أنا فيه صوت كل ما بأسمعه بيركبنى العصبى ومهما أوصف لكم الصوت ده بيعمل لى ايه مش حأعرف أوصفلكم والا وهو "صوت الست أو البنت وهى بتطرقع اللبان (المستيكة) (العلكة) وياسلام بقى لو كانت كذا طرقعة ورا بعض(تيك تيك تيك) >نفسى أعرف المقدرة الفذة ديه أزاى> شكل العصبى عندى بيبقى شكله أيه ولوكنت راكبة مينى باص وأنا رايحة أى مشوار وحظى العاثر خلى واحدة بتطرقع اللبان جانبى بيبقى مأساة حياتها أنها قعدت جنبى لان أنا مش حأقوم من جنبها علشان الصوت ببساطة لانى مصدقت لقيت مكان فى المينى باص وبالضبط عند الطرقعة الثانية بكل أدب بأقولها ممكن من فضلك ترمى اللبانة وكل مرة الست أو البنت بترميها فورا عارفين ليه لانهم بيفتكرونى مجنونة (من نظرة الرعب الى فى عينيهم) وبيخافوا منى (الى بيركب مينى باص أو أوتوبيس حيبقى عارف أن ساعات بيبقى فيهم مجانين ياما ومن كل شكل والى مش بيركب مواصلات أهه عرف) وانا من مكانى هذا بسألكوا هل أنا مجنونة لمجرد أنه يركبنى العصبى من لبانة - لو أه يبقى حلو جدا كده أنا ضمنت أنى ما أتهورش فى المواصلات مع كل صوت طرقعة وأرمى الى بتطرقع من الشباك الى جانبها أما لو قلتوا أنى مش مجنونة وأنه ده فعلا صوت بشع من فضلكم أبوس أيديكم ماتقولوش للى بيطرقعوا لحسن هم الى يطرقعولى بالشبشب فى المينى باص
"قلمى"
لا متخافيش والله انتي مش مجنونة علشان لو كده يبقوا زادوا واحدة .ألا وهي أنا
ردحذفتعرفي مرة كنت باعمل علاج طبيعي وبياخد وقت و الممرضة اللي كانت بتعملي حصل لها طاريء ما وتغيبت
دخلت شابة كنت باسمع صوت طرقعة اللبانه بنتاعتها على بعد غرفتين وكان بيجيلي عصبي على بسيط
ولما دخات الشابه عليا ووشها مبتسم واللبانه شغالة يا طرقعه بصيت لها و سألتها : فين الدكتورة؟
قالتلي : فيه حاجه يا مدام؟
قلتلها عايزة الدكتورة إذا سمحتي
وفعلا جت الدكتورة وقلتلها بصي حضرتك انا عاقلة وست الستات بس بعض الأصوات بيوترني وممكن الطش للي قدامي يعني صوت الحنفيه ...صوت تكتة الساعات بتاعة الحائط ( محدش يقول لزوجي واللأولاد ايه اللي بيخفي بطارية ساعة الحائط كل فترة ) وكمان صوت اللبان ...يعني حضرتك يا تغيري الأنسه دي منعا للأحراج والتلطيش يا حيحصل ما لايحمد عقباه
وبما ان عيب نقول للأنسه سبب انهياري العصبي يبقى الأحسن أمشي على اساس الممرضة بتاعتي مش هنا واعمل الجلسه مرة تانيه
بس ياريت حضرتك يعني تنوهي عن موضوع التيك تاك داه أرجوكي .....بجد شيء صعب لا يصدكه عكل على رأي الست شويكار في فيلم شنبو في المصيدة
أنا قرأت أسم جروب على الفيس بوك كان بيطلع لى فى كل حتة تقريبا مستيكة مش لبان حأدور عليه واقولهم يمكن يساعدونا علشان نترحم شوية من الصوت ده أن برضة صوت تنقيط الحنفية بيجننى وياسلام لو سمعتيه وأنت نايمى بليل على الطبق الى أنت ماغسلتيهوش وسيبتيه للصبح مزييييييييييييييييييكا ومرسى على كل تعليقاتك
ردحذفحبيبتى منى اه والله حبيتك فى الله جدا
ردحذفوحبيبتى واختى فى الانسانية كمان
يا نهار ابيض انتى عسل جدا لا احب اطمنك انك مش سايكو
انا بقى وجوزى نشترك فى العصبية لما واحد يكون بيقزقز لب فى المواصلات اه والله فى ناس قبل ما يطلع الميكروباس
يكون مجهز كيس اللب وتسمعى احلى سيمفونيات بقى
يا خراشى بحس ان فى نرفزة غير عادية حصلتلى
وانا وجوزى نقعد نبص لبعض كاننا بنصبر بعض ونتكلم بلغة العيون (خلاص هانت فاضل عشر دقائق وننزل) واول ما ننزل نقول ناس معندهاش دم استغفر الله العظيم