الخميس، نوفمبر 26، 2009

وطلعنا مرفهين!!!! (تعديل لزم التنويه)

كعادتى كل صباح أشترى الجريدة وأقرأ بعض العناوين ومقالاتى المفضلة على الريق فى السيارة حتى لا أصاب بسكتة قلبية أودماغية من جراء ما يحدث حولى فى زحام طريق الى العمل 
ولى عادة لا أستطيع التخلص منها وهى أننى أقرأ الجرائد والمجالات من الصفحة الاخيرة للاولى ولاأعرف لهذا سرا ولاأستطيع تغييره واليوم لحظى السعيد قرأت الجريدة من الصفحة الاولى
مع صوت كلاكس التريلة العنوان الاول: الصحة العالمية : لا يمكن توفير مصل أنفلونزا الخنازير لجميع المصريين
شتيمة تحملها الرياح عبر النافذة العنوان الثانى: بمناسبة عيد الاضحى "الدقهلية" توزع أرز منتهى الصلاحية على الفقراء
ولاتأخذكم الظنون بأننى سأقوم بالتعليق على هذين الخبرين لكنى أسوق لكم خبر أكثر لطفا ومرحا بمناسبة العيد وأجازة المدارس 10 أيام (أصل هى المدارس ماشية بذمة وضمير ومحتاجين أجازة يرتاحوا) وهو كالاتى:
أن تراكم القمامة فى الشوارع دليل على «الرفاهية»، وزيادة معدلات التنمية فى المجتمع، وزيادة أعداد السيارات فى الشوارع وارتفاع القدرة الشرائية لسكان الريف، وتغيير أنماط الاستهلاك
أما قائل هذه العبارة الواردة فى خبر فى جريدة المصرى اليوم بتاريخ الثلاثاء 24 نوفمبر فهو فريد هذا الزمان السيد النائب أحمد عز رئيس لجنة الخطة والموازنة (أعرف الخطة لكن ماهى الموازنة؟؟ الا أن كانت قلب موازيننا نحن الشعب)
وقال عز إن الحكومة تحتاج إلى ١.٥ مليار جنيه بشكل عاجل للقضاء على ظاهرة تراكم القمامة وطالب باقتطاع هذا المبلغ من الدعم المقرر إضافته للموازنة، ويقدر بـ ١٠ مليارات جنيه (لو قام بتوزيع نصف مليار فقط على الشباب العاطل سيقومون بتنظيف الشوارع وستبرق ذهبا)
ولكنى لاأعتقد أن السيد أحمد عز فى حاجة الى أقتطاع هذا المبلغ من الدعم فبالاشارة والاحاطة والدوران (الى على ناحية الشمال) للخبرين المنشورين النهارده (وياعالم بكرة لسة حيكون فيه أيه) لمن فى نظره سيذهب الدعم أصلا أن كان الشعب يقف منتظرا صك الموت والصك عليه هدية وهو أنه يمكنك أختيار وسيلة الموت المحبب اليك ياترى أشتريت صكك النهاردة وتحب تموت بأيه (يمكنك شراء الجريدة وتتابع باقى العناوين لاختيار مايناسبك من وسائل)
ولو عندكم أعتراض أذهبوا بشكواكم للفيفا وخليها كمان تديكوا باسكت زبالة ملون كده ومدندش زينة على باب البيت أو الحارة لزيادة فى الرفاهية أه يامرفهين يامنعمين فى تغيير أنماطكم الاستهلاكية وأرتفاع القدرة الشرائية بأمارة تذكركم مؤخرا أن البلد لها علم لونه أحمر\ابيض\أسود وياترى ايه الرسمة الى فى النصف ؟؟؟ بس سبوبة جامدة مش كده !!!!
ولو سألتك أنت مصرى – أنا مصرى وأبويا مصرى وكل مصرى فاضله زلطة ويطلع برة بس من غير كارت أحمر
وكل سنة والدعم طيب والى بالى بالك يعيشون مرفهون بجانب وأمام أكوام القمامة وأخرون مسربلون فى اثواب من التخلف كمان وكمان
وتعيش مصر حرة مستقلة؟؟؟ أزاى معرفش
قلمى

بعد كتابة البوست قرأت ذلك الخبر لذا لزم التنويه الا أن هذا لاينفى أنه لايزال فريد عصره وأوانه
http://www.almasry-alyoum.com/article2.aspx?ArticleID=234537&IssueID=1600

هناك 10 تعليقات:

  1. عشان كده أنا أحب أقرأ الأخبار في المساء عشان ما تندسش نفسي ..

