الثلاثاء، مارس 16، 2010

على السريع (2)

كم حاجة كده متفرقة لاعلاقة بينهم و لا أعرف تحت أى بند يمكن تصنيفهم

1- أسرائيل دولة نسجت من خرافتها وأساطيرها واقع مفروض على الجميع حتى أن البعض يصدق بل ويؤمن بها أيمانا عميقا أما نحن ولله الحمد صنعنا من واقعنا أجمل خرافات وسنورث أساطيرنا للاحفاد ليترحموا على زمن مات

2-مؤسسة تحقيق أمنية – مؤسسة فى ابوظبى تعمل على تحقيق أمنيات الاطفال الذين يعانون أمراضا صعبة ومزمنة سواء كانوا من المواطنين الاماراتيين أم الوافدين – هل يفكر هشام طلعت مصطفى فى أقامة مثل تلك المؤسسة بالتعاون مع بعض رجال الاعمال لتحقيق أمنيات بعض من أطفالنا المرضى بدل مانصرف فلوسنا على الراقصات والمطربات وبعد كده ندفع فلوس تانية علشان نتخلص منهم وفلوس كمان علشان القضايا والذى منه ولا هو الى معاه قرش محيراه يجيب حمام ويطيره ؟؟؟

3- أستقبال رامى لكح بالزغاريد!!! (بدون تعليق) وعلى الجهة الاخرى شتم ولعن المتوفى الشيخ طنطاوى بل ورفض أقامة صلاة الغائب فى بعض المساجد على روحه (بدون تعليق أيضا) لكن فى الحالتين ياترى ده أسمه أيه؟؟؟

4-كنت أظن أن بزواج هيفاء وهبى سوف نترحم من أغانيها ومن أسلوبها السوقى فى الغناء وأصطناع الاغراء والرقة والدلع المريء (بكسر الياء) الا أن العكس صحيح فالكليب الاخير يثبت أن وراها رجل يا ألف نهار أبيض ونادى

5-الساعة الخامسة والنصف صباحا يرن موبايل زوجى (الذى ينساه دائما ولايغلقه حين يتوجه للصلاة ولاأعرف سر حمله له طالما ينساه دائما) رنة أولى – رنة ثانية – رنة ثالثة- رنة رابعة (تواصل مستمر) فأدركت أن هناك مصيبة ما – ألو (فى الرنة الخامسة هو الحاج ماجاش لسة معلش أصلى بسأل على النظارة لان غالبا نسيتها معاه!!! أكيد يصادف البعض مثل هذه التصرفات التى لا أجد لها أسم فى الحقيقة؟؟ بس الواحد يتصرف أزاى-أكيد خليك كوووووووول

6- أحيانا تضعك الظروف فى مأزق رغم أنك فطن وواعى ومعروف عنك الذكاء وحسن التصرف لكن زى مابيقولوا مايقع الا الشاطر فى مثل هذه الحالات تشتكى لشخص ما فتجد الشخص الذى كنت تتوسم أنه حيقولك كلمة حلوة أو يطيب خاطرك يعطيك درس وطبعا ينعتك بالغباء والهبل وبعدين يقول لك خلاص الى حصل حصل – تفتكر حتشعر بالسرور بعدها؟؟؟ هو ليه دايما ندبح الناس قبل ما نقولها كلمة حلوة للاسف الكلمة الحلوة ساعتها مش بتكون لها أى قيمة

7-وبيقولك بقى علشان أحنا فاضيين وماوراناش حاجة فقد تقرر تغيير أرقام الموبايلات فى مصر
فقد أعلن رئيس الجهاز القومي لتنظيم الاتصالات عمرو بدوي أن الجهاز قرر رسميا بدء زيادة أرقام المحمول إلى 11 رقماً بدلاً من 10 أرقام
وأشار بدوي أن عملية زيادة الأرقام ستبدأ من الخميس وتستمر لمدة عامين
وستقوم شركات المحمول بإضافة رقم جديد إلى الأكواد الحالية
الخبر ده جالى على الايميل – هيه هيه هيه بجد بجد الفاضى يعمل قاضى

8- بيقولك فيه أمتحانات تجريبى لطلبة الثانوية العامة اليومين دول أصل بيقولك برضة قبل كده (أى قبل الوزير الحالى) الطلبة كانوا بيتمرجحوا ودلوقت بقى حيوروهم اللعب على العوءلة والترابيز

وكل سنة وكل أمرأة مصرية بخير بمناسبة يوم المرأة المصرية 16 مارس

قلمى

هناك 11 تعليقًا:

