم ليلة ديه فى المستشفى لحد وصول الاخصائى الصبح وطبعا جالى حالة من البكاء لانى ماكنتش عايزة أقعد فى المستشفى وخصوصا وأنا مش عارفة عندى ايه بس زوجى قال لى معلش لحسن لا قدر الله يحصل حاجة بالليل (الساعة بقيت 3 ونصف) وراح يحجز لى غرفة قالوا له أدفع تأمين 4 ألاف جنيها!!! قال لهم فيه حد فى وقت زى ده بالليل يبقى معاه مبلغ زى ده (وعلشان ايه أصلا ده كله!!) ودفع 500 بس!! وسابونى - الساعة 4 جت ممرضة تسحب منى دم علشان التحاليل تقريبا لسة خريجة جديد وبيتجرب فى لانها فضلت ربع ساعة مش عارفة تلاقى المكان الى تسحب منه الدم وقعدت ربع ساعة تانيين تخبط على كل أمبولة حطييت فيها الدم - طلبت أشرب المطبخ ماكنش فيه مياه معدنية!!! وجبت لى مياه من الحنفية وكان الصداع بدأ غزوته القاتلة - وبدأ التنميل يفك لوحده وربنا قدرنى وقمت صليت الفجر والساعة 5 النائب حضر ليطمئنى فقال لى أنه مادام التنميل تلاشى لوحده فده شىء مبشر (مش عارفة بأيه) وأن الى كان عندى أما عدم وصول الدم للمخ لمدة ثوانى أو أحتمال نزيف مش باين (شفتوا الاطمئنان) بس يجب أنتظار الاخصائى لان لا يمكن أعطائى أى دواء بدون أن يرى الاشعة وتمنيت من كل قلبى أن النهار يجى لانى خلاص الصداع يفتك بى وطلبت مسكن فقال لى حاضر والمسكن جالى الساعة 8 مع الافطار وطبعا لم أذق طعم النوم لتوترى ولان الساعة 6 قاسوا لى الضغط والساعة 7 جابوا الافطار والساعة 8 جابوا المسكن والساعة 9 تنظيف الغرفة الساعة 10 عايزين يشيلوا صينية الافطار الساعة 11 قياس الضغط تانى الساعة 12 الاخصائى جيههههههههههه أخيرا وقالى لى أن الاشعة زى الفل وأن ديه حالة طارئة من الصداع المزمن الى عندى لان ضغط عالى بدون مقدمات وللاطمئنان طلب أشعة مقطعية على شرايين المخ والرقبة - فسألته ممكن أخرج الاول وبعدين أعمل كل الى هو عاوزه قال لى ايوه - وخرجت بعد ما دفعت 1266 (غير فلوس الاشعة المقطعية) فى ليلة واحدة فى المستشفى مانمتش فيها!!! ولا عرفت عندى أيه لسة!!! وأخصائى المخ والاعصاب كتب لى أحتياطيا حقن الجلطات وهى عبارة عن حقن تأخذ تحت الجلد (عند البطن) كل 12 ساعة مانعا لتجلط الدم - وأنتهت بكليوباترا المرحلة الاولى من العذاب فى الطب الطب المصرى الخاص أبو فلوس يامحلاه -
المرحلة الثانية عند الفا سكان الميرغينى لعمل الاشعة المقطعية بالصبغة يسألك المسئول عن الحجز صيامة 6 ساعات وعاملة وظائف الكلى (محدش قال لى أن المفروض ده مطلوب قبل الاشعة فى مستشفى كليوباترا!!) أنا صدفة كنت صايمة لانى لم أكل أى شىء من الصبح وكمان المستشفى كانت عاملة لى التحاليل بس سابناها فى العربية فزوجى نزل يجيها (حوالى 10 دقائق بين مكان الركنة والمكان)
أستنيت الدور من 3 للساعة 4 ونصف ودخلت والدكتور سألنى بكل قلاطة بتشتكى من أيه عندك سكر ولا ضغط كان نفسى أقول له أيوه أنا جالى السكر والضغط من سعر الاشعة 1200 بالتمام والكمال!!! ولم يسألنى اذا كنت صايمة ولا شاف تحليل وظائف الكلى أى كلام!!!! ولما خلصت الممرضة طلبت منى أستنى شوية وبعدين نادتنى وقالت لى لازم أعمله تانى علشان أتنفست!!!!! وطبعا الاشعة ديه مؤرفة جدا وخاصة لما يتم حقن الصبغة من الكنلة المتركبة فى الذراع بعد عدة محاولات فاشلة من الممرضة ونهر من الدم من ذراعى وشعور بالحرارة فى كل أنحاء الجسم ومع أن المطلوب منى هو كان عدم بلع الريق فى نقطة معينة الا انهم فى المرة الثانية قاموا بتكتيفى كلية حتى من رقبتى مع أنهم لم يقوموا بذلك فى المرة الاولى طيب هو التكتيف حيمنع بلع الريق ؟؟؟!!!! والممرضة كانت حتأخدنى قلمين وهى بتقول لى من فضلك أسمعى التعليمات كويس علشان مش حنعيد تانى!!!

تانى يوم ياربى لما عملت تحليل الكوليسترول الحقنة سابت لى فى ذراعى كدمة زرقاء اد كده!!!! يظهر الناس كلها كانت متخرجة جديد على حظى - أما بقى اليوم الى أستلمت فيه نتيجة الاشعة فميعادى كان 7 والتقرير مش موجود مع أن على الكمبيوتر مكتوب تم الامضاء يعنى خلص وأتمضى لكن المسئول يقول لى لسة عند الاستشارى ولما قلت له أستعجله من فضلك (بكل ذوق) لان عندى ميعاد مع الدكتور قال لى بكل استعجاب أستعجله أزاى هو بيطبخ فى المطبخ!!!!! ما شاء الله على الرد فأخدت الايصال وبعت له زوجى لان كان ضغطى أبتدى يعلى جامد وأنا لما بتعصب مش باشوف قدامى وبصراحة مكنش ناقصة رده السخيف -

أنا الحمدللة الاشعة على الشرايين طلعت سليمة والدكتور أكد لى أن ما حدث لى بسبب حالات الصداع المزمنة الى عندى وكتب لى أدوية مانعة لحالات الصداع وحأزوره تانى بعد أسبوعين - الحمدلله على كل شىء وقدر ولطف بس هل ده طبيعى هل هو ده مستوى الخدمة الطبية الى بفلوس وهل من المفترض أن الناس يبقى معاها المبالغ ديه للعلاج !!! بس الصراحة الى معاه زى الى ممعاهوش وبجد يعيش الطب والخدمات الطبية فى مصر حاجة تشرح وتفرح يأما نصب يؤدى الى الوفاة أو أهمال يؤدى الى الوفاة برضة -

وأه من الصداع يانىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى ويارب أشفى كل مريض ولا حد يتحوج للطب المصرى وسنينه

عندك ضغط \ عندك سكر معندكش جاى جاى هو فيه أكتر من كده يجيب ضغط وسكر للبنى أدم يالهوووووووووووووووى

الاثنين، مايو 25، 2009

الصفاقة ج 2

حتى هذه اللحظة أنا لا أعرف السر وراء هذا الاهتمام الاعلامى حول السيدة هيفاء وهبى لتكون ضيفة العاشرة مساء البرنامج المتميز للمذيعة منى الشاذلى - بجد هو فيه ايه ؟؟؟؟ أن ما سمعت أنها فكرت تعمل مقابلة مع البنات الجامعيات النابغات!!!

