كوالا لامبور (2)

عايزة بس أنوه عن شىء لو أن شاءالله كملت خواطر السفر ستجدون كلام كتير عن الطعام مش لانى بحب الاكل بس لا لكن لان فى رحلات العمل وخصوصا لفرع الشركة فى بلد تانية يكون مظهر الاحتفاء الوحيد بك سواء من زميل مصرى أو عربى هو الدعوة على العشاء لان مواعيد العمل فى رحلة العمل تكون من 9 الى 5 ويمكن تزيد فلاأختيار لديك أما الاكل أو الشوبينج لان مافيش وقت تتفسح بس سيبكوا الاكل والشوبينج فسحة حلوة برضة ويارب الى نفسه يسافر ربنا يحقق له ده لو فيه خير له-
نيجى بقى لتانى يوم طبعا لانى كنت حأموت من الجوع من أمبارح فصحوت مبكرا جدا لاجل افطر ثم الذهاب الى الاجتماع الساعة 8 صباحا نزلت المطعم الرحب المخصص لذلك- المطعم حوائطه زجاج تطل على أشجار خضراء يلمعأخضرارها ومتناسقة دائريا مكنش لسة فيه ناس كتيرة من مجموعتى أو بقية المجموعات حطيم ملئت الطبق(مش على الاخر) وجلست على ترابيزة صغيرة منزوية لاننى لا أحب التحدث مع أحد صباحا قبل أن أشرب الشاى ولسة يدوب حأشرب الشاى لقيت مديرى فوق دماغى >صباح الخير لا تنسى الاوراق الى حنوزعها على الناس وأكدى عليهم أنهم يسلموها لك بعد ما يملوها قبل ما يسفروا< – حاضر مش حأنسى – (الاوراق على الكرسى أمامى) ومش ممكن أنسى لانى سمعت العبارة ديه قبل السفر وامبارح قبل ماأنام فأكيد مش حأنسى شغلى ! ووبدأت فعاليات الاجتماع وهى تبدأ اولا بكلمة رئيس مجلس الادارة ثم كل مدير بيعرض خطة عمل حتتنفذ فى ورشة عمل ودورنا كان الاخير لاننا الضيوف لكن عندنا سياسة عمل جديدة خاصة بقسمنا نظم المعلومات على كل موظفى الشركة أن ينفذوها – ولفت نظرى أن بعد كلمة رئيس مجلس الادارة الناس بتتسرسب حبة حبة يعنى الى يخلص يمشى وطبعا بيمشى معاه مجموعته وأنا بقيت انط كل شوية علشان محدش يمشى من غير ما أسلمه الاوراق وخصوصا أن قبل ما أدخل غرفة الاجتماعات مديرى سألنى فين الاوراق؟ مع أنى كنت أعمل معهه حينها من 10 سنوات ـاكيد أدرك خلالها أننى لم أكن يوما غبية! لما حان دوره فى الكلام كان ميعاد الغدا أزف وورش العمل سوف تبدأ فى ميعادها الساعة 3 بالضبط فيدوب خلص فى 5 دقايق – الناس الى أتسرسبت ذهبت للشوبنج قبل الورش بحثت عن شخص أخرج معاه فلم أجد-

كانت الساعة 1 ونصف قلت أذهب للغداء وبعدين أشوف أعمل ايه فى اليوم الى ابتدى مايبقاش عاطفى - الغدا كان فى مطعم تانى لما تدخله تحس أنك داخل جنينة الاسماك من كتر الكائنات البحرية البلاستيكية الموضوعة بتناغم على الحيطة الملونة بلون أزرق صافى والسرفيسات على البوفيه أشكال وأنواع من حاجات ملونة أنا مش فاهمة ديه ايه سألت ديه ايه قالوا لى سوشى ؟ أنا كنت فاكرة أن سوشى ده تبع اليابان لكن لا ده تبعهم برضة وهو عبارة عن طحالب ملونة الوان خرافية طبيعية وشكلها جميل جدا بس طحالب وأنا مش ممكن اكل طحلب كنت بمسكه على البحر فى اسكندرية وارميه على الرمل لما يلف على رجلى قعدت أتفرج على اللوحة البديعة ديه الى لا يمكن تقترب ايدى منها حتى جائت لحظة عينى فى عينيه الجمبرى اه هو ده والجمبرى بقى ايه مش دعدع لا ما شاء الله جبت الطبق وطبعا لانى بنت ناس حطيت يادوب 4 فى الطبق وجبت عيش وزبدة وسلاطة وقعدت على الترابيزة وجبت الشوكة والسكينة علشان افصل قشرة الجمبرى عن الجمبريية وباقطع وأحط فى فمى وأمضع وجدته نىء يععععععععععععع أنا لاأعرف للان هل يأكلونه نىء ولا كان المفروض أخد الجمبرى للطباخ واقوله من فضلك اسلقه أو اقليه زى ما أنا عاوزة ؟؟ الصراحة أنا أتأرفت جدا وذهبت للاوضة وبعد شوية تفكير مع النفس فى حاجة أنا مؤمنة بها جدا أن لو أنت عاوز تبسط نفسك حتنبسط مهما كانت الاسباب الى تحيط بك لاحباطك ولو أنت تريدأن تعيش البؤس حتعيشه مهما جابولك من أراجوزات وطبل بلدى نزلت الريسبشن وسألت المسئول ايه اقرب مول ووسيلة الذهاب اليه (طبعا بالانجليزى) أنا كنت عارفة أن البلد دى أمان ومافيش خوف من الخروج لوحدى وبعد ماسألت وعرفت وطبعا يخبرك عن المكان بدقة ويقولوا لك على كذا أختيار لوسيلة المواصلات- و بعد ما غيرت عملة (عملتهم أسمها رينغت) خرجت من باب الاوتيل علشان أعيش وأتجول فى بلد ملتقى النهرين (جومباك وكلانج) ويا سلام يا سلام على ما أول ما خرجت من باب الاوتيل ولانى كنت قافلة الستارة ماكنتش شايفة الشارع – أنا كان عندى أختيارين للذهاب للمول أماالتاكسى أو المونوريل والمونوريل ده عبارة عن قطار صغير بس أختراع ( صورته منورة هنا) وألوانه متعددةكل قطار بلون أمااصفر أوأزرق وأسود وموف القطار ده متشعلق فوق الكبارى وفيه كمان اللايت ريل وهو أيضا قطار صغير لكنه يمشى على قضبان وغير معلق كما فى الصورة أنا قررت أعدى الشارع واركب المونوريل المعلق لان كان عاجبنى شكله وقلت ارجع بالتاكسى وديه مغامرة كادت أن تصابنى سكتة قلبية خاصة أن أخر عهدى بالمغامرات هو تزويغة من الكلية مرة علشان أشوف فيلم زانادو والدى ووالدتى الحمدلله انتقلا الى رحمة الله تعالى ولم يعرفوا حكاية التزويغ ديه - تعدية الشارع هناك فى حد ذاته فن لانه متقسم لحارات وفى كل حارة وسيلة مواصلات واحدة أما موتوسيكلات بتجرى صواريخ و الموتوسيكلات أيضا ملونة وأخرشياكةوهى ليست خاصة بالديلفرى لكنها ملك الشباب والرجال الموظفين وحارات أخرى بها العربيات صواريخ لكن لا يمتزجان العربيات فى مكان والموتوسيكلات أو العجل فى مكان يعنى لا الموتوسيكل بيحلق ويعمل شقلباظ ولا العربية بتحجز على الموتوسيكل والقطار الحيلوة فوق الكوبرى المبنى على الشارع لايوجد شرطى مرور يصفر أو شخص يتبرع لتنظيم المرور ولا أنت حتخاف تعدى لحسن العربيات تجى لاقدر الله تفرمك وهى جاية صاروخ من تحت الكوبرى لا لان فيه مكان مخصص تعدى منه والا حتدفع غرامة مش تعدى من أى حتة والسلام – وصلت لمكان التذاكر وطلعت السلم للقطار أنا مش عارفة أزاى كان بيتهيالى أن ارتفاع الكوبرى بسيط طلع مش بسيط خالص وقعدت وبصيت لقيت أن المونوريل ده بالرغم شبابكيه مقفولة الا أنه عند النظر منه تحس أنك فى الهواء الطلق لانه مصمم بطريقة تخليك تتفرج على البلد من فوق القطار الصراحة أتحرك وأنا حسيت انى فى أحدى العاب الملاهى السريعة ولسوء حظى المول طلع فى أخر الخط وده معناه أن الكوبرى بيواصل الارتفاع فى نقطة معينة ومن ثم بتحول الى حلازون لان شوارعهم رينج رودز وانا ارى هذا الاكروبات من الشباك وكنت مرعوبة ومن كتر الخوف أبتديت اعرق جامد لدرجة انى خفت لانى لوحدى لكن سبحان الله ركزت فى الاشجار يمينا وايسارا وفى حلاوتها ورغم أنى كنت أشعر أن اللعبة لو سقطت من على الكوبرى حاموت فى ساعتها بس كنت مبسوطة أزاى معرفش –
الحمدلله وصلت المول وكان اسمه (مش ممكن حأكتبه بالعربى لانى مش حأعرف)
Bukut Bintang – Sungai Wang Plaza
