الأربعاء، يونيو 09، 2010

أثنين سويا باندا وحمزاوى


منذ فترة لاحظت أن "خلقى ضاق" على رأى الرائعة فيروز فأصبحت أشياء كثيرة تثير أعصابى ارجعت ذلك ربما لتقدمى فى السن وأصبحت أنبه نفسى من آن لاخر أن "أفوت ولاداعى أن أدق على الواحدة" ومن الاشياء التى تثير أعصابى جدا أعلانات التليفزيون رغم أننى لاأشاهده كثيرا الا أنه لحظى الاسود حين أتابع شىء ما أجد الاعلانات تطلع لى لسانها - مثل أعلان جبنة باندا الاخير فحين رأيته أول مرة "قلت معلش طنشى يابت خاااااالص" بعد شوية لقيت له نسخة ثانية قلت برضة معلش يابت أنت كبرتى بقى فوتى هى ديه الثقافة الاعلانية الجديدة الى أن الحمدلله وجدت أحد صديقاتى الاصغر منى سنا يجى بخمس عشرة سنة تكاد تموت غيظا من هذا الاعلان حتى أنها أعلنت عن مدى أستيائها منه على الفيس بوك – أما للذى لم يشاهد هذه الاعلانات خلاصتها أنه شخص يسأل شخص أو زوجة تسأل زوج أو طفل يسأل أب عايز باندا فيكون الرد "لا" فتظهر على الشاشة فجأة دبة الباندا وتنظر شزرا زى أمنا الغولة أو الساحرة الشريرة للذى قال لا وتقوم بتكسير كل ما حوله ويصرخ رجل همام من جوة التليفزيون "باندا مايتقلاهاش لا"؟؟؟؟ يعنى أعلان أرهابى أى والله تهديد ووعيد والا وقعة من لايأكل باندا سودة!! تخويف وترويع وأسلوب غير لائق للتعامل ولاأعرف أى رسالة تصل لطفل يشاهد مثل هذا الاعلان – صديقتى أقسمت الا تأكل هذا النوع من الجبن أبدا عن نفسى لا أعرف هذا النوع ولكنى كرهت حيوان الباندا بسبب هذا الاعلان رغم أن هذا الحيوان جميل ومسالم جدا وللعلم هو فى طريقه للانقراض عقبال كده يارب ما ينقرض القائمين على مثل تلك الاعلانات.

أما الاخ حمزاوى فهو شخصية جديدة فى أعلانات ميلودى السودة التى تعلن عن القناة وقد قررت القناة تغيير ثوبها وأعلان التوبة عن وديع وأيوه كده ياوديع لتحضر حمزاوى رائد العفة والطهارة فى أعلانات ميلودى الجديدة وحمزاوى شاب روش روش طحن بتموت فيه كل البنات (المخبولة) وكان قبل ظهور الاعلان الجديد لميلودى وعد صاحب القناة بأن تتجه الاعلانات لاسلوب محافظ بعد أنضمام ميلودى دراما للباقة (لا أعرف هى الاخت دراما من عائلة محافظة غير بقية العائلة ولا ايه مش فاهمة) والاعلان الجديد ليس فيه أى سفالة واضحة ولكنها سفالة من تحت لتحت ايحاءات جنسية غير صريحة لكنها واضحة وضوح الشمس ولاأعرف من اين يأتين بممثلات هذا الاعلان الذى ينتهى بعبارة " منك لله ياجمال يامروان" بعد أن يعلم الاخ حمزاوى أن صاحب القناة قرر أن يلبس الفتيات زى محتشم !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!وللحق تلك العبارة هى اصدق عبارة فى الاعلان - فعلا منك لله يابعيد فلو قام جدك من قبره والله لخر صريعا من تحت رأس أعلانات قناتك المؤرفة.

منكوا لله يا بتوع الاعلانات نفر نفر


قلمى

هناك 11 تعليقًا:

  1. البوست ده ضحكنى اوى و مسلى جدا :)

    طبعا متفهمة شعورك بس انا عن نفسى بحب الاعلانات بالذات لو جديدة و دمها خفيف و مش مكررة لدرجة ان كان فيه برنامج على قناة القاهرة و الناس فى رمضان اللى فات بيذيع اعلانات السبعينات و التمنينات كنت بستناه

    اكيد مش اى اعلان حلو لكنهم مسليين و بيعرفوكى اشياء كثيرة عن المجتمع و عشان كده اول ما بسافر بلد جديد حتى لو مش فاهمة لغته بافتح التلفزيون و ادور على الاعلانات لانها بتعرفك كتير عن المجتمع و صفاته

