الأحد، مارس 28، 2010

على السريع (3)


1- قررت تأليف أغنية أسمها "أمنا الغولة" وسوف أقوم بغنائها تحت أسمى الجديد "بستلة" هذا بمناسبة صدور أول أغنية رعب وهى العووووو وبمناسبة أن الى بيغنى فى الحمام أغانيه بتتعبى فى شرايط (أرجو الرجوع الى شريط أبو الليف الجديد: على فكرة المغنى أسمه كده والله العظيم)- ويا أهل المغنى دماغنا وجعنا دقيقة سكوت لله

2- وأنا فى التأمينات الاجتماعية (للمرة الالف ولسة مخدتش معاشى أدعولى بقالى سنة أى والله والختمة الشريفة) لقيت الموظف بيشخط وينطر:"أنا مش فاضى أنا مشغول" "بستلم البطاقات الجديدة"- سألت الى جنبى الا ياخويا بطاقات أيه ديه قال لى بطاقات الفيزا علشان نقبض المعاش ياحاجة (زغردت فى عبى على التكنولوجيا) قوم يكمل ويقول لى أنا استلمتها من 5 شهور وبأجى اقبض بها! وبيشرحلى وياريته ماشرح بدى الموظف الكارت يحطه فى الماكينة ويسحب كده ويكتب المبلغ ويديهولى – طب أيه؟؟ بجد أيه وألف أيه لزمتهم أيه بقى البطاقات لا بجد طب أيه؟؟؟؟؟؟؟

3- ياترى أيه أمكانية عمل كشف على القوى العقلية للناس الى بتفتى اليومين دول يعنى الى قال الكعبة تتهد وتتبنى بطريقة منعا لاختلاط النساء بالرجال أثناء الطواف ده شخص طبيعى؟؟ فى الكليات العسكرية فيه كشف هيئة قبل القبول وفى الهيئات (الخاصة طبعا) فيه كشف هيئة برضة أسمه أنترفيو قبل القبول فمافيهاش حاجة لما نعمل كشف قبول أسمه الكشف على القوى العقلية لامثال هؤلاء.

4- حأموت وأعرف برنامج التوك شو موسم (5) فى عين العدو واللهم لا حسد – ياترى وصل لسيزون (5) أزاى رغم كمية السماجة والبتاتة والتلامة الى فيه – أن دل على شىء فيدل على خفة دم المشاهدين!!!

5- لايزال كيلو السكر ب5 جنيه وأحنا قاعدين؟؟؟؟ وزعلانين أن اللحمة غليت عموما اللحمة طلع فيها دود زى المش فالافضل أكل المش أوفر وبعدين السكر مضر بالصحة حتى كله سوميات ومش ضرورى كيك وبسبوسة وكده لزوم الريجيم وكمان بلاش الشاى والقهوة لانها منبهات وأحنا لازم ننام ولا ننتبه علشان منفكرش لاننا لو فكرنا حنموت وده المطلوب!!!!

6- بنك مصر بجلالة قدره فى يوم أجازته طلع بيان أن رامى لكح لم يسدد مديونيته ياخسارة الزغاريد!!!!

7- بيقولك كلنا فى وطن واحد ويحيا الهلال مع الصليب وأوعى تقول أن فيه فتنة لأقطع لسانك من لغلوغه تيجى بقى تدخل على حبة منتديات على شوية مدونات وفوقهم سايتس تلاقي كلمة الكفار- الكفار- الكفار- هى ديه مصر القرن الواحد وعشرين ياعبلة!!!

8- على رأى الى قال "ناس لها بخت وناس لها ترتر" وكل واحد يضع العبارة ديه فى القالب الى يريحه القوالب كتيرة ومتوفرة بكل الاحجام

9- زوجة ساركوزى (رئيس فرنسا) ووالده لا يرغبان فى أن يرشح نفسه للرئاسة مرة ثانية ليستريح نانوس عين ماما ياناس تعب ياعينى من فترة رئاسة واحدة واحدة فقط والنبى شوية تعب فى قرطاس وأرميهم من الطائرة بطريقة الرش على الحكام العرب يا سيادة البريزيدون

10- سؤال يلح فى ذهنى من فترة الا هو أيه معنى الوطن؟؟؟

(قلمى)

هناك 18 تعليقًا:

  1. المشكلة ان الكل بيتوجع
    والكل بيشتكي
    والكل ممكن يساعد فى الحل
    لكن مفيش جديد بيحصل
    الظاهر اننا اتعودنا على الشكوي