والكارثة هى مغازلة المذيعة لها - وهيفاء تقولها أنت جميلة ومنى (المذيعة مش أنا) تقولها لا أنا مش جميلة كده خالص يا نهار مالوش أى ملامح - تانى مرة علشان البيه =بجد هو فيه ايه؟؟؟

ولانى مؤدبة مش حأقدر أكمل كلام فى الموضوع ده لانه أهيف من التحدث عنه بس أنا متغاظة أنها قالت مبروك للاهلى أصل سى أحمد طلع أهلاوووووووووى الله يوجع دماغك بجد يا بعيدة طريقة كلامك متسفزة-

وياخوفى من حلقة يوم الثلاثاء الخاصة بالاشخاص الذين أثروا فى حياة الضيف لحسن يطلع الضيف متأثر بالست هيفاء وأمها

وقبل ما تصوتوا غطووووووووووووووا

"قلمى"

الجمعة، مايو 22، 2009

الصفاقة

موهبتها أثارت الجدل -

عبارة فى أعلان عن برنامج ما على قناة او تى فى

تفتكروا من المقصود بهذه العبارة ؟ من عنده موهبة أثارت الجدل -

هى أكيد مش المرحومة سميرة موسى والتى خصص لها المسلمانى بعض حلقات الطبعة الاولى بل وقام بأعادة الحلقات لعل وعسى تكون قدوة - لكن هيهات يا أستاذ نحن فى زمن عبد السميع

وأكيد مش واحدة من الطالبات المتفوقات الجامعيات اللاتى قمن ببعض الاختراعات الهامة التى تحتاج لتمويل لتكون ذات منفعة لهذا الوطن لكن لا حياة لمن ينادى

ولو قعدت تفكر وتحاول أن تعرف هذه الموهبة فلن يحملك خيالك مهما شطح للانسانة المقصودة فهى بكل فخر الست هيفاء وهبى أى نعم هذه العبارة الجبارة مكتوبة فى أعلان طويل عريض للتنويه عن برنامج يضم هذه الموهبة التى أثارت الجدل مع جهبذ أخر (خالد يوسف)

ولاننا فى زمن الصفاقة فسؤال سفيه يفرض نفسه هى الست موهوبة فى ايه؟؟؟ وأى جدل هذا الذى أثرته فى هذا الزمن العقيم؟؟؟؟

ولى سؤال للفتيات اللاتى يعشقن هذه المخلوقة : من هى بنت الشاطىء ؟ طبعا هى ليست ليلى فوزى وأشك أن البنات الحلوة تعرفها ولا سمعت عنها

وحسبى الله ونعم الوكيل يا بلد مش حتقوم لها قومة والبركة فى المواهب الموجودة والمستوردة

"قلمى"


الأربعاء، مايو 20، 2009

سؤال







ومضات من الاشتياق تسللت من الوجد هاربة
فى سكون الليل
فدثرها القمر وحملتها النجوم


وأنسابت خفية فى وجدانك
لعلك تحتويها



فهى نسمات روح لا تبوح بسرها

قادمة من قلب أرهقه الحنين
فهل تجد السكون فى دفء عقلك ؟
"قلمى"

السبت، مايو 16، 2009

أسمى

بعد الويك أند المفترض أن الشخص يبقى فرش كده ومقبل على الحياة فمحبتش أكتب شىء كئيب زى القمح الفاسد لان العالم كله كتبت عنه مع أن أنا لا أرى أى مشكلة فيه هو مش أحنا العيش الحالى الى بنأكله فيه مسامير وحشرات برضة ولا علشان المسامير صناعة محلية!! (سوراج بجد) - وأيضا لا يروق لى الكتابة عن سلسلة الجرائم الى شغالة اليومين دول - الله ينور - يمكن لان عندى أمل أن مصر لسة بخير بدليل خير زمان (السوبر ماركت) ولبن بخيره!!!

أنا حأكتب عن معاناة شخصية لا تهم أحد -ترى هل فكرت يوما أن تغير اسمك - أنا على مرور سنوات عمرى فكرت فى ذلك ألف مرة فهو من أحدى منغصات حياتى - وبدأت هذه الفكرة تسيطر على أيام أعدادى وثانوى حين أكتشفت أن بطلات الافلام المصرية الكئيبة والتى تنتهى أما بموت البطل أو البطلة بتكون البطلة منى والبطل أحمد وهذه المعلومة الفذة أكتشفتها (لانى لا أهوى الافلام المصرية بتاتا) من أستظراف صديقات المدرسة لان كل مرة ينادونى لازم اللازمة بتاعة منى وأحمد - ولكراهيتى لذلك الثنائى المرح رفضت أبن الجيران لانه كان أسمه أحمد (أصل ماكانتش ناقصة مألسة !! مألسة شفت اللغة ..... سوراج برضة)-

مرحلة الجامعة ظهر الباشمهندس محمد ثروت وقام بالغناء لرشا رغم أن أسم رشا ده كان لا يعرفه أحد وبالكتير كان فيه يجى عشرة فى القطر المصرى كله (بعد ذلك أنتشر هذا الاسم أنتشار النار فى الهشيم - لغة سليمة 100%) ولما أدرك أن رشا مش موجودة غنى لمنى يا حلوة يا منى وكانت هذه الطامة الكبرى بالنسبة لى لان نسبة الاستظراف زادت من الصديقات وتلاقى الواحدة تنادينى فى وسط مدرج الكلية بهذا اللحن الجميل - مش عارفة أنا أزاى كنت مصاحبهم !!!

أتجوزت وخلفت ومع مرور الزمن الجميع نسوا أسمى الحقيقى (الحمدلله) زوجى ينادينى ياماما (رغم أنف الفتاوى الى قالت ده حرام!!!) وكذلك الاولاد ومع كبر سنهم أستبدلوا كلمة ماما بلقب أخترعوه من عندهم - ميزو - مش عارفة من أين لهم هذا؟؟ اما الاهل فأنتقلوا لرحمة الله تعالى وبقيت أختى تنادينى حبيبى - على أعتبار أنى الحبيب الذى لاوجود له فى حياتها أما الصديقات (تغيرن) فيتنوع الاسم : أزيك ياعسل \وحشانى ياحبيبتى\عاملة ايه ياقمر\ حأشوفك أمتى ياجميلة !!!! رغم أنى لا أمت لهذه الصفات بأى صلة بس وماله شغال (يونيفرسيل)-

وابتعدت الفكرة الشيطانية بتغيير اسمى من مخيليتى الى أن وجدت سعد الصغير ينطق به فى أغنية قلت لا لا ايمبوسيبل حتى أنت يابروتس فقلت لا لازم رد فعل جذرى وبعدين قلت معلش ليس على المجنون حرج على أعتبار أن سعد الصغير من المهاوييس وليس المطربين وبعدين زى ماقلت الناس خلاص نسيت أسمى وعند الجيران أنا أم كريم وكان هذا أدعى بقتل الفكرة الى أن نزلى السبت يا أم كريم وده مشهد أعلانى لسكر الاسرة فبجد كده بقى اوفر اوفر - أهرب أروح فين وفى طريقى للهروب لقيت زوجى بيقول لى قرأتى أسم المرحومة زوجة السيد رئيس الوزراء - اسمها منى عبد الفتاح فى صفحة الوفيات - قلت له اسمها منى السيد عبد الفتاح قال لى ماتفرقش - بذكائى الخارق أدركت أنه يحلم بأن يرى أسمى على صفحة الوفيات أنا كمان قلت مش حأعمل مشكلة وأكبر دماغى فأنا برضة كبسة سنين على نفسه مافيش مانع أنه يحلم شوية (وماله ياخويا مش عيب)

ولسة يادوب حأروح السجل علشان بقى فاض بى لقيت أبنى باعت لى على الفيس بوك أغنية أجنبى اسمها Mona وبيقول لى ايه رايك الاغنية قديمة جدا (طحن!!) معرفتش أقول يالهوووووووووووووووووووى ده أسمى وصل العالمية ولا أشكره لهذه اللفتة النايس ماهو برضة معذور مش عارف المعاناة التى أعانيها بسبب اسمى -

أهم حاجة أن والدى الله يرحمه أنتقى أسمى أنا وأختى تيمنا بأسماء بنات الرئيس الراحل جمال عبد الناصر - كووووووووووووووووووووول صح !!!!!


"قلمى"

الجمعة، مايو 15، 2009

أعلانات كمان وكمان

النهارده سمعت أعلان فى الراديو - أنا كنت أظن (زى أيظن كده بتاعة الفيلم الهابط) أن السماجة الاعلانية فقط على شاشة التليفزيون طلع لا علشان الى معندوش تليفزيون يجيلوا نقطة برضك لما يسمع الراديو -

الاعلان بيقول لك ياسيدى لما تبقى فى البحر (ولا فى النهر مش فاكرة أهو أى مية) وتيجى موجة توقعك (يارب تيجى موجة تشيل مؤلفى الاعلانات كلهم) وبعدين تبص تلاقى تمساح يجى عليك ويأكل أيدك (مش فاكرة اليمين ولا الشمال اصلى كنت عايزة أعرف نهاية الاعلان ده ايه) - حيبقى فضلك أيد تانية تأكل بيها باوند كيك مولتو!!!!!! ياسلام ايه الابداع ده يا خواتى عسل والله أنا مكنتش مصدقة الى بسمعوه زى كده روتانا سينما مش حتقدر تغمض عينيك وعلشان كده طفيت الراديو علشان ميغمش عليا -

أكيد مؤلف الاعلان ده هو أخو أو أبن عم الخفة التنح والرخم والسمج بتاع كوكاكولازيرو

أنا بس عايزة أعرف هو ده أسمه ايه - لا بجد - هل ده نوع جديد من الاستظراف أصلى حاسة أنه راشق لنا فى كل حتة!!!!