    تحياتي

    ردحذف
  2. Mona.........
    وهوه فيه إعلان إلا لازم يدخلو عليه إما العرى الواضح أو الإيحاءات الجنسية أو التهديدالمباشر بدم تقيل معلش فلسوا خلاص موش زى زمان كانت حلوه
    أحيل عليكى " التاج السلطانى" التى أحالته لى"أم الخلود-كركر"ونظامه هو:
    1-اذكر اسم من طلب منك حل هذا الواجب.
    2-اذكر القوانين المتعـلقة بهذا الواجب.
    3-تحدث عن ستة أسرار قد لا يكتشفها من يقابلك للمرة الأولى.
    4-حّول هذا الواجب إلى ستة مدونين، واذكر أسماءهم مع روابط مدوناتهم في موضوعك.
    5-اترك تعليقًا في مدونة من حّولت الواجب عليهم؛ ليعلموا عن هذا الواجب
    وشكرا لك

    ردحذف
  3. و الله انا بقالي فترة كبيييييييييييرة أوي مفتحتش الدش...بصراحة بدأت أحس ان الانترنت رغم انه مش ايجابي اوي بردوا لكن علي الأقل اقدر أتحكم في نوع المادة الإعلامية اللي انا بشوفها...
    ربنا يهدي الجميع...
    لكي اطيب تحية...

    ردحذف
  4. الاستاذ فاروق : ماتقوله للاسف صحيح وأعتذر عن موضوع التاج هذا لانى لاأحب هذا الموضوع.

    ردحذف
  5. :-)))

    الإعلانات بتاعة حمزاوي دي فيها السم داخل العسل .. أنا الرسالة اللي وصلت ليا بوضوح هي إنهم فاهمين ومدركين تماما حجم الإسفاف والخلاعة اللي بيروجوا ليها وإنهم فعلا قاصدينها .. أو بعبارة أخرى هما ببجاحة ووضوح وصراحة (وش كده) بيؤكدوا على انهم بيساندوا الاتجاه ده تماما وعن وعي كامل كمان

    طريقة ادعاء العفة والشرف دي ما هي الا نوع من نقد الذات المقصود بيه العكس تماما .. وهو دي الحقيقية

    يعني هل من المعقول ان صاحب القناة هيدعي على نفسه؟

    :-)

    المهم الحكمة اللي قالها: احنا بنعمل فلوس يا حبيبي .. مش فن

    ردحذف
  6. غير معرف10/6/10 5:23 م

    لا فض فوك
    على فكرة لمحت بالأمس إعلاناً طيباً ومدته قصيرة من ضمن حملة للمجلس الأعلى للآثار للمحافظة على الآثار .. وبطل الإعلان : عمر الشريف

    الإعلان بسيط وقصير لكنه قيم كما أظن

    ردحذف
  7. بجد اعلانات مؤرفة
    حسبى الله ونعم الوكيل
    ده بجد انحطاط بالذوق العام
    مش عارف بس المفروض الاعلان يشدك للقيمة او للمنتج علشان تروحلو او تشتريه
    واضح انه بقى علشان يخلو الناس تتكلم عنه بس .. بس بقرف
    يالله شكرا على مجهودك وبالتوفيق دائما

    ردحذف
  8. سلام عليكم
    إزيك حضرتك يا مدام منى

    كثير من المستفزات فى الفضائيات وغيرها
    البعض أخد حصانة وأصبحت عنده عادى
    والبعض يتجنبها بأى وسيلة
    المهم الحفاظ على الضغط

    ردحذف
  9. وأيوه كده ياوديع
    ههههههههههههه

    عندك حق بس تعرفي كويس انك شرحتي الاعلان عشان لما تيجي المادة الاعلانية عندمتابعة الفيلم بنغير ونشوف احداث الفيلم التاني مش بنضيع وقت بصراحة استفزاز الاعلانات ليس له اي علاقة بالسن كبير وصغير اعلانات ميلودي مستفزة من يومها واعلان بريل ومن فترة اعلان فيروز وهندوس ههههههههههههه
    اواعلانات المسخرة الشريط بتعة جنية خت الحبية انهاردة بيفكروني بحبية منع الحمل هههههههههههه
    انا طهقت وملت من التلفيزيون كله بصراحة المدونات ارحم
    ربنا يرحمنا
    دمتي بحب وود

    ردحذف
  10. أختنا منى

    نحن فى زمن المسخ

    المسخ فى كل شىء ... الإحساس و الحب و العطاء و الوفاءو الصدق و الإخلاص ... و هلم جرة
    ماجتش بقى على الإعلانات

    ربنا يرحمنا برحمته

    دمتى بخير

    ردحذف
  11. ماهو دة النظام العالمي الجديد
    ارهاب وقلة ادب
    اعلانات في منهي السفالة فعلا
    وخاصة قنوات ميلودى طبعا مشهورة بانها مركز للزيلة في القنوات الفضائية
    اشوف فيهم يوم اسود
    العيب مش فيهم العيب في اللي بيشجعهم علي كدة منه لله ربنا يهده


    تحياتي للموضوع

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))