كلام أغانى

1-ياريتنى طير وأنا أطير حواليك مطرح مطروح عيونى عليك ياترى فريد الاطرش كان عنده فكرة أن الطير هو الدبان بلغة الناس الى فى الارياف وكان قاصدها

2-يابتاع النعناع يامنعنع يابتاع النعناع ياواد أنت – حد فاكر الاغنية ديه؟؟ تفتكروا لايقة على مين اليومين دول

3-تامر حسنى مصطلح يندرج تحت بند المعاميع الى أنا مش فاهمه وأكيد حتطلع حاجة كده مالهاش طعم

4-على يا أبن عمى ياعلى يلى بتجرى فى دمى – دلوقت بس لما ركزت فى الكلمات عرفت ليه هى بتجرى طول الاغنية على السلالم وفى كل حتة لغاية لما خايلتنى والنبى يا سى على تهمد وتبطل جرى

5-الصحفى الى زعلان أن زينة بتغنى أغنية وطنية وخايف تتذاع بعد كده وراء كل مباراة هو قال كده لما بس شاف الاعلان بتاعها امال لو كان شاف حسين الامام وهو بيقولها هزة يمين وهزة شمال (وهو ماسك وسطها) وبيعلمها الاغنية الوطنية وكمان بيقول صدر يمين وصدر شمال كان أكيد حيجيلوا هارت أتاك (أصل أنا بقى شفت الفلم مش بس الاعلان)

6- حبولاء (الكلمة الى بيقلها هنيدى فى مسرحية عفرتو) انا بابقى حبولاء برضة لما بأشوف مروة وأروى وبابقى نفسى أقولهم يرحلوا الى المريخ مع أختهم صوفيا المريخ سكان الارض مش ناقصين

7- ماشى وسايبلك علامة فى حياتك حتفضل فاكرنى لاخر حياتك أكيد عمرو مصطفى علملها بالبشلة

8- I wanna take u to the candy shop- ناس حاطها رنة موبيل - يامصيبتى لو كانوا عارفين معناها!

9- محدش لسة فسرلى معنى كلمة حتنحطر بتاعة أمينة بتاعة الحنطور

10- الدنيا خربانة - هى كانت ناقصاك أنت كمان

وطبعا حتسالونى طيب لما أنا متضايقة أوى كده من الاغانى وأزاى اصلا بأسمعها فى السن ده أحب أقولكم مصدر الاغانى من اللاب توب بتاع أبنى الصغير 19 سنة والكمبيوتر بتاع الكبير20 سنة وقناة ميلودى الى بيشوفها جوزى والى مش حأقولكم عنده كام سنة و3 حاجات دول شغالين 24 ساعة ماعدا فى أوقات الصلوات ودلوقت أسيبكم علشان أسمع أغنية الست لما لما !!!!!!!!!!

"قلمى"