    تحياتى وتقديري واحترامي

    ردحذف
  2. غير معرف28/3/10 11:17 م

    ما شاء الله تدوينة على السريع لكنها مليئة بالأفكار في كل نقطة تناقشيها

    ردحذف
  3. حلوة اوى التدوينة دى بالذات رقم تسعه بس فعلا كل نقطة تنفع موضوع لوحده

    الوطن هو اللى يديكي حماية و رعاية و كرامةاولا ثم تنتمى اليه لانه حصنك و تشعرى ان عليكى مبادلته العطاء
    تماما مثل الام التى تسهر و تتعب و تربى و تحمى فيحبها الطفل انما لو خلفته و رمته بره الشقه يعانى مش ح يحبها و لا ح يشعر بالانتماء لها

    ردحذف
  4. على السريع

    إيمان الطوخي زمان كانت بتعمل برناج اطفال و كان فيه كتكوت او بطه ( شخصية عرايس والا عرسان مش عارفه بيقولوا عنها إيه. ) المهم كانت بتسأل إيمان الطوخي : يعني غيه كلمة وطن ...أعتقد الحل معاها ........وطن يعني مصر ومصر متغربة بسببنا ومقهورة ومفروسه ومتغاظه ونفسها تقول : الله يسامحني يوم ما خلفتكم....تحياتي

    ردحذف
  5. حازم: الكل بيشتكى مش من الفراغ لكن ساعات أنت مش بيكون فى أيدك الحل على الاطلاق ولا تعرف كيف تصل له للاسف

    سونيتى : جزاكى الله كل خير

    Tears: أوافق على التعريف ونمرة 9 عجبانى أنا كمان :))

    نو: كان أسمها كوكى كاك (كانت بطة فى حجم كينج كونج معرفش أزاى العيال ممكن تصدق ان فيه بطة بالحجم ده؟؟
    بس مصر مفروسة مننا مين بالضبط أهلها ولا المسئولين عنها ولا الاثنين؟؟؟

    ردحذف
  6. الوطن هو المكان الذي تبحث دائما عن مفر منه لان كل ما فيه لا يروق لك

    ولان كل ما فيه تراه خطأ وعندما تحين لحظة الفرار وتتغيب عنه لعام

    يعاودك الحنين لذلك المكان اللي طلعت فيه عينك

    ردحذف
  7. الاتنين يا منمن ...زعلانه من الاتنين من بطش ناس وسلبية ناس ..............

    ردحذف
  8. الوطن هو مكان ترضى ان تضحى بحياتك لاجله

    الوطن هو مكان تتشرف بانتماءك اليه

    هل لاحدكم وطن؟


    تحياتى

    ردحذف
  9. غير معرف1/4/10 12:50 ص

    السلام عليكِ مدام منى

    هعلق على نقطة واحدة بالنسبة للموظفين وعملية التوثيق بالرغم من وجود كارت ممغنط
    أتصور أن هذا السلوك لن يدوم وأنه يتم على صورة تجريبية ومع نهاية هذا العام سيتم البدء بصورة رسمية وكاملة ليصبح صرف المعاش من خلال ماكينات الصرف المنتشرة للبنوك التي سيتم التعاقد معها لصرف المعاش .. هذا حسب ظني ورؤيتي
    أتصور أن الموظف أو قائد العمل ينقصه تدريب وثقة في تطبيق التكنولوجيا الحديثة وثقة في التعامل معها حتى لو كانت بسيطة

    ربما مع الوقت تنضج التجربة

    ردحذف
  10. فاروق بن النيل ....
    على فكرة علقت على موضوعين بمدونتك الإنجليزية التى هجرتيها منذ خمس أيام "My Dream" &" Flying Without Wings"
    1- أبو الليف إن شالله تعيش ويقطعك سيف
    2-دافيه بطاقةرقم قومى للتموين جديدة
    3- مافيش داعى للكشف لحسن ندخل كلنا مستشفى المجانين .
    4-لأه ذوق المستمعين بقى ليف وحاحا ولمبى
    5-اللحمةالمهرمنة 90 جنيه واللحمة المدودة ثلاثين جنيه يابلاش.
    6-هكذا اللى يسرق يسيبوه واللى يبنى شقه لولاده يحبسوه وعجبى .
    7- ماهو الفاضى يعمل قاضى مالاقوش حاجة يسلوا الناس بيها ويشغلوها للى ناويين يعملوه فيناغيرالوحدة الوطنية
    8-الترتر زمان يعملوه بمنديل الرأس للبنت الفقيرة تتعايق بيه والبخت هو تفتحى الشوكلاته وتشوفى كسبتى إيه وأعتقد البخت لايجئ إلا لمن يستحقه
    9-عقبال الريس اللى فى بالى ننوس عينه مش عايز يتحتح عن الكرسى .
    10-الوطن معناه " أرض صحرا + حكومة متبتة+ جيش فاضى+ ناس هبلة+ حضارةيشوفوها السياح = وطن مصر
    أرجو أن تزورينى بمدونتى وعنوانها هو:farouksam.blogspot.com