    كل عام وانت بخير

    ردحذف
  2. كنت اعلم قبل قراءة هذا البوست كثيرا من معايير تقدم الامم مثل انخفاض معدل وفيات الاطفال وانخفاض نسبة الا مية ومعدل استهلاك الكهرباء ومدى الاهتمام بذوي الاحتياجات الخاصة وغيرها وغيرها
    الا انني سعيد ان اعرف ان هناك معيارا جديدا وهو كمية القمامة في الشوارع وسر سعادتي اننا بذلك قد اصبحنا اكثر دول العالم تقدما

    كل عام وانتي بخير

    ردحذف
  3. غير معرف26/11/09 4:27 م

    نحن مرفهين دون ان نعلم
    و شكرا احمد عز
    يارب يزيد الرفاهية حوالين بيته

    ردحذف
  4. يا منمن حد يقرا الجرائد ويقول أقرأها كي لا أصاب بأزمة قلبية من حركة السير؟؟؟؟؟؟؟؟؟ انا الجرائد بقت تجيب لي استبحسسسسسسسسسسس..

    عيدك وردي

    ردحذف
  5. شر البليه مايضحك
    كل سنه وانتى بالف خير
    وربنا يجعل الاعياد الجايه ارحم من دى وكمان لايكون هناك اقتطاع ولابتاع

    ردحذف
  6. ودا كان سبب انى بطلت اقرأ جرايد:))
    كل سنه وانتى بالف خير

    ردحذف
  7. الى منى
    اولا كل سنه وانتى طيبه ثانيا انا حاخد من اللى انتى كاتباه موضوع القمامه واقولك اننى بصدد اعداد مشروع قومى للتخلص من القمامة - دا بجد فعلا مش هزار - بس المهم ان المسئولين يقبلوه ليه بقى لانى فى المشروع قلبت الأيه وعكست عقارب الساعة - طبعا حتقولى انى اتجننت - بس لستنى لما اكمل معالمه وحنشره وصدقينى ساعتها حتعرفى معنى اللى قولته
    ومرة نانية كل سنه وانتى طيبه

    ردحذف
  8. الجرائد تصيب بالإكتئاب والأخبار فى التليفزيون كذلك
    طب نقاطعهم

    بعيداً عنهم
    كل سنة وأنتِ بخير

    ردحذف
  9. غير معرف30/11/09 6:47 م

    أولاً أشكرك على متابعة الموضوع وأقول صدقاً أني كنت متابع للنشرة المعادة لمختصر نقاشات جلسات مجلس الشعب يومها وبالفعل لم يقل عز تلك الكلمة
    ومشكورة المصري اليوم بمتابعتها المحترمة للموضوع

    ردحذف
  10. يا حوبي
    هيقتطعوا ايه من ايه دى الحكاية ماشية بالعافية
    وبعدين هما مش كانوا بيصدروا الزبالة دى ولامؤاخذة ماهو من ضمن الخيبة يا اختى ناس تعمل ريسايكل وتتبغدد على قفانا
    شوفت برنامج اسمه صناعات عملاقة تقريبا هو على ناشيونال جوغرافيك ابو ظبى المهم جابلك مصانع ريسايكل فى البرازيل حاجة وهمية والله العظيم مبيرموش حاجة حتى علب اللبن والعصير اللى بتبقى طبقات ورق وبلاستيك والمونيوم دى بيفصلوا الالمونيوم عن الورق عن البلاستيك او بيضغطوا اكوام منها ويعملوا اسقف بيوت وفرش سيارات وطبعا كل ده بيتغسل ويتعقم ويتعالج كيميائيا واللا الاستنلستيل اللى بيطلعوا من المخلفات دى يااااه
    احنا فين بقى م الهلومة دى

    زرت الرابط ولقيت الرجل مكانش قصده خالص احنا بس اللى نيتنا وحشة هو علشان اسمه عز يعنى نشك فى اخلاصه هههههههههه

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))