الخميس، نوفمبر 19، 2009

ياشماتة أبلة ظاظا فينا!!!!

طبعا لايمكن بأى حال من الاحوال أن أتحدث عن ماتش الكورة ولا الزلزال الى كان قبله ولا عن توابعه المؤسفة بعد الماتش لأن الحمدلله تحدث الجميع وحتى على الفيس بوك تم بسلام تدشين جروب تحت عنوان أكره الجزائر (على وزن أنا بكره أسرائيل) وكمان ماشاءالله أبدع الجميع فى تعليقات تتسم بروح شتائمية ذات العيار الثقيل دون مراعاة للياقة والادب والشتائم طالت الجميع بمناسبة وبدون مناسبة وطبعا لم تخلو أى مدونة من بوستس على وتر أما دينى أو وطنى والروح القومية العربية والاخوة والعروبة والوتر الجنائزى أيضا -


لذا قررت الا أكتب المزيد وأكبر دماغى وأشترى وأنا راجعة من الشغل واحدة زبادى بيتى بتارت الفراولة طعمها أختراع تخلينى أنسى مرارة مايحدث حولى من هرتلة ليس لها أول ولا أخر ومع كل معلقة أتمتم وأقول أه ياشماتة أبلة ظاظا فينا -
أبلة ظاظا مين؟؟؟ يامهفوفة أنت - لازم الاحداث لحست دماغك
أه تتصورى الناس متعرفش أن أبلة ظاظا ديه هى أسرائيل وأمريكا وأوروبا والدول المتقدمة الذين يبحلقون فى أفعالنا منذ أعلان حرب مصر والجزائر ويقولون أه يا عالم يا غجر(العرب) أبقوا قابلونا لو فلحتوا وخليكوا نايمين ياعالم تالت ونامى ومتخلف وأرهابى يسب ويلعن بل ويقتل فيه المسلم أخاه المسلم لاجل الكورة ويبعزقوا فلوسهم هنا وهناك ثم يدعون الفقر ويطلبون المعونات
وبعد كل هذا تصوتوا وتولولوا وتقولوا عايزين حقنا
بجد ككسر حوقوكوا أه والله ككسر حوقوكم
 ومرة ثانية علشان الحبايب ياشماتة ابلة ظاظا وأهالى المنتيقة المجاورة؟؟؟
بس سيبكم أحنا بتفرق معانا خلينا فى الزبادى الى بطعم تارت الفراولة
قلمى
ملحوظة الزبدياية ب1.65

هناك 18 تعليقًا:

  1. لا املك الا ان اقول حسبنا اللة ونعم الوكيل فلا اروع ولا افوى من ان يكون وكيلنا وحسبنا هو اللة عز وجل

    ردحذف
  2. فعلا يا فرحة الاعادى فينا

    الازمة تتزايد يوم بعد الاخر ولكل فعل رد فعل

    ردحذف
  3. ماما منى
    انتى اديتينى كارت بلانش لما قولتى يابنيتى
    (وش مكسوف)
    انا ماليش اوى فى الكوره لكن اللى بيحصل للمصريين دا كتير بصراحه كتير اوى واحنا اللى عاملين فى نفسنا كدا
    مساكى شيكولاته

    ردحذف
  4. غير معرف20/11/09 1:44 ص

    لكل فعل رد فعل كما يعلق د عرفة
    لكن ليس دائما مسويا له في المقدار بل ممكن يكون أكبر بكثير
    و معظم النار من مستصغر الشرر
    أحسن حاجة ننسى اللى حصل و خلاص

    ردحذف
  5. انا عن نفسى هافرح بشماتة اى حد فينا
    بس نعرف الجزائريين احنا مين
    لأن دا كتير اوى اوى بصراحه

    ردحذف
  6. 165 قرش؟؟ سيبك من أبلة ظاظا بقى و أنا أقول الراجل بتاع السوبرماركت غش في الحساب...طيب لو حبينا نقنن في الأكل نحرم العيال من الزبادي التارت؟؟

    بس هي أبلة ظاظا مين؟؟؟؟


    جاء في البروتوكول الثالث عشر من برتوكولات حكماء صهيون ما نصّه: " ولكي تبقى الجماهير في ضلال لا تدري ما وراءها وما أمامها ولا ما يراد بها، فإنّنا سنعمل على زيادة صرف أذهانها بإنشاء وسائل المباهج والمسلِّيات والألعاب الفكاهيّة وضروب أشكال الرّيـاضـة واللّهو … ثمّ نجعل الصّحف تدعو إلى مبـاريـات فـنــيـة وريـاضيـّة ".[ " بروتوكولات حكماء صهيون "



    تصدقي يا منى عندي صداع وحاسه إنهم ضربوني هناك مع الناس اللي اتضربت ولسه باقول لأم البنات موجوعه في جسمي ولا كإني أتضربت معاهم..ومتقلقيش من ناحية الجروبات عمالين يزيدوا والشتايم على ودنها وحتبقى حرب عالفيس توك بس جاه أخرنا يا منى الفيس توك