وده عبارة عن 2 مول جوة بعض لكن كل مول له الستايل بتاعه طيب تعرف ده من ده أزاى من علامات فى الارض زى كده علامات مستشفى عين شمس التخصصى الزرقاء والحمراء مع الفارق الشنيع وربنا ما يخلى اى حد يهوب ناحيتها أبدا يارب - وفى المول بقى تعرف أن كوالالامبور فيها جنسيات كتيرة وليس فقط ماليز ومنهم البنجابين وستاتهم مميزة من ملبسهم البنجابى وهوالبلوزة الطويلة والبنطلون ونظرا لعشقهم للالوان كمية الالوان بقى حاجة كده فوق الفظيع (ساعات الالوان زاعقة خالص بس أذواق) اما الماليزين شكلهم باين واكيد انتوا عارفين شكلهم من مصر لكثرتهم فى بلدناأما الصينين والهنود فأعدادهم كثيرة والصينين تعرفهم فورا اكيد من الشكل وطريقة الكلام المسرسع على وتيرة واحدة والهنود تعرفهم من ريحة الكارى – كنت أحمل لستة بطلبات مش لى لكن لاصحابى لما عرفوا أنى جاية هنا فكنت عايزة أخلص واشترى لهم الطلبات وبعدين اشوف ايه الى ممكن أجيبه للاولاد كانت ساعتها موضة البلاى ستشين 2 والكاميرا الديجتال والدى فى دى وماليزيا مشهورة بالحاجات الالكترونية لكنى لم احضر أى من هذه الاشياء مع ان مجموعتى كانت تسخر من كاميرتى العادية وأنا أصورهم ويقولوا لى ازاى تبقى فى أى تى - ومعندكيش كاميرا ديجتال حاسسونى أنى جاية من كفر ابو طشت بس انا برضة ماجبتش حاجة من دول لانهم ساعتها حتى وهم بسعر رخيص بالمقارنة فى مصر كانوا غاليين على وديه حاجة خاصة بى المهم المول ده حجمه 10 اضعاف سيتى ستارز (بدون مبالغة) وكان كله مذدان للكريسماس الذى أقترب - أشجار الكريسماس متذوقة ومافيش واحدة زى التانية كل دور له شجرة مميزة السلع هناك أمارخيصة جدا أو غالية جدا لكن ليس كل رخيص حلو تجولت فى المول حوالى 3 ساعات بتفرج لانبهارى بالجمال فى طريقةالعرض وخصوصاوأنت ماشى لايوجد من يذن حتى تدخل عنده المحل لا وبالرغم ان معظم البائعين لا يعرفون الانجليزية ولايتحدثونها لكن يقف معاك ويساعدك دون كلل او ملل ويحاول يفهمك بقدر الامكان حتى لو أحثت أنقلاب فى المحل ولم تشترى اى شىء- التسوق هناك متعة ليس لها حدودوان لم تبتاع شيئا التجول والفرجة متعة فى حد ذاتها - أكلت فى ماكدونلدز حيث انه مخصص لنا وجبة واحدة مع الافطار على حساب الشركة وهى كانت الغدا (فاكرينوه) وخلصت واستعديت للبحث عن تاكس طلعت خارج المول وافتكرت أنى أقف كده وأهلل على التاكسى وممكن يبقى فيه واحد واقف قبلى مستنى بس مش مشكلة لكن ده مش موجود على الاطلاق فى أى بلد غير فى بلد >ام هاناص >التاكسى له مكان أنتظار (تستناه فيه)والتاكسى ملزوم يقف فى المكان ده يأخد الراكب ويسأله رايح فين (بعد ما يركب مش قبل) من غير ما يقول لا ديه مش سكتى أو ياخد اكتر من حقه لان فيه عداد - كان أمامى 10 بس وقفت والدنيا أمطرت بس أيضا وقفت وناس وقفت ورايا- وصلت دورى الحمدلله قبل ما أغرق وركبت التاكسى وقلت له أسم الاوتيل ووصلنى بدون كلام (ولا رغى فى الى مالوش فيه) ووصلت الاوتيل ودخلت من باب تانى لان التاكسى ممنوع يقف عند الباب الى احنا بنخرج منه ولقيت على مدخل الباب ده شجرة كريسماس ضخمة وطويلة بدرجة خيالية عمرى ما شفتها فى أى فيلم من الافلام الاجنبية حتى الى بيبقى فيها أوتيل ومتزينة بشرايط موف وورد موف مش عارفة حاطينه أزاى وفى الخطوة التانية لقيت مديرى والمجموعة بتاعتى واقفين واول ما شافونى سالونى كنتى فين ؟؟؟ فى سرى قلت هو أنا المفروض اقول تقرير عن تحركاتى خصوصا أن ورشة العمل بتاعتنا بكرة والنهاردة ماكانش فيه حاجة لنا من الساعة 1 ونصف وخفت كمان احسن مديرى يسالنى هاه وزعتى الاوراق او قلت يمكن قلقوا على لقيتهم بيقولوا لى أحنا مستنينك علشان نروح نأكل فى ستيك هاوس ! بس للاسف أنا كنت شبعانة وكمان ميتة من التعب ومقدرش أمشى تانى قلت لهم معلش بكرة أن شاء الله بعد ما نرجع من >شينا تاون< وأن شاء الله اكملكم اليوم التالت قريب