يارب أن شاء الله فى الويك أند تطلع عليكوا تماسيح النيل كلهاو كمان الى فى جنينة الحيوانات علشان تأكل ايديكوا الاتنين ونشوف بقى حتشربوا كوكاكولازيرو وتطفحوا باوند كيك مولتو أزاى يا بعدة يا بتوع الاعلانات

"قلمى"

الخميس، مايو 14، 2009

لافتة على الطريق

مصر عرين الابطال ومقبرة الغزاة
لافتة ملقاة على رصيف طريق ما فى مكان ما فى بلدى الحبيب
ترى الى أى عهد تشير؟

يبدو أنها لم تعد تروق للناظرين لذا هى ملقاة بأهمال
لحين البحث عن عبارة تلائم روح العصر الحالى بأيامه السوداء

أقترح - مصر عرين القتلة ومقبرة الشرفاء

وخسارة يا بلدى

قلمى

الأربعاء، مايو 13، 2009

برقية




الزهرة هى برقيتى اليك

وهى تكفى

قلمى

الثلاثاء، مايو 12، 2009

أختبار ذكاء

أختار الاجابة الصحيحة - يمكنك أختيار أكثر من أجابة و أضافة أجابات أخرى من عندك
مع التفسييييييييييييير
حقيبة الاسعاف تباع بسعرين مختلفين 30\40 رغم أن الحكومة أعلنت أنها ستوزع مجانا
1الحكومة لا تكذب ولكنها تتجمل
2أنا تهيألى أنها مجانا وأن ما قيل وأثير عن هذا الموضوع فى التليفزيون هو محض خيالى
3انها توزع مجانا والشركتين المصنعتين من أختراعى


ل أ ب – ل ب أ – ف رأ – ط ب أ - حروف نمر السيارات الجديدة – معناها
1الحرف الاول = الحرف الاول من أسم صاحب السيارةأو أى حرف من أسمه الاول أو التانى \ الحرف الثانى = أى حرف من منطقة سكن صاحب السيارة وممكن تكون الحارة برضة \ الحرف الثالث = أى حرف من أسم عائلة أو عائلة مدام صاحب السيارة
2الحروف الثلاثة سيم للعساكر فى أشارات المرور للانقضاض عليك بأى مخالفة بدون مناسبة
3الحروف الثلاثة لا تعنى أى شىء بالنسبة لك والمعنى فى بطن المرخصين
ملحوظة:الحروف عاليه كلها ترخيص مدينة نصر

-السيدات العاملات فى قطاع الحكومة يتحلين بكل المصوغات الذهبية التى يملكونها (2 خاتم فى اليمين\2 خاتم فى الشمال\سلسة ذهب أو أكثر ممكن كردان برضة\اساور\اقراط لو غير محجبة وممكن لو محجبة وعملة سبانش
1لان الذهب من مصوغات (بالصاد وليس بالسين لزوم المصاغ)التعيين فى القطاع الحكومى
2أغراء للبحث عن عريس فى حالة الانسة لان المدام لابساه علشان تغيظ زميلتها
3الذهب ليس عيار 18 ولا غيره ده صينى لزوم الفشخرة الكدابة

عند شرائك عرض 2 تأخد 1زيادة هدية ليه مش بتأخذ الهدية الا لما تحاسب وتروح تقف فى طابور ثانى
1لان الشركة صاحبة العرض تعتبرك لص ولازم تدفع اولا قبل ما تخد الهدية
2لان الشركة صاحبة العرض تهوى تعذيب موظفيها بأن تجعله يقرأ فاتورة كل زبون حتى يجد ثمن العرض المراد تسليم هديته
3لان الشركة صاحبة العرض والسوبر ماركت من أنصار تشجيع ريجيم لكل زبون فيروح ويجى وايه يعنى خليه يخس شوية

عند شرائك عبوة (صناعة مصرية) من معظم الاشياء تجدها ناقصة وخصوصا لو سوائل
1لان العبوة بتتكب من العامل وهو بيحطها على الرف
2لان نظرك ضعيف وهى العبوة شكلها كده
3لان ده أسلوب جديد فى النصب بشياكة لان كل العبوات من نفس المنتج كلها ناقصة

تذهب للشهر العقارى فتجده مغلقا (الساعة تجاوزت التاسعة صباحا) وبعد قليل يأتى الموظف المسئول ويفتح بالمفتاح – ليه المفتاح مع موظف الشهر العقارى
1لانها عزبة أبوه وأمه والمدام اذا لزم الامر
2لان الى مالوش أهل الحكومة أهله فالشهر العقارى هى عائلة الموظف بأعتباره الموظف اليتيم الوحيد فى المكان
3لانهم سرقوا الصندوق لكن مفتاحه مع موظف الشهر العقارى
ملحوظة :أنت واخد أذن ساعة من شغلك والساعة عدت ولم تنجز شىء

تذهب لبنك حكومى فتجد الشخصية المسئولة فى الاستقبال تعاملك بكل لطف وتنجز عملك بسرعة بينما تقزقز اللب - هل
1لان اللب أيضا من مسوغات (المرة ديه بالسين) التعيين
2لان شعار الحكومة الالكترونية قرطاس لب لكل موظف
3لانك ذهبت فى وقت العصارى حيث يحلى التسالى
ملحوظة:كان نفسك فى شوية لب تقزقزهم أنت كمان

منذ الاعلان عن أنفلوانزا الخنازير وحالات أنفلونزا الطيور فى مصر فى تصاعد متواصل وسريع
1لمواكبة عصر السرعة
2كوموفلاش للتعتيم عن أخبار الفتنة الطائفية القائمة بسبب الخنازير
3هى غلطة مطبعية والحقيقة أنها حالات أنفلونزا الخنازير

الحديث منقطع النظير عن تكلفة زواج هيفاء وهبى وأحمد أبو هشيمة -مع تكذيب الطرفين للرقم فى عدة أحاديث صحفية
1لان خلاص الحياة بقى لونها بمبى وهمومنا خلصت ومابقاش فيه غير هذا الخبر اللعين الهايف نتسلى به
2لان البنات المصريات متغاظة أن الست هيفاء أتجوزت واد حليوة ومصرى ومتريش بعد ما قعدت تغنى لرجب حوش صاحبك عنى - ومنفعش
3لان ----- أكمل كما يحلو لك بس فى سرك
- ملحوظة :تذكرة بالمثل الى بيقول الى معاه قرش محيروه يجيب حمام ويطيره

"قلمى "

السبت، مايو 09، 2009

حالة

أبحث عنك وأعلم أننى لن أجدك
ولكنى لازلت أبحث عنك

أعلم أنه لن تصلنى خطابات منك
ولكنى لازلت أفتش صنوق بريدى

أعلم أنك لن تهاتفنى يوما
ولكن لازال رقمك محفوظا فى ذاكرتى

أعلم أننى لن أراك غدا أوبعد الغد
ولكنك مازلت تطرق باب أحلامى

أعلم أنك لن تهدينى هدية عيد ميلادى
ولكنى لازالت أنتظر أن تصطحبنى لموعد عشاء

أعلم أنك لا تعى بحنينى وقاموسك لايحمل معنى الافتقاد
ولكن أشتياقى لك هو أستمرارية حياتى

أعلم أن حبى لك يائسا وبؤسا وكل أنواع الالتياع
ولكن لا يفهم قلبى سوى أحتضانك بداخلى
فتسرى فى روحى دوما سكرات موت ونبضات حياة

قلمى

الخميس، مايو 07، 2009

كوكاكولا زيرو أرحموووووووووووووووووونا

عباقرة أعلان كوكاكولا زيرو شعروا بالذنب من الاعلان السابق فعملوا تحفة أعلانية ج2 (زى عمروسلمى 2) وهى كالاتى :

-كوكاكولازيرو يعنى لما تبقى بتشات على النت مع بنت تطلع بنت - ياحلاوة !!! ياترى ديه أستعارة مكنية ولا المعنى فى بطن الشاعر ولا ايه بالضبط؟؟؟؟

-كوكاكولازيرو يعنى تبقى عازم المدام على مطعم سوشى يطلع بيقدم ملوخية !! هل ده نوع من المرح ولا خفة الظل ولا ايهههههههههههههههه- بس هى يعنى أيه ملوخية بأعتبار أن المصريين جمعاء عارفين السوشى!!!