    ردحذف
  7. صباح الخير
    احب اقولك يامنى ان التعصب الكروى فى كل الدنيا طيب ححكيلك انى سنه 96 كنت فى انجلترا مأموريه وكان هناك بطوله اوروبا وكان فيه ماتش بين انجلترا وهولندا أوم ايه ؟؟؟ الأنجليز كسبوا 4-1 قام المشجعين الأنجليز كسروا كيدان الترافلجر وحرقوة من الفرحه والسعادة وبعدها كان ماتش تانى بين المانيا وانجلترا أوم ايه برضه ؟؟؟ المانيا بقى هى اللى كسبت 1-0 برضه تم حرق الميدان من المتعصبين الأنجليز وطبعا الأمحليز والألمان على فكرة منتهى الكراهية لبعض
    بس المشكله عندنا اننا بنكرة بعض اه بس برضه بنكرة نفسنا
    عموما اسف للإطاله وعلى راى شعبان بيه عبد الرحيم - بس خلاص

    ردحذف
  8. مين يشمت يا منى فى مباراة زى دى
    مباراة فيها كل شيء مباح من جمهور الجزائر حتى المطاوى والسكاكين
    وازاى هم يفرحوا باللى عملوه
    والله المفروض ينكسفوا من اللى حصل وعدم تحضرهم
    انتى ماشفتيش العلم المصرى المحروق وسيدة راكبة عربية بدوس عليه هى دى الفرحة
    احمدى ربنا على تحضرك وعقلك وإنك أخدتى الخسارة شيء عادى

    ردحذف
  9. طب بذمتك وحياة غلاوة الزبديايية دى (بالهنا والشفا)
    مش اللى حصل ده يفور الدم ويرفع الضغط ويجيب اكتئاب

    ردحذف
  10. انا لازالت عندى رأى لو تذكرونه كون الاخر غير محترم فهذا لايعنى أبدا أن أنساق وراء عدم أحترامه وهمجيته أرفض مافعلوه وأحزن لبهدلة أهل بلدى واهانتهم ولكن أن تتصاعد الامور بهذا الشكل وكأننا نتسعد لحرب ضروس هذا هو التخلف بعينه - ياناس نحن فى شهر ذى الحجة حنقول أيه لربنا لما نقف أمامه ضيعنا صلاح أعمالنا علشان ماتش كورة وبعض من الرعاع الذين لم يراعوا الله

    ردحذف
  11. ماما مازن أمال أنا بقول أيه من الصبح هو أنا أشتريت الزباديية ليه؟؟ :)))

    نو : بعتلك أقولك أبلة ظاظا مين وهى عبارة كانت ترددها رجاء الجداوى فى مسرحية الواد سيد الشغال لعادل أمام طوال المسرحية وكانت أجمل ما فى هذه المسرحية البلهاء لذا أتذكرها جيدا :)) بس أنت أنتى تى فى يا نو ))

    ردحذف
  12. بجد عندك حق

    اكيد فرحانين فينا

    ربنا يهدى الحال

    مع خالص تحياتى

    ردحذف
  13. السلام عليكم

    وانا متفقة معاكى وطبعا انا ذيك زعلانة ودمى محروق للى حصل للمصريين اهل بلدى بس مش معنى كدا نشن حرب

    وحسبى الله ونعم الوكيل

    لعبهم قذر داخل الملعب بعكس الفريق المصرى اللى شرفنا بلعبة وبجد احسن فريق

    ردحذف
  14. أحسن حاجة الواحد يكبر دماغه من موضوع الكورة... و زي ما حضرتك عارفة ما ليش في الكورة بس موضوع الإعتدائات ده مستفز جدا.. غير ان القصة أخدت أبعاد سياسية و حسيت اني باتفرج على فيلم سينمائي و مش مصدق اللي بيحصل...
    و أصدقائي السودانيين - على حد تعبيرهم- ان اليومين بتوع الماتش كانوا كابوس و فيلم رعب.
    الموضوع الحمد لله عدى على خير و أهلنا رجعوا بغض النظر رجعوا ازاي و ننتظر رد فعل الحكومة.. متأكد انهم مش هايعملوا أي حاجة.

    ردحذف
  15. ازيك يا منووون

    عارفة أحلى حاجة في الموضوع اللي حصل ده كله,اني اكتشفت ان الشعب المصري ده اهبل و على نياته أو يمكن طيب زياده عن اللزوم عشان محدش يزعل.
    هم كانو متوقعين حاجة غير كده تحصل في السودان,ده بجد والله نحمد ربنا اننا اتغلبنا مكنش حد رجع.

    انا كمان متفقة معاكي جداً في ان سفالة الآخرين مش مفروض أبدا تخرجنا عن المألوف و أن في طرق كتيرة جداً نأخد بيها حقنا من غير منفرج الناس علينا.

    آآآآآه يا شماتة أبلة ظاظا فينا كلناز

    سلام

    ردحذف
  16. وضحكو ملئ فمهم على مايجري في الجزائر ومصر

    ردحذف
  17. حسبنا الله ونعم الوكيل

    بس ممكن تجبيلى زبادي معاكى المره اللى جايه ههههههههه

    ردحذف
  18. سلامات يا منى
    مش فاهم كده يبقى سعر الزبدياية الواحدة معقول ولا غالى

    أنا عموما بآكل زبادى صناعة البيت و أحط عليها عسل
    و تبقى حاجة آخر جمال
    فى آخر اليوم
    تغسل الهموم
    قبل النوم

    بينى و بينك عندك حق الواحد مش مصدق إن الناس كبرت الموضوع بالشكل ده

    تحياتى

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))