  1. كنت ناوى اكتب فعلا عن كام حاجة على السريع برضوا ..هكمل معاكى الاخبار
    *نايب القمار...اتمسك فى المطار وهو جايب 520 موبايل ...قال بيقولك تهريب ...يا جماعة عيب الرجل معاه خطوط كتير ..واكيد كل الموبايلات دى هدايا وللاستخدام الشخصى فقط ...
    *استجواب مقدم من بعض النواب بخصوص الهدف اللى جه فى المنصورة والحكم ما حسبش التسلل ضد حسن صقر وزاهر ..... .ما تشوفوا بلاوى الناس اللى فى دوايركم الاول ..جتكم نية
    *الاعمال الطائفية فى مطروح ...لازم الاعمال دى تلف كل المحافظات ولا ايه ؟؟؟؟

    ردحذف
  2. انا مش شايفه علاقه بين استقبال رامى لكح
    ووفاه المرحوم الشيخ طنطاوى
    الله يرحمه كان راجل طيب وسمح جدا

    ردحذف
  3. غير معرف17/3/10 3:02 ص

    السلام عليكم
    سأعلق على النقاط التالية :
    زيادة الرقم 11 والسبب فيه أن سعة الأرقام الحالية لم تعد تتسع لأرقام جديدة ولأن الشركات تنمو فبالطبع هي بحاجة لحل والحل هو زيادة الأرقام لتستوعب أرقام جديدة .. هذه كل الحكاية ؟
    هذا حدث مع التليفون الأرض في كثير من السنترلات بكثير من المحافظات منذ ثلاثة سنوات على فكرة
    ================
    الامتحان التجريبي .. أراه خطوة جيدة جداً لتقويم وضع مختل .. فرصة تجبر الطلبة تحضر وتهتم بالمدرسة
    على فكرة أنا لم أحصل على درس خصوصي في حياتي إلا لشهور قليلة وكنت مجبر من الوالد رغم أني كنت أكره الدروس وعلى فكرة أنا كنت متفوق جداً بفضل من الله أولاً
    بس لن أنسى في يوم جملة لمدرس مشهور في اللعة الإنجليزية عندنا في كفر الشيخ حيث قال لي : احنا كمعلمين بنخش الفضول محبطين لأن الطلبة مش عاوزه تسمعنا من البداية فبنخش ونفسنا مسدودة ندي ، وعلى فكرة من الأشياء الجميلة اللي لاحظتها في كفر الشيخ إن أغلب المدرسين المشهورين في كفر الشيخ واللي كانوا مشهورين كاستاتذة دروس خصوصية كانوا بيشرحوا بكل ضمير في المدرسة لكن كثير من الطلبة لم تكن تعطيهم الفرصة لكي ينتجوا وهذه حقيقة أعترف بها وأنا كنت في فصل المتفوقين لسنوات وكنت أرى هذا السلوك من الطلبة بنفسي

    للأسف المشكلة مسئولية مجتمع بالكامل يجب أن يجبر الآباء أبناؤهم على احترام المدرسة وعدم اللجوء للدروس الخصوصية هذا من ناحية والحكومة والمدرسة عليها دور هي الأخرى لكن ليس هو مقصدي الآن
    إن رزقني الله بالزواج والانجاب إن شاء الله لن أوجه أطفالي أبداً لكي يسلكوا مسلك الدروس الخصوصية .. سأربيهم على احترام القيم والأصول والمدرسة والاعتماد على الذات
    هكذا سينصلح حال المجتمع لكن إن هرب الجميع من تحمل المسئولية وحملها لغيره كما هو الآن فلن ينصلح المجتمع أبداً
    عفواً على الإطالة
    وعلى فكرة كثيراً ما يحدث نفس الموقف الذي يحدث لزوجك الفاضل باتصال الناس عليه في وقت الصلاة مع أعزه الله

    عذراً على الإطالة من جديد
    دمتِ بود

    ردحذف
  4. غير معرف17/3/10 3:06 ص

    نسيت أن أقول أن ذكرت رؤيتي لمَ كان يحدث من الطلبة في فصل المتفوقين لكي أقول ما دام ها يحدث في فصل المتفوقين فما بالنا بالفصول الأخرى العادية
    الأمر الآخر لا أعرف هل ما زال الأساتذة المشهورين اللي كانوا على أيامنا يعملوا بضمير في المدارس أم لا ؟

    ردحذف
  5. Reham Meky17/3/10 9:36 ص

    عارفة يا مني موضوع شيخ الأزهر أثار في داخلي الكثير من الحزن علي حالنا و حال علمائنا! زي ما يكون كلب و راح، يعني بالعامي كدة عملنا هوليلة للمنتخب و اهتمينا بيهم اهتمام ياريت ربع هذا الأهتمام يوجه لحاجات أهم، و لما توفي شيخ الأزهر أهملنا بل و لعنا و استمرت الأغاني و الأفلام علي الشاشات!و تقوليلي مش عارف ايه.... ده حالنا بقي يغم! ربنا يرحمنا