أمانة عليكوا تروحوا تأكلوا سوشى فى الويك اند علشان كوكاكولازيرو يرحمووووووووووووووونا

" قلمى "

أم على - شوية خفة لزوم الكأبة

حوادث قتل السيدات على يد الشغالات (وهى زادت بشكل ملحوظ فى الاونة الاخيرة) جعلتنى أفكر فى شىء ليس فلسفى ولا عام ولانصح ولاأرشاد ولا فى الاسباب لا سمح الله - لا- لكنى فكرت هل ممكن فى يوم (أم على) تفكر تموتنى؟؟؟


أم على ديه من نفس عينة أم هند الى بيكتب عنها بلال فضل – ست شقيانة بس ديه جوزها مش ميت لا متجوز عليها وهى برضة راضية وصاينة العشرة وأولاده بتجرى عليهم –

أم على بتيجى تساعدنى مرة فى الاسبوع فى تنظيف المنزل مش علشان أنا من الطبقة الهاى كلاس ولاعلشان متقنزحة على شغل البيت لا لكن علشان حصلت لى حادثة من زمن طويل وأثرت على ظهرى (مع شوية كلكعة ) – هى بتروح لاخوات جوزى وبناتهم كمان لان أهم شىء فيها الامانة بغض النظر على أنها بتلبس نظارة كعب كوباية وكل مرة (بقالها عندى أكتر من سنة) تحط الحاجات مش فى مكانها ابدا حتى السجاجيد –

أنا بعد حادثة القتل الاخيرة جالى هاجس أن أم على تكون بتخطط لقتلى بعد ما قعدت فى البيت وقعدتلها وأخر مرة قلت لها من فضلك ما تبقيش تسيبى الغسيل فى الغسالة فأفتكرت أنها المرة ديه مشيت وما دعتليش زى كل مرة ربنا يوسع رزقك ويخلى لك أولادك وابتديت افكر ياترى ممكن تقتلنى أزاى هى بصراحة لو أدتنى بوكس واحد ممكن أتكوم فى ساعتها لانها ما شاء الله هضبة فقلت كويس موتة سهلة مش حتحتاج تذبحنى لانى بأترعب من منظر الدم – وكمان مش بحب موضوع الخنق ده لان مش معقول حتخنقنى بايديها علشان البصمات فحتدور على حبل غسيل والحمدلله معنديش يبقى الايشاربات بس الايشارب حيعلم فى رقبتى وده مش عاطفى خالص -

بس ليه أنا جالى الهاجس أنها حتموتنى أنا معنديش الماظ ولا مشغولات ذهبية ولا نحاس حتى وهى متأكدة من ده بس أنا قلت يمكن طمعت فى القرشين الى طلعولى بعد ما سبت الشغل الى أن شاء الله حيخلصوا فى غضون سنة (حلوة غضون ديه) ويمكن اقل لو مالقتش شغل تانى وبصراحة حركاتها بقت مريبة يعنى قلت لها وكانت المرة الاولى معلش ممكن تشترى لى شوية طلبات من السوق لحسن مش حأقدر أنزل فغابت يجى ساعة لدرجة أنى نزلت لفت عليها لتكون تاهت طلع بعد كده أن جوزها جه سكن فى حتة قريبة مننا – يعنى ممكن يكونوا بيخططوا سوى فحلفت توبة من ديه النوبة أنزلها تشترى لى حاجة من السوق (والله كانت أول وأخر مرة أن شاءالله) – وكمان لما قلت لها بلاش تلمعى المكتبة يا أم على أنا حابقى ألمعها بمعرفتى قالت لى ليه تلميعى مش عاجبك قلت لها لا بس أنا بحب كتبى أنا الى أوضبها بمعرفتى (وهى بتكركبها بطريقة مفزعة غير تكسير براويز الصور)بس راجعت نفسى مرارا لحسن تكون زعلت أنى حرمتها من القرأة وخاصة أن عندى يجى 200 كتاب أنجليزى و ضعفهم عربى –

وأنا بكتب الكلام ده رنتلى على التليفون معلش يا مدام مش حاقدر اجى بكرة لحس الجماعة مسافرين (أخوات جوزى رايحين عمرة) حأجى لك يوم السبت – أخخخ يعنى خطة للاستفراد بيا لان السبت أنا حأبقى هوم الون 4 – ألحق أقوم أخبى السكاكين والمقصات وأدوات القتل المتوفرة عندى بكثرة (أدوات هندسية المثلث الواحد ممكن يطير الرقبة\وعندى منشار وشاكوش\ومسامير لو حبت تعذبنى)
يا نهار اسود ده أنا عندى وحدة قتل متنقلة – الله بس لو جابت معها عدة القتل الخاصة بها حأعمل ايه – لو ماظهرتش يوم الاحد القادم ابقوا اقروا لى الفاتحة -

"قلمى"

