السخرية الخامسة - لوجيستيكى
لما أتقبض على تنظيم حزب الله فى مصر الشيخ حسن نصر الله طلع علينا فى التليفزيون وقال بكل أياما (من قيم) أنه سامى يتنمى للحزب وأنه ذلك فخر له (كأنه فى الصالون بتاع جارتنا وجاى يخطبله بنتها فيقوم بالتعريف به-بسامى- أه نسيت اقول أن سامى هو رئيس التنظيم) أما ما كان يؤديه (سامى) فى مصر فهو عمل لوجيستيكى (قالها بكل شياكة) وسألت نفسى ياترى المصريين الى مش عارفين أيه هى القرية الذكية حيعرفوا >لو جى س تي كى< أمت (أى قامت) جارتى ميلت على وسألتنى فى نفس اللحظة لو جى س تى كى (قالتها بنفس الالاطة برضة) أنجليزى ده يا مرسى ؟؟؟!!!! وبالمناسبة الى عايز يعرف معنى القرية الذكية يتابع أحداث فيلم كده رضا لاحمد حلمى -
على فكرة ده مش كلام فى السياسة مش علشان أنا مش بفهم أو بأخاف (لآ سمح الله) لا أصل السياسة اليومين دول زى الابداع كده لاتكيل بالبذنجان (راجع السخرية الثانية) أنا بس عاجبنى >لو جى س تى كى< جدا - أكتيـــــــــــــــــــــر مهضومة! (على رأى اللبنانين)
السخرية السادسة - ألو
النهاردة فى برنامجنا حنناقش الفكرة المطروحة من فلان فى مجلس الشعب عن ضرورة اذاعة حكم الاعدام (على التسعة الى خدوا أعدام علشان أغتصبوا سيدة)
المذيعة جابت الرجل المقترح و2 لهم اراء مضادة (يعنى 2 على 1) وكمان كان واضح طول الحلقة ان المذيعة مش عاجبها الاقتراح يعنى(3 على 1) مش حتكلم على الرجل الى كان مهذب جدا طول الحلقة ولم ينفعل أبدا ولا على 2 ضيوف الى كانوا متشنجين طول الوقت وكل ماتيجى مداخلة تليفونية الو وتكون مع الاقتراح يفضلوا يتريقوا (حتى بتعبيرات الوش) ولاعلى لما جت مداخلة ألو "أنا مع أذاعة الاعدام ما الناس بتتفرج على افلام رعب كتير" !! (معلش فوتوا ديه علشان الى جاى أحلى) فالمذيعة ردت عليها بكل تأثير وقالت بس ده تمثيل وأحنا بنتكلم عن ناس حقيقين (تقصد المغتصبون) وده ممكن يولد العنف والغضب فى نفوس المشاهدين!!!!!!! مش حأدعى أنى مثقفة واقول أن أفلام الرعب هى من أحدى مؤاثرات أرتفاع الاثارة الى بتؤدى الى أمراض نفسية وعنف وجرائم علشان مش هو ده الموضوع أنما المفاجأة أن الرجل المهذب على أخر مداخلة قال بكل هدوء أنا لم اقترح الاعدام علانية يعنى فى الاذاعة والتليفزيون أنما كان قصدى علانية يعنى يبقى فيه شهود عيان على واقعة الاعدام وحصلى ذهول وأنبعاج فى دماغى ومسكت الريموت وحولت القناة بسرعة قبل ما افكر أكلمهم وأصرخ
" ألـــــــــــــــــووووووووووووووو هو السؤال كان أيه يا بعدة؟؟؟؟
السخرية السابعة -رولا جبريل
من كام شهر فى حلقة البيت بيتك لمحمود سعد قال أنه حيستضيف مذيعة مشهورة جدا فى أيطالياهى فلسطينية وبقالها حوالى 17 سنة عايشة هناك ومعها الجنسية أنا بصراحة كنت حأغير المحطة علشان مكنتش فى موود الرغى وكان أول مرة اسمع عن الست ديه راحت الست ديه باينة فى الكادر بتاع التليفزيون أكيد الرجالة الى شافوا الحلقة ديه قالوا عليها صاروخ أول ما دخلت (وأكيد محمود سعد كمان) والستات لازم يكونوا على الاقل أتفرجوا على رشاقتها وفستانها الابيض البسيط الى كل شوية تعدل الجاكتة بتاعته علشان كانت حاطها على كتفها مش لابسها (الفستان من غير كمام بس أخر شياكة) والله حاجة كده تشرح القلب مش علشان شكلها لا أول ما أتكلمت أنا قلت ديه طبعا لسانها