    كل سنة و انتي طيبة يا حبيبتي عيد أم و مرأة سعيد عليكي جدا جدا:)

    ردحذف
  6. mony: هو مافيش علاقة بس هو تصرفات الناس هل رامى لكح يستحق الزغاريد هو ده السؤال وهل يستحق اليشخ طنطاوى ما حدث بعد وفاته- وشكرا على الزيارة

    شريف\ريهام\أحمد : أرائكم تحترم وكذلك رأى نو التى رفضت نشره لانه يحتوى على بعض معلومات خاصةبها

    ردحذف
  7. غير معرف17/3/10 9:09 م

    اخ يا منمن
    ضحكتينى و جيتى على الجرح فى دبح الناس بالكلام دى

    ردحذف
  8. مع كل ربط بين أحداث مرت وبتمر بينا بيظهر وجهة نظر جديدة ورؤية جديدة للأمور فى حياتنا وساعتها بنفكر ممكن نغيرها أو حتى نبتدى نفهمها.. حسيت بفلسفة لما قريت مواضيعك اللى على السريع بس حصلى شوية صداع لأنى شوفت كل حاجة فى صورة واحدة وفى برواز واحد..أشكرك على رؤيتك ووجهة نظرك وهاروح أخود مسكن وخلاص

    ردحذف
  9. السلام عليكم
    فعلا على السريع ده حياتنا كلها بقت على السريع بس المفروض ان السريع ده يبقى للامام ولكن عندنا فى مصر السريع للخلف
    العالم كله فى السريع للامام الا عندنا للأننا نحمل حضاره اكثر من 7000 سنه فلابد ان نكون مميزين
    احيي قلمك واشارك تساؤلاتك وتحيراتك
    وانا اعلم انك تعرفى الاجابه جيدا
    تحياتى وشكرى
    واسف على التأخير

    ردحذف
  10. ابتدى بقىالرد برده ع السريع
    1- عجبنى قوى فيلم اولاد العم لانه اشار لنقطة الخرافة اللى صدقوها وفرضوها على الجميع والجميع دول صدقوها برضه
    2- هل اعلق على ابو ظبى واللا ع الامارات كلها واللى بيعملوه هناك لنفسهم ولبعض واللا على رجال الاعمال فى مصر والفلوس اللى ملهاش اول من اخر وميهونش عليهم يعملوا حاجة زى كده يصرفوها على مزاجهم افضل لهم مش كده بلا وجع قلب
    3-برضه مش فاهمه الاستقبال الحافل ده ليه وشوفت الاستقبال فى التليفزيون على فكرة اما الشيخ طنطاوى رحمه الله فبرضه مش فاهمه ليه كده ليه معندناش احترام انت ممكن تختلف لكن لازم يفضل الاحترام
    4-لامتظلميش الراجل ماهو الكليب بقى له موضوع اهوه حقيقى مش عارفه اربط الدنيا ببعض بس اهوه
    5-6-بتحصل وكتير كمان
    7-حصلت برضه من كام سنة زودوا رقم 3 قبل كل رقم اصلى للتليفونات الثابتة
    8-بصى دى اكيد اشاعة لانى سمعتها قبل كده برضه دى حتى سمعتها سنة 1995 لما كنت فى ثانوية عامة وساعتها جالى مغص والذى منه لمدة 3 ايام لحد ما طلعت اشاعة والحمد لله بس كانوا بيعملولنا امتحانات موحدة على مستوى المدرسة يعنى يوم عربى للكل يوم كيمياء لعلمى يوم فلسفة ومنطق لادبى وكده يعنى ياااه كانت ايام انا مش فاهمة عاملين هيصة على الثانوية العامة وهى اساسا مبقتش ثانوية عامة بقت اى حاجة يعنى سنوات دراسة عادية يلا ما علينا

    موضوع مميز كعادتك

    ردحذف
  11. سلام عليكم

    انا عايز على نقطة رامي لكح ... عايزة تعرفي سبب استقبال رامي لكح بالزغاريد شوفيه وهو بيشتم في البرادعي

    its just Deal

    اما من سب شيخ الازهر فهو من لم يستطع سبه في حياته

    فستأسد على الرجل وهو بين يدي الله

    ليا وجهة نظر عايز تشتم حد اشتمه وهو حي واترحم عليه لما يموت

    الله يرحمه

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))