الأربعاء، مايو 06، 2009

بيروت - لبنان 2007 (2) والاخير

قررت أن أقهر حالة الكأبة المتسربة بداخلى وأكمل خواطرى عن رحلة بيروت علها تخفف من وطأة تلك الكأبة - كان من الصعب التحرك بسهولة فى بيروت خلال الفترة التى قضينها فيها وذلك بسبب أعتصام وتمركز العديد من الناس فى خيام عديدة فى بقعة من ارض شاسعة بجوار مسجد الحريرى (أعتصام خاص بأحوال أنتخابات الرئاسة القادمة) وهو مكان يعتبر حيوى جدا كما أن ساعات العمل كانت تعوق زيارة أى من الاماكن الممكن زيارتها - والاسعار فى بيروت خيالية ومن الصعب التسوق فى ظل هذه الاسعار الا لو كنت على دراية ومعرفة ببعض المحلات التى تبيع بثمن معقول وطبعا للستات لو بتحب الكريمات والشاور جيل الى بكل أنواع الفاكهة الى فى العالم والبارفانات وأدوات التجميل حتلاقيها هناك لانهم زى باريس فى الحاجات ديه –
ثانى يوم فى بيروت ذهبنا لمول فى وسط البلد بعد الشغل وكنا متفقين أن اصدقائنا يمروا علينا هناك علشان كانوا عازمنا فى مطعم أيطالى – الحقيقة البائعون والبائعات فى غاية البشاشة والذكاء ولا يمكن تدخل محل الا لما يعرفوا يخلوك تشترى وأنت مبسوط لكن مش بالحاح أو غصب عنك لا برضاك بعد اقتناع تام بالحاجة الى حتشتريها وتبقى عارف أنها تستاهل مش يأكلوك الاونطة – وحاجتهم مسعرة بالليرة اللبنانى وكمان الدولار والافضل أنك تشترى بالدولار علشان الليرة عملة تلخبطك من كتر الاصفار يعنى تبقى فاكر أن الالف ليرة ده مبلغ يطلع ميكملش 100 جنية – أنا سبت زملائى دخلوا محل يتفرجوا على حاجات الكترونكس ودخلت محل فرجين Virginأصل أنا لا يمكن أروح أى بلد من غير ما أدخل المكتبة واشترى كتاب أما عن البلد أو عن أى حاجة تانية ده بالنسبة لى حاجة مهمة جدا وطبعا قبل ما أدخل مديرى وزميلى قالوا لى من فضلك بلاش تشترى كتب كتيرة ! أنا أشتريت كتاب عن الاحداث اليومية لحرب اسرائيل على لبنان سنة 2006 الاحداث فى رواية على شكل يوميات من الاب شربل يكتبها لابنته فى كندا وهو يعيش فى حارة حريك وهى المربع الامنى التابع لحزب الله وهو بعيش مع زوجته مارى التى ترفض أن تترك المنزل لانها لا تريد ترك جارتها أم حسين التى تقطن بمفردها – الرواية اسمها لن انزح بقلم يوسف النبهانى (مش الشيخ النبهانى ده شخص مختلف) الكتاب تمنه 8 دولارات والرواية تضعك فى أجواء الحرب بأسلوب قصصى رائع وشيق ومؤثر وتظهر فيه روح الاخاء الوطنى بدون الحاجة الى شعارات حسن ومرقص – وفى طريقنا الى المطعم الايطالى توقف بنا الاصدقاء على البحر لنرى صخرة الروشة وهى تدعى أيضا بصخرة الحب وهى كما ترون فى الصورة صخرتين كبيرتين فى شاطىء منطقة الروشة فى بحر بيروت الغربى هى تكونت بفعل الزلازل والغريب أن صخرة الحب هذه مكان للانتحار!! فكرة المطعم الايطالى لم تكن تروق لى (هو أحنا جايين لبنان علشان نأكل أكل أيطالى وبيتزا والنظام ده لكن هم وعدونى أن اليوم الثالث حنروح نأكل أكل لبنانى علشان كده وافقت أروح وكمان كنت حأموت من الجوع كالعادة) – المطعم الايطالى ديكوره كأنك تجلس فى شارع من شوارع روما ووأتضح أن الاكل الايطالى ليس بيتزا وكانالونى ورافيولى وبس لا ده حكاية فيها كمان لينجوينى وريجاتونى وحاجات حلوة كتير على نفس الوزن أنا طلبت لازانيا ! وكأنها مطبوخة فى روما أدركت أن الايطالى الى كنت بأكله قبل كده أكيد كان صينى - والجميل فى المطعم ده أنه بعد ما الاكل وعايز تغسل أيديك بتطلع الدور التانى بتلاقى الحوض عبارة عن بئر كبيروالحنفيات معلقة في الجردل من فوقه بشكل حلو جدا – فكر برضة – خلصنا ورجعنا الفندق وطبعا رحت فى سابع نومة وأنا بحلم ببكرة يوم الاكل اللبنانى –
وجاء الميعاد بعد يوم أخر من العمل الشاق بس قبل ما نروح المطعم قالوا لنا أيه مش حتروحوا الرفاعى (انا المرة ديه كنت عارفة بيتكلموا عن أيه لان كذا مرة صديقاتى اللبنانيات يبعتوا لى كيس حلو منه) الرفاعى ده بقى اشهر واحد بتاع مكسرات فلو عايز تجيب حاجة لاهلك ولو بتعز أصحابك معزة خرافية يبقى تروح الرفاعى علشان تجيب لهم مكسرات بس خالى بالك كيلو الفستق ب 20 دولار طبعا رحنا وأحنا برضة حنعز حاجة على أولادنا والرفاعى مش بس مكسرات لا ده كل أنواع النوجة الى عمرى ما شفتها فى حياتى ولا حأشوفها غير فى المكان ده والله عنده حبة حاجات حلوة (ده لو بتحبوا الحاجات الحلوة زى أنا وعائلتى) بتاخد العقل على رأى اللبنانيين وطبعا أنا أكتر واحدة كعيت فى الطلعة ديه بس كله علشان العيلة – وتوجهنا لمطعم برج الحمام الموجود فى ماريوت بيروت – وبلاش أقولكم ماريوت بيروت عامل أزاى علشان لا أعكر صفو حلم ماريوت القاهرة والجى دبليو ماريوت (الى بالمناسبة أسوأ أكل ممكن تأكلوه فى حياتكوا هو فى الاتنين دول) – الكبة النية والعصافير المشوية من الاكلات المعروفة اللبنانية ولاتخلو أى مائدة منها- الكبة النية عبارة عن لحم مفروم جدا جدا ولايحتوى على فتفوتة دهن وتأكله مع الثومية أنا دقتها هى حلوة بس فكرة اللحمة النية ديه برضة مش عاطفية بس هى طعمها حلو أما العصافير بقى الى بيقزقزوها زى اللب فديه صعبة جدا وهى الحاجة الوحيدة الى ماعجبتنيش مش فى الاكل لا ده فى السفر كله بس الاكل اللبنانى بقى – هو ده – الصراحة الاكل المدعو لبنانى فى مصر لا يمت للبنان بأى صلة لا من قريب أو بعيد أنا وزملائى تقريبا جالنا تخمة من الاكل وياسلام الحلو حاجة أسمها مفروكة وهى كنافة خفيفة تحطها فى عسل وقشطة وتفركها فى الطبق وتأكل وأن شاء الله وزنك يزيد كده يجى 5 الى 10 كيلو والمصيبة أنهم مش بيتخنوا (حتة قر) وتسألهم أزاى مش بتتخنوا والاكل ده كله قالوا أنهم مش بيأكلوا كده غير فى الويك أند بس وباقى الاسبوع أكلهم صحى – فكر برضة – يعنى أحنا جينا لخبطنا نظامهم وطبعا ده متوقع مننا فى أى مكان !
نيجى بقى لاخر يوم فيكى يا لبنان وهو مسك الختام فقد قررنا لان الحمدلله مطلبوش مننا شغل (المكتب يعمل يوم الجمعة) كان عندنا يوم بطوله لغاية الساعة الخامسة لان الطائرة كانت الثامنة مساءا فقررنا نروح مغارة جعيتا وبعد تناول الافطار وتجهيز الحقائب تم وضعها فى التاكسى الى تم تأجيره للذهاب الى المغارة ثم الى المطار بعد ذلك وتقاسمنا مصاريف اليوم ده أنا ومديرى وزميلى – وكان سائق التكسى رجل عجوز بشوش ودمث الاخلاق وكان يشرح لنا بعض الاماكن فى الطربق (ذهبنا الى بيروت القديمة وهى منطقة اثريه جميلة تطل على البحر وتناولنا الغداء قبل الذهاب الى المطار وبعد أنتهاء جولة جعيتا) وقد مررنا على أحدى الجسور التى كان قد نسفها الاسرائليون أثناء حرب 33 يوم وقد رمم بالكامل ولا أثر لاى حرب وأخبرنا أنه قد تم نسف جسرين أخرين أثناء القصف وقد تم ترميمهما أيضا كما شاهدنا الطريق الى الجنوب حيث كانت بعض المناوشات لازالت تحدث فيه -
ومغارة جعيتا هى من أحلى الاماكن التى رأيتها فى حياتى ومن أجمل الاماكن الطبيعيةوأعتقد أن اللبنانين يعتبرونها من أجمل الاماكن الطبيعية فى الشرق كله وهى عبارة عن تحفة من صنع الله وحده سبحانه وتعالى وهى أولا تقع فى وادى أسمه نهر الكلب وللوصول اليها قطعنا مسافة طويلة بين جبال مزينة بأشجار الصنوبر والبلوط (كما فى الصورة وكلها صور فعلية من المكان ماعدا صورة المغارة فهى من النت لان تصويرها ممنوع)وعند وصولك بوابة المغارة تجد حارس الزمن فى أنتظارك يعتبر من أكبر المنحوتات فى الشرق –
ومغارة جعيتا عبارة عن تجويفات وشعاب ضيفة منحوتة طبيعى وبمرور الزمن المياه الكلسية المتسربة من المرتفعات كونت أشكال وتكوينات لا يمكن وصفها من روعة الابداع -أبداع ربانى-
وهى مقسومة لمغارة عليا وسفلى :
المغارة العليا متعة للسير على الاقدام فى ممرات للمشاة تلائم طبيعة المغارة وكل منحوتة أو صواعد وهوابط غير متشابهة فى الشكل فالتكوين فيها لا يماثل الاخروتجد نفسك مبهورا من المنحوتات الطبيعية ووتشكيل المياه على الصخور وطول ما أنا ماشية فيها (المسافة حوالى 750 متر) مافيش بنى أدم الا وكان بيقول سبحان الله من الجمال - والتصوير ممنوع سواء فى المغارة العليا أو السفلى (محدش بيدخل الكاميرا أو الموبايل مع أن مافيش حد شايفك وبتسيب الكاميرا والموبايل فى خزينة صغيرة قبل ما تدخل مفتاحها بيفضل معاك لحد ما تخلص الجولة) –
اما السفلى فهى المغارة المائية ويتم الانتقال فيها بقوارب صغيرة عبر مسطح مياة لتشاهد أيضا التكوينات الجميلة عبارة عن أعمدة هوابط ونوازل ولا تسمع غير صوت هدير المياه لان مافيش حد بيكلم ويرغى ويعلى صوته وهو بيتفرج ومافيش صوت خروشة كيس شيبسى ولا فرقعة علب الكانز علشان الاكل ممنوع فى المغارة للمحافظة على البيئة وهذا الهدوء والجمال الربانى تستمتع به لمسافة 500 متر تقريبا– المغارة المائية تقفل فى الشتاء لأرتفاع منسوب المياه – وسبحان الله درجة الحرارة ثابتة طول السنة فى المغارتين بس طبعا درجة حرارة المائية اقل من الجافة- ولابراز جمال المغارة سواء الجزء العلوى أو السفلى وليستمتع المشاهد بعجائب الطبيعة من الشلالات البلورية وضعت أنارة مميزة تلائم بيئة المغارة الحساسة - ويمكن قبل دخول المغارة مشاهدة فيلم عن تاريخها للتعرف على طريقة أكتشافها وحول تكوينها وتاريخها -


