الأربعاء، مارس 17، 2010

أنا ومحشى الكرنب

هالنهاردة حبيت أكتب لكم بوست يكون خفيف الظل (أتمنى ذلك) لانه أنا شخصيا عندى حالة من الاكتئاب القاتل
والذى أوحى لى بفكرة هذا البوست أنى سمعت فى الراديو النهارده عن مسابقة بمناسبة عيد الام أن كل واحد يقول أيه أكتر موقف عمله تسبب فى أحراج والدته ولكنها سامحته.
وعلى الفور تذكرت أولادى والعديد والعديد من المواقف المحرجة وأحيانا الصادمة التى وضعونى فيها ومن المواقف الكوميدية التى لا أنساها أبدا هو موقف محرج سببه لى أبنى الصغير منذ عدة سنوات حين كان فى أبتدائى وكنا معزومين عند أهل زوجى على أفطار رمضان وعزومة الافطار عند أهل زوجى تضم العائلة كلها ماشاءالله ومن ضمن الاطباق المقدمة كان هناك طبق محشى كرنب يتوسط المائدة ولانى لا أحب محشى الكرنب وكونى أمرأة عاملة معنديش وقت للمحاشى بصراحة وخصوصا لصنف لا أحبه لذا فقد استمتع زوجى وأولادى بالمحشى الى أنا حرماهم منه وأنتهينا من الافطار وجلس الرجال فى أنتظار الشاى بينما السيدات كن يتعاون فى أعداد الشاى والحلويات وفى رفع الطعام من مائدة الافطار- وكانت صاحبة الدعوة تقوم بتنظيم بقايا بعض الاطعمة فى أطباق أخرى لان كان عندها عزومة أخرى فى اليوم التالى وقامت بلف محشى الكرنب لتضعه فى الثلاجة لليوم التالى وبينما هى فى طريقها لوضعه فى الثلاجة اذا بأبنى المحروس الصغير (دلوقت عنده 20 سنة) يقول لها أحنا بقى حنأخد لفة محشى الكرنب ديه- وما كاد ينطق بهذه العبارة حتى ألتفتت اليه بنت أخت زوجى صاحبة الدعوة طبعا ياحبيبى والله ما يرجع بالهنا والشفا وأنطلقت العبارات التالية من سيدات العائلة - ياحبيبى ما هى ماما مش بتعملكوا محشى - ياحبيبى ياأبنى نفسك فى المحشى والله لأعملك حلة وأبعتها لك - يامنى حرام عليك مش تتعلمى بقى وتعملى للعيال حلة محشى كرنب - وماما منى الى هو أنا تقف كالبلهاء مش عارفة أرد وأنظر الى أبنى بعيون الصقر والجميع يقولون ياشيخة حرام عليك ده عيل - ورجعنا البيت بلفة محشى الكرنب الى الست كانت عاملة حسابها لعزومة بكرة وابنى أكل المحشى مع علقة سخنة من ماما مش ممكن ينساها ومع مرسوم رسمى أن لما يعملوا أيه برضة مش حأطبخ محشى الكرنب فى بيتى
وحتى الان هذه القصة متداولة فى العائلة ولازال أبنى يذكرها ولازلت لا أعد محشى الكرنب أبدا وتصلنى الاعانات منه حتى يومنا هذا ياحرام للعيال الى أمهم الشريرة مش بتطبخ محشى الكرنب!!!
والاعانات كانت تصل أحيانا من مدرسة الكيمياء أيام أولى ثانوى !!!
قلمى

هناك 18 تعليقًا:

  1. تسلمي يا عزيزتي

    ردحذف
  2. هههههههههههههههههه عملتيله عقدة كرنب انتي كده يا منمن......ربي يبعد عنك الإكتئاب ويفرح قلبك دائما و أبدا

    ردحذف
  3. :-)

