السبت، مايو 16، 2009

أسمى

بعد الويك أند المفترض أن الشخص يبقى فرش كده ومقبل على الحياة فمحبتش أكتب شىء كئيب زى القمح الفاسد لان العالم كله كتبت عنه مع أن أنا لا أرى أى مشكلة فيه هو مش أحنا العيش الحالى الى بنأكله فيه مسامير وحشرات برضة ولا علشان المسامير صناعة محلية!! (سوراج بجد) - وأيضا لا يروق لى الكتابة عن سلسلة الجرائم الى شغالة اليومين دول - الله ينور - يمكن لان عندى أمل أن مصر لسة بخير بدليل خير زمان (السوبر ماركت) ولبن بخيره!!!

أنا حأكتب عن معاناة شخصية لا تهم أحد -ترى هل فكرت يوما أن تغير اسمك - أنا على مرور سنوات عمرى فكرت فى ذلك ألف مرة فهو من أحدى منغصات حياتى - وبدأت هذه الفكرة تسيطر على أيام أعدادى وثانوى حين أكتشفت أن بطلات الافلام المصرية الكئيبة والتى تنتهى أما بموت البطل أو البطلة بتكون البطلة منى والبطل أحمد وهذه المعلومة الفذة أكتشفتها (لانى لا أهوى الافلام المصرية بتاتا) من أستظراف صديقات المدرسة لان كل مرة ينادونى لازم اللازمة بتاعة منى وأحمد - ولكراهيتى لذلك الثنائى المرح رفضت أبن الجيران لانه كان أسمه أحمد (أصل ماكانتش ناقصة مألسة !! مألسة شفت اللغة ..... سوراج برضة)-

مرحلة الجامعة ظهر الباشمهندس محمد ثروت وقام بالغناء لرشا رغم أن أسم رشا ده كان لا يعرفه أحد وبالكتير كان فيه يجى عشرة فى القطر المصرى كله (بعد ذلك أنتشر هذا الاسم أنتشار النار فى الهشيم - لغة سليمة 100%) ولما أدرك أن رشا مش موجودة غنى لمنى يا حلوة يا منى وكانت هذه الطامة الكبرى بالنسبة لى لان نسبة الاستظراف زادت من الصديقات وتلاقى الواحدة تنادينى فى وسط مدرج الكلية بهذا اللحن الجميل - مش عارفة أنا أزاى كنت مصاحبهم !!!

أتجوزت وخلفت ومع مرور الزمن الجميع نسوا أسمى الحقيقى (الحمدلله) زوجى ينادينى ياماما (رغم أنف الفتاوى الى قالت ده حرام!!!) وكذلك الاولاد ومع كبر سنهم أستبدلوا كلمة ماما بلقب أخترعوه من عندهم - ميزو - مش عارفة من أين لهم هذا؟؟ اما الاهل فأنتقلوا لرحمة الله تعالى وبقيت أختى تنادينى حبيبى - على أعتبار أنى الحبيب الذى لاوجود له فى حياتها أما الصديقات (تغيرن) فيتنوع الاسم : أزيك ياعسل \وحشانى ياحبيبتى\عاملة ايه ياقمر\ حأشوفك أمتى ياجميلة !!!! رغم أنى لا أمت لهذه الصفات بأى صلة بس وماله شغال (يونيفرسيل)-

وابتعدت الفكرة الشيطانية بتغيير اسمى من مخيليتى الى أن وجدت سعد الصغير ينطق به فى أغنية قلت لا لا ايمبوسيبل حتى أنت يابروتس فقلت لا لازم رد فعل جذرى وبعدين قلت معلش ليس على المجنون حرج على أعتبار أن سعد الصغير من المهاوييس وليس المطربين وبعدين زى ماقلت الناس خلاص نسيت أسمى وعند الجيران أنا أم كريم وكان هذا أدعى بقتل الفكرة الى أن نزلى السبت يا أم كريم وده مشهد أعلانى لسكر الاسرة فبجد كده بقى اوفر اوفر - أهرب أروح فين وفى طريقى للهروب لقيت زوجى بيقول لى قرأتى أسم المرحومة زوجة السيد رئيس الوزراء - اسمها منى عبد الفتاح فى صفحة الوفيات - قلت له اسمها منى السيد عبد الفتاح قال لى ماتفرقش - بذكائى الخارق أدركت أنه يحلم بأن يرى أسمى على صفحة الوفيات أنا كمان قلت مش حأعمل مشكلة وأكبر دماغى فأنا برضة كبسة سنين على نفسه مافيش مانع أنه يحلم شوية (وماله ياخويا مش عيب)

ولسة يادوب حأروح السجل علشان بقى فاض بى لقيت أبنى باعت لى على الفيس بوك أغنية أجنبى اسمها Mona وبيقول لى ايه رايك الاغنية قديمة جدا (طحن!!) معرفتش أقول يالهوووووووووووووووووووى ده أسمى وصل العالمية ولا أشكره لهذه اللفتة النايس ماهو برضة معذور مش عارف المعاناة التى أعانيها بسبب اسمى -

أهم حاجة أن والدى الله يرحمه أنتقى أسمى أنا وأختى تيمنا بأسماء بنات الرئيس الراحل جمال عبد الناصر - كووووووووووووووووووووول صح !!!!!


"قلمى"

هناك 5 تعليقات:

  1. اسمحيلى اقولك زى الشباب الصغير ما بيقول
    انت فى اللذيذ يعنى انت تمام انت اوكى مش عارفة بس هى تنطبق عليكى

    ردحذف
  2. بالعكسى يامنمن ، موش يمكن لو كان ليكى اسم تانى غير منى مكنتش تبقى عندها نفس المواهب الجميلة اللى عندك وبعدين عايزة اية تانى يا ستى دة طلع اسمك زى اسم مرات الوزير ( العمر الطويل ليكى طبعا) وكمان على اسم اغنية عالمية يعنى مالكيش حجة بقى
    وفى النهاية انا فعلا حبيت اسم منى علشان هو اسمك انتى

    ردحذف
  3. يفتح باب بيت المدونين ذراعيه لكل الموهبين في :
    1/ القصة القصيرة
    2/ الشعر بشتى أنواعه
    3/ الرواية "رواية سنوية سنقوم بنشرها في الجريدة"
    4/ المقال الصحفي
    إذا وجدت في نفسك القدرة على المشاركة أرجوا التواصل معي على الميل التالي
    arabicsabah@yahoo.com
    شروط المسابقة
    1/ ..............................
    2/ .............................
    3/ ..............................
    لا يوجد شروط الشرط الوحيد هو العمل الجيد , والعمل المحترم البعيد عن الإسفاف
    المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
    أرجوا التفاعل معنا في الجروب على العنوان التالي
    http://www.facebook.com/group.php?gid=45202724108#/group.php?gid=78080770039

    ردحذف
  4. ازيك يا منى عامله ايه
    على فكره المدونة بتاعتك ظاهر عندى ان عليها موضوع جديد اللى هو ابشرو لكن مش لاقياه بيقولى الصفحة غير موجودة ليه يا ترى
    شوفيلنا ايه الحكاية
    دمتى بخير

    ردحذف
  5. أصلى بعد ما كتبتها قمت بحذفها ماعجبتنيش مش عارفة ليه !!أشكرك على سؤالك ياماما مازن

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))