وكانت مغارة جعيتا هى أحلى ختام لتلك الرحلة التى لاتنسى والناس الجميلة الى شفتها هناك وتسلميلى يا بيروت ويارب أشوفك تانى



"قلمى"

الثلاثاء، مايو 05، 2009

تعويض زواج

النهاردة قررت الذهاب الى أدارة المعاشات لاجل تقديم طلب بصرف مستحقاتى الى كنت بأدفعها قصدى الى كنت بكعها من مرتبى للتأمينات لما كنت بأشتغل وطلعان عينى - قلت قرشين ينفعوا مش عارفة فى ايه ولا ايه ولا ايه بس أهو ينفعوا والسلام -
أنا كنت واخدة تحصين ضد أى مفاجأت تحصلى فى المكاتب الحكومية بعد تعرضى لعدة صدمات السنة الى فاتت فى الشهر العقارى (حأقولها لكم فى حدودتة تانية) فمناعتى قوية (ده الى أنا كنت متصوراه)
وصلت المكتب طبعا تعرف أنك وصلت أزاى من منظر المكتب من برة عليه ختم القذارة المعتبر حاولت مرارا افهم السر وراءه معرفتش غير أنهم يكونوا مولودين به !! أول ما دخلت لقيت طابور وزحمة أمام شباك (أكيد لصرف حاجة) وطبعا لو أى واحد عطس أو كح وكان عنده الى بالى بالك أتش وان أن وان (مش أسمه كده برضة أختصارا لانفلونزا الخنازير) حيروح كل الموجودين فى الباى باى وأنا منهم طبعا -
دخلت مكتب قد الحق (لو عارفين ايه هو الحق بضم الحاء) أكيد لانها كلمة من التراث المصرى الصميم فيه 5 مكاتب 3 منهم كل مكتب عليه واحدة ست والرابع صاحبته فى أجازة مرضية والخامس ملحقتش أعرف ايه حكايته ونظرا لان كان معايا ربنا يكرمه وبعتهولى من السماء زميل عمل قديم يعرفهم فقد أستقبلونى أستقبال البطلات وطلبوا منى الجلوس على كرسى السيدة الغائبة لان الغرفة لا يوجد فيها أى مكان لجلوس العميل وتمنيت من كل قلبى أن الزميلة الغائبة متكنش مريضة بأى مرض من الانفلونزات - والحمدلله المكتب كان فيه بلكونة مفتوحة رغم الهواء والغبار الى كان فى الجو -
قدمت لى أحدى اسيدات طلب وطلعت الشوافة بتاعة القرأة وبدأت أكتب البيانات لقيت خانة مكتوب السبب لطلب الصرف (هم مالهم فلوسى وعايزاها) فسألت بكل برأة أكتب أيه قالت لى > تعويض زواج< نعععععععععععععععم !!! قالت لى تانى تعويض زواج - الصراحة تنحت ومعرفتش علاقة ده بده أيه انا كنت متصورة أن تعويض الزواج ده جوزى يديهولى بعد زواج 25 سنة أو مثلا يطلق سراحى لحسن السير والسلوك طيب التأمينات دخلها ايه وأشمعنا تعويض زواج يعنى؟؟ يمكن علشان دلوقت الزوج ممكن يأخذ معاش الزوجة حتى لو كان مطلع عنيها لغاية لما ماتت فده تعويض له أو تعويض للزوجة الى بتشتغل طوال الحياة وبعدين الازمة أستكترت أنها تكمل شغل لغاية لما تطلع معاش الحقيقة معنديش فكرة ولو حد عرف يبقى يقول لى يعنى ايه تعويض زواج-المهم لسة بكتب الكلمتين دول لقيتها بتقولى معاكى قسيمة الزواج يامدام على أعتبار ان احنا بنمشى وحطنها فى شنطتنا زى البطافة!! - قسيمة زواج قسيمة زواج أنا سمعت فين الكلمة ديه قبل كده!!! أه أفتكرت أكيد فى درج ما فى دولاب ما فى البيت هى فى البيت أكيد - كلمت جوزى على الموبايل سألته قسيمة الزواج ممكن تشوفهالى فين (والله بكل ذوق) - قسيمة زواج ايه ده طبعا بيسالنى!! > طبعا لم يجدها بس أنا الحمدلله وجدتها لما رجعت البيت - والادهى أن زوجى سألنى هو أحنا معندناش غير واحدة أمال التانية فين؟؟؟ أه ياترى فين فين فين تتصوروا مخدنهاش من المأذون من 25 سنة ياحالولى!!!< ولم يسألنى يعنى ايه تعويض زواج لما حكتلوه شكله متواطأ معاهم !!!

المهم أنا لسة فى التأمينات - وانا بأكتب بقية البيانات لقيت واحدة من الستات بصت على المكتب الفاضى التانى (الى قاعد عليه زميل العمل السابق الوقور الى فوق 60 سنة مستنى ومتذنب علشانى) وقالت ايه ده التليفون ده سماعته مرفوعة كده من أمتى (والله السماعة مرفوعة من أول ما دخلنا وبتقول أنا هه يجى كده من ربع ساعة) وفطت من مكانها كأن ناموسة قرصتها وأتجهت الى التليفون ومسكت السماعة ولقيتها بتقول أيوه يا زينيب ها عملتى ايه؟؟؟ ولسة يدوب بستوعب لقيت الست التانية بتسألنى يامدام أنت ضمتى مدد شغلك؟؟؟؟؟؟ تناحة تانية منى فين السؤال - طبعا لانى مغيبة وعايشة فى الخيال العلمى أنا كنت فاكرة أن طالما عندك رقم تأمينى واحد ومدد خدمتك بتبان على الكمبيوتر الى الحمدلله موجود يبقى أنا فى السليم طلع لا يا حلوة أنا لازم الف على مكاتب تامينات عملى القديمة بطلب علشان اضم كل الملفات -
الست كتر خيرها ودتنى لست تانية فى مكتب تانى وشرحت لها تعمل لى ايه والتانية رغم أمتعاضها لانها ماسكة شغل هالة وهدى وعواتف (بدل من عواطف)الى مجتش النهاردة عملت لى قصاصتين من الورق أى والله قصاصتين (على وزن تذكرتين) وقالت لى أمضيهم وأختميهم من الستى (تشديد التاء) المدييييييييرة وأنا زى الشاطورة رحت للستى المديرة بعد ما عديت مرة تانية على الطابور اياه والستى المديرة قاعدة أخر ايامة على المكتب ماسكة القلم تمضى وجانبها واحدة تانية مش حاقدر اقولكم حجمها أد ايه قاعدة فقط علشان تختم (بكسر التاء) بعد الامضاء وكل ورقة تختمها تقول أه يانا يارجلى (الرجل الى فى الجسم مش بعلها) - وسألت يا ترى يا هل ترى حد من الستات الحلويين يعرف مكان مكتب شمال العمرانية والتانى الى فى جنوب الجيزة ده فين - أنا ساكنة فى مدينة نصر - قالوا لى للاسف لا (متولسين مع نفيسة الى للاسف مامتتش) طيب الملف ياخد اد ايه على ما يوصل لكم قالوا لى (ده طبعا يارب يارب يكون موجود) 15 يوم يعنى 2 ملف شهر (خلى بالكم ده أنا جاية بواسطة) - تفتكروا حألحق اصرف تعويض (أرجو نطق التاء بطريقة متيحة)الزواج (الى هو أصلا فلوسى مش تعويض من حد ولاحتى الزوج) ده قبل ما نصف سكان العالم يموتوا (لا قدر الله) حسب أخر أخبار انفلونزا الخنازير
أدعووووووووووووووووولى

نسيت أقول لكم أن الاحداث ديه حصلت وفى الخلفية صوت أذاعة الاغانى وعبد الحليم بيغنى بحلم بيك أنا بحلم بيييييييييييييك بس معرفتش أى مكتب فيهم الى كان مشغل الراديو

"قلمى"

الأحد، مايو 03، 2009

كانت هنا - قصة قصيرة

على الرف بمكتبته ديوان لمحمود درويش لم يكن قد سمع به حتى أهدته هذا الكتاب قائلة بمرح :
" من غيرى سيهديك كتابا يوم ميلادك"؟ أكيد مافيش غيرى –
لم يقرأ هذا الكتاب حتى افترقا أعجبته الاشعار كما أعجب بأختيارها
ولكنها لم تعد هنا ليخبرها
أعتاد الا يتذكرها وأسقط كل أيامها من زاوية عقله
لكن اليوم لا يعرف كيف يغزوه عالم كانت هى فيه معه
الان يفتقدها ولكن ----