حيكون ملووووء وتتكلم عربى (فلسطينى) بطليانى بس لا الكلام طلع فلسطينى 100% مافيهوش غلطة كأنها لسة جاية من القدس وماغلطتش وقالت أى كلمة أيطالى أنا بجد قعدت أتفرجت على اسلوبها فى الحوار والكلام وأنا متنحة ومكنتش عايزة الحلقة نخلص علشان اسمعها واشوف ثقتها فى نفسها كبرياء فى منتهى التواضع وأفتكرت كم مذيعة من بتوعنا وغيرهم زى منى الشاذلى الى على الاقل تغلط مرتين فى كل حلقة وهى بتتكلم مصرى (مع أنها أكثر المذيعات فى مصر ثقافة) ولا أنجى على الى ضيوفها يبقوا مصريين وهى تسالهم بالانجليزى (البرنامج مصرى) الملوووء بتاع كل بنت عايزة تورى انها واو فى الانجليزى ولا رزان اللبنانية أيام ما كانت بتقدم المنوعات الاجبنية وتقول فى وسط البرنامج بدون أى مناسبة هاى جدو(جدها هى) تسلملى أن شاءالله حج مبرور! وشافكى المنيرى وهى بتبص لكل واحد وكأنها هى من عالم وهو من عالم تانى بطريقة محمد صبحى فى المسرحية لما يقول بفلوسى ياكلاب (أفتكر دلوقت أترقت وبقت رئيسة واحدة من القنوات فياريت تبطل تعمل برامج) على فكرة رولا جبريل مش مذيعة منوعات ولا برامج ترفيهية لكن طلعت محاورة بتقدم برامج سياسية وضيوفها من العيار التقيييييييييييييل أوى ونسيت أقولكم أنها ماكنتش حاطة مكياج (ركزوا فى وشوش المذيعات بتوعنا) وبجد تسلميلى يارولا فخر للمرأة الفلسطينية والعربية وياريت وأنتى معدية على القدس تيجى مصر تانى ومعاكى شوية محاضرات فى الالقاء والتخاطب واللغة العربية وبالمرة شوية زعتر
السخرية الثامنة - (وعجبى)
بيقولك (للستات) لازم تسمى قبل ما تحطى العطر ( يعنى البارفان أو الكولونيا أو الكالونيا الى يريحك) ونعم بالله ما أحنا طبعا بنسمى قبل ما نعمل اى حاجة بس تفتكروا نسمى ليه قبل مانحط العطر؟؟؟!!!
اصل أنتن (حلوة نون النسوة ديه) طبعا عارفين أن الجن ممكن يفتن بزينة المرأة ويستغل أى فرصة للتلبس بها فايه رأيكن (برضة نون النسوة) انه ممكن يخش لها فى زجاجة عطر علشان يلبسها (يامـــــــــــا)!!! والنعمة ديه على عينيا (حلفان لزوم الهرتلة) أن ده كلام وصلنى على الايميل الى هو البريد الالكترونى أحسن تكون كلمة ايميل والعياذ بالله من الموبيقات وأنا قررت الانضمام لحزب الفتاوى وديه لسة طلعة طازة بنار الفرن بس مش عارفة أطلع اقولها فى اى قناة فضائية - وأبقى سلميلى على كالفن كلاين ودافيدوف وخليه يديكى واحد جنى صغنطط هدية بدل ما تتعبيه ويتحشر فى القزازة وينطلك لما تفتحيها
السخرية التاسعة (سؤال برىء)
حأركب الحنطور وأتحنطر - هويعنى ايه أتحنطر؟؟؟
السخرية العشرة: المعجم الغير فصيح
يدوس=مش معناها بالجزمة على الارض
الصاروخ = مش بالضروى الامريكى الى بيضرب العراق
نفض= مش تنفيض السجادة
حلقله =مش معناها أنه جه من عند الحلاق
عنب= مش معناها الفاكهة
موزة=برضة مش معناها فاكهة
قصر (تنطق اصر)=مش تقصير ذيل الفستان أو البنطلون عند الترزى
روش من الروشانة= مش معناها مخبول
طحن=مش يعنى طحن الحبوب
صابنه أو ادله صابونة\غسله= مش معناها تصبين الصحون أو غسل الملابس
ليفه=مش معناها بالليفة فى الحمام
فحت= مش الفحت الى فى الشارع
"قلمى"
لا وكمان فى( تييت)اللى هى مش زمارة دى حاجة كده المفروض انها بدل الشتيمة
ردحذففعلا كلام غريب جدا
والله يرحم نهارك سعيد وشكرا واسف
ويرحم الاحترام والاخلاق والاصول