    ردحذف
  11. انا بس استخسرت اشوف المقال دة ..
    و ماقولش اني عديت هنا ..
    او اعدي و ماعلقش ..
    معنديش كلام اقوله ..!!
    ربنا يستر على الزمن دة و علينا ..!

    ردحذف
  12. السلام عليكم
    يا حاجة
    ههههههههههههههه
    اخبارك ايه
    لا بجد التدوينة ع السريع اللذيذ

    ايو فعلا بابا عمل البطاقة الجديدة وماما هي اللي بتروح تاخد بيها المعاش عقبالك

    وبعدين ليه من سنة
    بصي عازاه يخلصلك شغلك فوتيله بريزة تحت الورق وللاسف هي ديه الطريق اللي ماشية وغير كده هيطلعوا عين الواحد ومش هيخلص ورقه انا زوجي لسه دافع الف جنيه ع الارض طلم عشان ركن علي اول الشارع
    قلولوا الرخص انت ماشي عكس رغم انه بيحلف ان العربية كانت واقفة
    الحمد لله



    اليومين دول يعنى الى قال الكعبة تتهد وتتبنى بطريقة منعا لاختلاط

    طيب خليهم يجوا جنب الكعبة وشوفي ربنا هيعمل فيهم ايه ربنا يرحمنا جميعا
    دمتي لذيذة

    تحياتي

    ردحذف
  13. كلمات من نور البرنامج كان اسمة كوكي كاك

    وكانت مش بطة كانت نتاج بيضة نعامة

    وغنت كمان لو انا فنان ارسم صورة
    دمتم بخير

    ردحذف
  14. يا قهوة بالفانيليا تشرفى فى أى وقت مرسى ياشيماء - يارب تكونى بخير

    أ\فاروق لقد علقت فى المدونة الخاصة بك

    ذكرى: بصى المشكلة عندى أنه انا مش حأخذ معاش لانى لم أكمل عدد السنوات بتاعة المعاش انا حيطلع لى مبلغ وأوراقى من كذا مكان هرم وعمرانية وم نصر غلطتى انى ماخلتش حد من التأمينات يعمل لى اللفة ديه وأديله حاجة أنا عرفت كده بس متأخر بس الحمدلله زغردتى خدت الفلوس وصرفتها أمبارح لولولولولوى - ياختى ماشاءالله وفاكرة كمان النعامة الى بتغنى اوعى تقول لى ان البرنامج كان عجبك :)) سلام وماتغبيش كده

    أحمد شريف: المتفائل دائما أنا لا أعتقد ان ده حيحصل لسبب بسيط أن مديرة المكتب شخصيا كانت مستاءة من هذا النظام لعدم جداوه!!!!

    أشكر الجميع للمشاركة فى تعريف معنى الوطن وده له بوست قريب أن شاءالله

    ردحذف
  15. بصراحة طبعا عشان وقتها كنت طفله صغيرة وكمان لو جه تاني هتفرج عليه عشانه من الذكريات

    حساكي اتغيرتي كتير للاحسن يعني
    في ردودك

    يعني اصبحتي ودودة في الرد ع التعلقات

    مبروك صرف الفلوس ربنا يبارك لك فيها

    ردحذف
  16. ذكرى : ليه هو أنا كنت شريرة قبل كده :))) أنا طول عمرى ودودة يمكن بس بعد سنة من وجودى هنا أتعلمت اللباقة بشكل أكثر لان الكتابة تختلف من المواجهة حتى لا يفهم كلامى خطأ - وياستى حقك على لو كان فيه حاجة مزعلاكى منى - وبعدين برضة الستات العواجيز الى زى ساعات لهم عذرهن برضة مش كده ولا ايه - موااااه

    ردحذف
  17. رغم أنها جولة إكتئابية إلا أنه -للأسف الشديد - كل إللي بتقوليه صح !!
    تحياتي

    ردحذف
  18. وانا أقول أبو الهول متنح ليه من يومه....

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))