الساعة السابعة يترك مكتبه متوجها لسيارته
لاح له فى المرأة طيفا قادما خيل له أنها هى
توقف لربماولكنها لم تعد تأتى ولن تأتى بعد اليوم
فقد أعد لها حقائبها وطلب منها الرحيل بعيدا
لااراديا جذب سى دى موسيقى ووضعه ليبتعد بأفكاره عنها فوجد نفسه ينصت لاغانيها المفضلة فقد صنعت هذا السى دى لاجله

تذكر هواياتها وتذكر يوم أن رأها أول مرة
يوم أن برق الوهج فى قلبه بدون مقدمات
لم تكن فاتنة ولا جميلة ولم تكن طيبة قلبها ما جذبه نحوها
ولكنه عقلها وذكائها – "أحلى ما فيكى دماغك" ويمر أمامه عالم كانت هى فيه معه
الان يفتقدها ولكن -----
توقف هناك على شاطىء النيل
لحظات صمت تسكنه رغم الصخب المحيط به
تتراقص أنوار القاهرة على صفحة النيل
وتتلاحق الزوارق مع أمواجه – صورة شاعرية – حالمة – مثلها
" دعنى فقط أحبك من خلف حدود ضيقة ولا ترحل عنى لا تجعل لى يوما بدون صباحك "
تذكر كم من مرات تخلى عنها متعمدا فى أزماتها
كم من مرات تناساها ولم يحضر لها يوما حتى زهرة
ولكنها أبدا ما كانت ترحل وتلتمس له الاف الاعذار وتدعوه "حبيبى"
كم كان يعشق تلك الكلمة حين تنطق بها ويشتاق لان يسمعها بصوتها ويشتاق لعالم كانت هى فيه معه
الان يفتقدها ولكن -----

يقترب بائع حمص الشام بضجيج أكوابه
يطلب منه كوبا ويتجه الى حيث لا يلمحه أحد فى منطقة من الوحشة
يتناول الحمص شاخصا فى تراقص الامواج أمامه بهدوء
لم يعد يحتمل حبها
ولم يكن له الحق يوما أن يحبها
ولم يعد يقوى على رومانسيتها العذبة فى زمن الغباء والمسوخ
فقد أتت اليه من خارج الزمن قبله أو بعده لا يدرى لكنها لم تخطو لزمنه وحدودها مبتورة
أصم أذناه عن رجائها بألا يرحل ورحل لا يعرف متى منذ أيام منذ شهر شهور وشهور وشهور وسقطت الايام فى بؤرة النسيان
أحداث كثيرة مرت به
ولا يعرف ما مر بها – لم يعد يعلم عنها شىء ولم يعد يعنيه أن يعرف
الرحيل الاخير كان ضربة قاضية لها أخل بروحها فلملمت حبها فى قلبها ورحلت ولم تنظر حتى الي عينيه
تلاشت مع الايام وكأنها لم تكن أبدا هنا
قال لها مودعا لن تموتى بعدى
فردت بل سأعيش ولكن هناك فارق بين عيشة وأن تعيش الحياة
الان يفتقدها ولكن -----


لم يعد من حقه الحنين لذلك العالم التى كانت فيه يوما معه
لايعرف لم تلح صورتها الان فى ذاكرة العقل ترى ما أخبارها ؟ هل هى مريضة؟ هل أصابها مكروه؟
كان يوما يشعر بها كما تشعر به ويفصلهما أميال
كان يعرف أنها تحادثه فى خيالها وتصله كلماتها والان أنقطع هذا الخيط
بحث عن أسمها جاليا فى هاتفه للان رغم مرور الزمن
يعلم أنها لن تهاتفه ولن يهاتفها ولكن لازالت الاسماء هناك

يرن هاتفه المحمول فجأة فتختفى الذكريات
ينصت لصوت الطرف الاخر " هاتلنا عيش وأنت جاى"
يجيب "حاضر" يغلق الهاتف
ينادى على بائع حمص الشام
يتجه الى سيارته التى تركها بعيدا
ويمر على المخبز فى طريق عودته ليلا لزوجته وأولاده

"قلمى"


السبت، مايو 02، 2009

هرتلة خنازيرى

النهارده ابنى سألنى ليه مكتبتيش حاجة عن أنفلونزا الخنازير (بأعتبار أنى كاتبة مشهورة فى بيتنا) والحقيقة قلت له لان عندى حالة من الارف الحيسى الهرتلى الخنازيرى من الموضوع ده يمكن
-علشان كل ما افتح الجرنال الاقى صورة الخنزير وهو فى الزريبة ناطط لى كل يوم من الجرنال -
-ولا علشان ولأول مرة مجلس الشعب يجمع على حاجة (أعدام \ذبح الخنازير) وتطلع غلط ومحصلتش غير فى مصر المحروسة لان حسب ما زكريا بيقول المرض ينتقل من أنسان لانسان
-ولا علشان لم بدأوا ينفذوا قرار الدبح طلع مافيش تلاجات حفظ كفاية
-ولا علشان قبل الاعدام شوية ناس هربوا الخنازير
-ولا علشان كمان قالوا للناس حنديكم تعويضات بدل أعدام وذبح وبعدين طلعوا بيأخدو على كل رأس يدبحوها 15 جنيه دول الى بيدبحوا مش المدبوحين
-ولا علشان قالك بعد الذبح لازم نتأكد أن الخنازير مافيهاش دودة تراى كنيلا (نيلة عليهم) الى تجيب شلل للبنى أدم (علشان يبقى كل الامراض جاهزة لو فلت من واحد فيه غيره)
-ولا علشان فى وسط الزحمة طلعت فتوى جديدة قالك المسلم الى بيربى خنزير ده حرام - خلى بالك مش بيأكله!!
-لا وعلشان قالك أغسل أيديك بالمياه والصابون ونسى يقول أغسل رجليك قبل ما تنام
-ولا علشان قالك ممنوع البوس طيب والى ماشيين طول النهار والليل يتفوا فى الشارع حتقولهم ممنوع البصق زى اليافطة المعلقة فى أحدى مستشفيات مصر ومستعدة أقولكم اسمها وفين
-ولا علشان وزير الصحة بتاعنا قال أن مصر فيها عقار الانفلونزا متوفر جدا لمليون ونصف مصرى!!!!!!طب فى حالة الوباء حيحصل ايه (موتوا ورياحونا بقى مليتوا البلد)
-ولا بقى علشان منظمة الصحة رفعت الدرجة لخامسة من سادسة طيب ياترى كم واحد فى مصر الى فيها 15 مليون أمى عنده أى فكرة عن أنفلونزا الخنازير أصلا أه معلش أسفة انفلونزا المكسيك اصل اسم أنفلونزا الخنازير مزعل وزير الصحة الاسرائيلى وطالب بتغيره

لى حق اتأرف صح - أشوف فيهم يوم هم والخنازير

"قلمى"

الوردة الزرقاء

موبيلها مغلق ولاتجيب على هاتف المنزل – بيننا موعد قبل سفرها الى سيناء – محاولات عديدة للاتصال ولامجيب لمحت تاريخ اليوم فعرفت على الفور أين هى وبأنها محقة فى نسيان موعدنا

فى خيالى الان أشاهد صور من معرفتى بها صورة وراء الصورة
>اريد التعرف على أماكن السياحة فى سيناء فتمنحنى أجابات شافية<

وتصادقنا هى شابة تشرف على الاربعين لم تتزوج هولندية لام مصرية وتعشق مصر وتعيش بمفردها بعد موت والدتها تجيد العربية والانجليزية بجانب لغتها وتعمل فى شركة سياحية خاصة بتنظيم رحلات لسيناء

كانت تنتظر فارس الاحلام التى تثق أنه سوف يأتى ولو بعد مائة عام ليحملها معه الى أبعد وأجمل الاماكن

وظهر الفارس لم يكن وسيما بل مطلق وله أبنتان مصرى من الاسكندرية يعيش فى أمريكا منذ أن كان شابا جاء الى مصر فى ذلك الحين لقضاء عطلة فى سيناء والبحث عن زوجة وأم جديدة لفتاتين فى سن المراهقة وألتقيا وعرض عليها الزواج فوافقت وبدأت تعد نفسها وأوراقها لوطن ثالت – تكساس بأمريكا –


