الخميس، مارس 04، 2010

على السريع

 عندى سؤال نفسى أسأله هم المسئولين مش بيمشوا فى شوارع مصر ولا بيروحوا أشغالهم بالهليكوبتر مثلا؟؟ هل يعرف أحد ترعة المريوطية التى فى الهرم الترعة الى فوقها الكوبرى الدائرى الجديد الى يشرح القلب بس ياخسارة الحلو مايكملش
أسفل هذا الكوبرى الجميل المتجه الى شارع الهرم اى بمحاذاة ترعة المريوطية بطولها وعلى جانبيها ردش وردم طين ناشف أكوام أكوام علو دور عمارة وعليها زبالة ومن كتر ما بقالها كتير زرعت ده غير الزبالة الى مرمية فى الترعة بالاضافة الى الرائحة الكريهة أنا بقالى 4 أيام بعدى من هناك وأسأل نفسى نفس السؤال كل يوم هو محدش من المسئولين بيمر فى الشارع ده وللعلم شارع أد الحق لكنه حيوى جدا والادهى من ذلك أنى عرفت أن ده من فترة كبيرة طيب محدش أشتكى محدش عمل حاجة أى حاجة لا خلاص الناس أتعودت على القبح يعنى كل يوم الناس هناك تصحى الصبح تشرب الشاى فى البلكونة على منظر الترعة الحلوة وساعة العصارى بقى ياسلام تتفرج على التاكاتك (جمع تكتك) وهى بتعدى من الكوبرى الصغنن بتاع المشاة وأصلا الكوبرى طوله وعرضه متر فى متر يعنى يا أنت يا التوك توك تعدى للبر التانى وياسلام بقى لو حمار كان معدى والواد جراه ويقولك فيه أى ياعم متسعجل ليه هى الحكومة حتعدى؟؟؟
فعلا الناس فى مصر تعودت على القبح أنا نفسى بس لما تقروا البوست ده روحوا شوفوا الشارع وصوتوا – كان حد من فترة علق عندى وأدانى درس فى الاخلاق أنى بعرض السلبيات وأنى بتريق (رغم أنه مش صح) وأنى لازم أعرض حلول مع السلبيات المصيبة أنى للاسف مش بتريق - أنا حزينة على حال الناس ولان الناس هى مصر مصر مش الحكومة والرئيس مصر هى أنا وأنت وأنتم وأحنا -الناس - الى أتعودت على الارف من غير مبرر نفسى أفهم أيه مبرر سكان هذه المنطقة وازاى ساكتين معرفش هل الحل أنهم ينزلوا يردموا الترعة بنفسهم ولا يلموا جمعية من بعض ويروحوا يأجروا لوادر تشيل الطمى الناشف وتنزح القذارة من الترعة – هى ديه مسئولية مين بالضبط؟؟ وليه حين تم الانتهاء من بناء هذا الكوبرى العظيم سابوا الارف ده تحته.
عارفين بقى الكارثة الاعظم أن مصنع للادوية مشهور جدا فى هذا المكان يزوره يوميا أجانب لان أدارته أجنبية بالذمة يا عالم فى دولة فى الدنيا مصنع أدوية فيها بيطل على ترعة؟؟؟؟
لا بجد سابقين فى كل شىء

قلمى

هناك 7 تعليقات:

  1. والله يامنى بجد انتى اثرتى موضوع فعلا هام جدا لانى شخصيا من اسبوع مشيت فى الطريق دا وكان عندى مشوار فى شارع الهرم انا وصلت من مدينة نصر الى الهرم فى الدائرى فى نص ساعة ومن طريق الترعة دى حوالى ساعتين

    ردحذف
  2. فيه اماكن كثيرة و فى محافظات مختلفة ينطبق عليها تماما ما قلتيه

    لكن اكثر ما اعجبنى هو تعبيرك بأن الناس اتعودت على القبح...صح جدا جدا


    اشكرك على الموضوع

    ردحذف
  3. غير معرف4/3/10 4:50 م

    اعجبتني جملة (البراح بتاعي)
    تسلمي يا عزيزتي

    ردحذف
  4. والله دا حال البلد كلها.....الكل اصبح مصاب بمرض السلبية ...واشهر الجمل المصرية هى ....وانا مالى ...
    انا متأكد ان الكوبرى والترعة دول مش فى طريق حد من الناس المهمة ...والا كان اتضبط

    ردحذف
  5. سيدتي
    خالجني نفس احساسك حين رأيت جبال القمامة تحيط بأحد أبواب هندسة عين شمس وتسائلت كيف يقبل العميد والأساتذة أن يعملوا في مكان محاط بالقمامة
    إنه التعود على القبح وهو أخطر سيدتي من القبح نفسه
    تحياتي

    ردحذف
  6. هي بقى كده واللي مش عاجبه يعمل زيك يكتب وبرضه ..........

    متوجعيش قلبك يا منى ..........

    أنا مش جايه بكرة علشان الحاله عندي جيم والدكتور شاكك إن عندي مرض أديسون والتحاليل حتبين الموضوع .حاحلل بكرة وبعده إن شاء الله ...دعواتك

    ردحذف
  7. نو: أنا قلبى معاكى ودعواتى لك لكن مرض أديسون ده له عدة أعراض وتشخيصه مش بالسهل كده وكمان ده مرض نادر فأن شاءالله التحليل تطلع كويسة - حأكلمك بكرة أن شاءالله وحأطمن عليكى كان نفسى أشوفك بجد معلش خير

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))