    موقف محرج طبعا وأنا فعلا صعب عليا الصغير (الكبير دلوقت) ويبقى هنا سؤال يطرح نفسه أرضا: إيه سبب العلاقة المتوترة بينك وبين المحشي؟

    هل للموضوع أية خلفيات ثأرية أو طائفية أو سياسية؟

    :-))

    ردحذف
  4. الا المحشى ..وخصوصا محشى الكرنب ..ده من اهم الاكلات المحببة ليا ...بس اكيد فى اكلات تانية هما بيحبوها ...عوضيهالهم بيها ....
    كل سنة وانتى طيبة ..بمناسبة عيد الام

    ردحذف
  5. والله فتحتي نفسي ع المحشي
    كل سنة وانتي طيبة

    ردحذف
  6. يااااااادى الكسوف
    شوفتى ياأختى العيال
    وعمايلهم:)كشفونا:)
    وبعدين ايه ما تعمليش
    المحشى دى؟:)فيها ايه
    ساعتين ولا اربعة
    تعب يخلصوا فى ربع
    ساعة اكل:)ستات
    اخر زمن:):)

    ردحذف
  7. دا المحشى دا
    بسيط وسهل خالص
    بجد:)اعملى الرز
    بالخلطة بتاعته
    وقطعى فوقيه
    ورق الكرنب
    وسويه :)
    بس خلااااص
    فيها حاجة دى:)

    ردحذف
  8. تدوينة
    لذيذة
    ومغذية:)

    ردحذف
  9. ههههههههه

    مالو المحشى بقى

    تحرمى العيال منة لية

    مع خالص تحياتى

    ردحذف
  10. على فكرة طبعا دلوقتى تقدرى تصومى 3 ايام وتجيبى محشى كرنب جاهز من السوبر ماركت ويادوب على السوا اهى برضه حل وعلى فكرة انا رجعت من الفلبين فجر اليوم

    ردحذف
  11. ههههههه

    طيب وانتى ضميرك مش بيتعبك ؟؟

    فيه ام حنينه فى الدنيا قلبها يطاوعها وتحرم عيالها من المحشي؟؟

    المحشي؟؟؟؟؟؟؟؟؟؟؟؟؟؟؟؟

    دة المحشي دة عامل زي الشيبسي للعيال دلوقتى - لازم منه

    هههههههههههههه

    موضوع وموقف محرج فعلا

    تقبلي تحياتى

    ردحذف
  12. هاهاهاهاهاهاها

    نموت نموت و يحيا الكرنب . انا للأسف ماما
    برضه امرأة عاملة معندهاش وقت للمحشى و انا اصلا فى حالة صراع مستديم مع الميزان بسبب قابليتى الرهيبة للسمنة..البركة فى تيتة ربنا يديها الصحة بتأكلهولى من غير ما اخد بالى ..!!!

    ردحذف
  13. ضحكتونى بجد :)))

    ردحذف
  14. :)
    كل سنة و انتي طيبة :)
    و حاولي تشفي حل في موضوع المحشي :)
    انا لولا اني قاعدة في الكويت ..
    كنت بعتلك ورق عنب و كرنب :)
    ربنا يخليهم لك ..
    و يفرح قلبك بيهم يا ماما منى :)

    ردحذف
  15. سيبك من محشي الكرنب دا حتى بيجيب انتفاخ

    محشي ورق العنب اخباره ايه ... انا شايف انه افضل

    لا يوجد بيت لا يخلو من المواقف دي

    ردحذف
  16. حلوة بجد قصة المحشى دى و فكرتنى باخويا و هو صغير كان فاضحنا كده دايما لدرجة مرة كنا عند جدتى و سعادته طلب منها ساندويتش جمبرى لان الاستاذ و هو صغير ما كانش بياكل غير ماكولات بحرية و طبعا مفترض ان اى حد عنده جمبرى فى البيت فى اى وقت على اعتباره لنشون

    ردحذف
  17. شيماء : ربنا يخليكى

    Tears: ضحكتينى ربنا يخليكم لبعض

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))