وأنتقل هو فى تلك الاثناء الى بغداد فى عمل مؤقت أثناء الغزو الامريكى وبدأت بينهما مراسلات حب رقيقة كانا يترسلان يوميا بلا أنقطاع عبر التقنيات الحديثة التى حملت عبارات عشق صافية أو أخبار عادية أو أحوال ومشاكل يومية تقع أحداثها فى القاهرة\بغداد\تكساس بعد تعارفها على بناته –
ومع كل رسالة ومكالمة هاتف كانت تبتهج وتتلالاء سعادة وتحلم بيوم الزفاف وكان هو رغم تعديه الاربعين بفليل قادرا على اضفاء رومانسية لامثيل لها تملاء حياتها وتلامس شغاف قلبها وكانت تتخوف وتخبرنى سرا أن كل ما يحدث لهاوما تشعر به من حب يبدو كالخيال وتخشى أن تفقده وكان يعشق المفاجأت فحضر لها فى زيارة غير متوقعة فى أجازة قصيرة الى الاسكندرية قبل سفرهما الى أمريكا



ركبت معه القطار ورأت افراد من أسرته وشاهدت معه غروب البحر وأستمعت معه لغناء الامواج وهى تمسك بوردة زرقاء أشتراها لها حين ابدت أعجابها بالورود الزرقاء المعروضة فى محل الزهور القريب من الشاطىء

لم يتبقى سوى أسبوع على موعد المتفق عليه لسفرها الى أمريكا أرسل لها يوم ميلادها زجاجة عطر وقلادة ذهبية عليها أول حرف من اسمها وهو أول حرف من اسمه ايضا مع رسالة- لو يهيدينى القدر خمس دقائق فقط لاراكى الان ثم أموت – وكانت هذه أخر رسائله فقد تعرض لسكتة دماغية مفاجئة أودت بحياته ولم تمهلها المفاجأة الوقت الكافى لتذهب اليه ودفن بعيدا عنها ودفنت معه كل الاحلام والاشراقات والاحاديث الملونة –

وبقيت هى هنا تحمل وردة زرقاء تهديها لبحر الاسكندرية فى ستانلى يوم ذكرى وفاته – اليوم الذكرى الثالثة وهى الان أنتقلت لفرع الشركة فى سيناء تأمل أن تعيش بقية حياتها فى هدوء بعيدا عن زحام وفضول البشر ومع ذكريات ورسائل فارس الاحلام الذى لم يعد له وجود سوى فى قلبها وتعيش معها الوردة الزرقاء التى منحها أياها بين طيات كتابها
"قلمى"


الجمعة، مايو 01، 2009

ارحموا أطفالكم

نتحدث كثيرا عن العنف و نشاهد الكثير من صور العنف فى شتى أنحاء العالم ولكن هل فكر أحد بالعنف الموجه ضد الاطفال ليس أطفال غزة أو العراق وليس العنف على يد زوجة أم أو زوح أب ولكن للاسف العنف من الام ضد طفلها –
لماذا تضرب الام طفلها وأنا هنا أتحدث عن الام لان أثبتت الدراسات فى مصر أن الام وليس الاب هى العامل الاول فى العنف الاسرى والذى يؤدى فى بعض الحالات للوفاة – والام هنا ربة منزل أو سيدة عاملة لديها علم ومعرفة بأحوال الدنيا ولا تقع تحت ضغوط الفقر (وأن كان الفقر لا يبرر العنف ضد فلذات أكبادنا أبدا) – وحين تسأل الام لماذا تضربين طفلك أو طفلتك بكل تلك القسوة (العنف موجه للجنسين على حد سواء) فتكون الاسباب لعدم أمتثال الطفل لاوامراها أو لبكائه المستمر أو تبوله لااراديا أو نتيجة سوء سلوكه - وهى كلها أشياء طبيعية فى حياة طفل فهو مجرد طفل وتوجد الاف الطرق لتقويمه غير غسيل الفم بالصابون و الحرق بالملعقة أو الضرب بالحزام أو بالشبشب أو صفعه على وجهه لطمات متلاحقة لا يستطيع الطفل حتى من خلالها أن يتنفس –
وحين تحاول مناقشة الامور مع الام بهدوء لاتسمع سوى مهاترات لا تصدر الا من أشخاص لا عقول لها وبالتأكيد لا مشاعر لديها وحتما لاتندرج تحت الامومة –
هل يمكن لطفل أن يستذكر دروسه أو يستوعبها بعد حصة من الضرب المبرح ليس فى فصله ولكن من أمه ؟؟ هل يعقل أن يعاقب طفل تلفظ خطأ بلفظ خارج غالبا لم يعرف معناه بأن يوضع فى فمه ماء وصابون حتى لا يكررها – هل سيشفى الطفل من التبول الاارادى حين تحرقه بالمكواة أو بأى ألة ساخنة أخرى - أنا لا أعرف من أين تأتى الامهات بهذه السيناريوهات المرعبة لمعاقبة أطفالهن والتى تسبب لهم جروح وكدمات وسجاجات قد لا تلتئم مع الزمن وأن كانت جروح النفس العميقة التى لا ترى أقوى وأعمق !! وحين تخبرهن ده طفل أو ديه لسة عيلة تجيبك بكل صلف وغلظة طفل ايه ده شحط وشيطان وعفريت وتبدأ سلسلسة أخرى من الشتائم والسباب على الطفل فيهان الاف المرات و من أتحدث عنهم أطفال فى عمر الزهور أطفال مجرد اطفال ابرياء لا يعرفون ذنبا سوى أنهم اطفال لهؤلاء الامهات - من هؤلاء الامهات من هى على تدين لامثيل له ومنهن سيدات مجتمع راقى ومنهن التى تحمل شهادات تؤهلها لمنصب وزير ولاتعانى أى منهن من أى مشاكل ولاتظنوا أنهن بعيد عن أنظاركم هن بينكم بكل تأكيد ولكننا للاسف لانرى هذا الوجه فيهن ولانعرفه وأن عرفناه ترى ماذا نفعل؟؟

ينفطر قلبى حين ارى ضحايا لمثل هؤلاء الامهات وأذكر انه فى يوم أخبرتنى أحد هؤلاء الامهات شخصيا بعد جلسة مع طبيب نفسانى بخصوص ولدها أن الطبيب أخبرها أن هذا الولد فى طريقه للاجرام بفضل تربيتها – والطفل كان عمره 7 سنوات ! وزهرة بريئة أخرى أخبرتنى أحد المسئولين بدور الايتام أنها حضرت اليهم بدون علم امها لتخبرها بكيفية الانضمام اليهم أى للدار لانها ترغب فى العيش مع أطفال الدار – أنها ترى فى أطفال الدار الايتام أمانا أكثر من حضن أمها –

هل تظن أى من الامهات التى تتفنن فى أساليب عقاب طفلها أو طفلتها أن الزمن كفيل بأن ينسى الطفل الاساءة أو هل تعتقد أن هذه هى اساليب التربية الحديثة لا أعتقد أن أى دين سماوى كان أو غير سماوى يقر العنف ضد الاطفال أو يعلنه اسلوبا للتربية فى أى زمن من الازمنة – لا اعلم كيف تغفو ليلا وفى قلبها كل هذه القسوة وتمارس حياتها بشكل عادى بل وتتفاخر بهذا الاسلوب السادى ضد الاطفال –
أخر الاحصائيات تقول أن 166 طفل فى مصر قتل بسب العنف الاسرى خلال النصف الاول من 2008 ترى ما شعور هؤلاء الامهات وقد تحول فلذة كبدها الى رقم مجرد رقم ميت فى أحصائية وهى طليقة بسبب الحكم بالقتل الخطأ – متى يكون عندنا جهة مسئولة للتبليغ عن مثل هؤلاء الامهات قبل أن يزهقوا أرواح فراشاتهم الرقيقة –

هن ليسن بالضروة أصدقاء اقارب أو معارف ولكن تشاهدوهن أيضا اثناءالتواجد فى السوبر ماركت أو فى النادى أو فى المسجد أو فى محلات البيع أنا متأكدة أنه على الاقل تصادفون مثلهم مرة اسبوعيا فى تلك الاماكن التى تترددون عليها

فهل تخبروهن على الاقل - بأن يتقوا الله فى أولادهن كما أخبرهن أنا- فهن السند فى الحياة حين لن يكون لهؤلاء الامهات سندا

"قلمى"