الأحد، مايو 16، 2010

ياحلاوة الربع جنيه

دائما ما أفكر فى الصحفى الذى لديه عمود فى جريدة ويكون مطالب بالكتابة له يوميا ماعدا يوم يختاره لعطلته، وأحييه لافكاره المتنوعة يوميا التى ينير بها عموده، بينما أنا أحاول منذ أسبوع أن أكتب كلمة عليها القيمة فلا أجد أو أجد ولكن بداخلى ملل من الكتابة وحتى القراءة فلا أقوى على ترتيب أى أفكار.

وقد قرأت عن حملة 30 يوم تدوين ولم أفهم لماذا نحن مطالبون بالكتابة يوميا فالتديون ليس أجبار ولا مهنة فى صحافة بل هى أفكارنا الخاصة تظهر حين يكون هناك أستعداد لذلك، المهم ليس هذا موضوعنا بأى حال من الاحوال فهناك ماشاءالله من يكتب يوميا.

حكايتنا النهارده (نظام أبلة فضيلة) عن العملات المعدنية فئة 5 والعشرة والربع جنيه على الاخص، والذى جعلنى أكتب عنه، هو أكتشافى لنسخة جديدة من الربع جنيه لم أراها من قبل ولدهشتى فهى أصدار 2008؟؟ ترى أين كانت مختبأة تلك النسخة؟ وكيف لم أرها من قبل يعنى حصل لها تحديث زى السوفت وير كده تلاقى له نسخة 1.2 وبعدين تعدل ل1.2.1 وبعدين ينط لاصدار 2 ولما حد يسألك عندك أصدار ايه تقول له 1 2 3 4 والفرق بين الاول والرابع أن الاول كان فيه باج bug والتانى تم تصليح الباج الاول لكن ظهر له باج تانى وفى الثالث يكون مش مضبوط علشان يبيعوا الاصدار الرابع والنسخ كلها هى هى لا فرق فيها يعنى زيد أبن عم عبيد وده بالضبط الى بيحصل مع عملة الربع جنيه أو أى عملة معدنية من فئة 5 والعشرة.

يعنى نسخة الربع جنيه سنة 2008 لها نفس النسخة الورقية برضة 2008، نبدأ بالورقية التى أن وجدتها فهى أكيد أتت الي جيبك حين كنت فى التوحيد والنور فهو المكان الوحيد الذى يعطيك هذه النسخة الورقية التى لو حاولت صرفها فى أى مكان يرفضونها حتى فى التوحيد والنور نفسه !!! أنا كنت بأقول يمكن أصحاب المحال لا يعجبهم شكلها و فيه عداوة بينهم وبين النسخة الورقية طيب ليه ياترى لم يستعملوا النسخة الحلوة الجديدة المنمنمة التى تقريبا فى حجم 10 قروش الجديدة يعنى فى حجم النكلة والمليم لو حد فى سنى يوعى على شكلهما! لان بصراحة بكل صراحة محدش بيرجع باقى ربع جنيه؟ يعنى لتر البيبسى الى أرتفع سعره من شهرين وأصبح ب2.75 البقال عمره ما بيرجع لك ربع جنيه لو أشتريت واحدة ويدليك أرواح بدل الربع جنيه (الارواح هى الكلمة الشعبية للبونبون). والجريدة الاسبوعية (القومية) ب1.5 وبتاع الجرائد لن يعطيك باقى 2 ربعين جنيه أبدا بل نصف جنيه معدنى الى فى حجم العشرة قروش القديمة علشان يضيع منك لانك حتفتكره 10 قروش. أما اوتوبيس النقل العام بعد أن تحول الى أهلاوى بلونه الاحمر التذكرة بقيت ب1 لحلوح يعنى مافيش لا ربع ولا نصف ولا خناقات مع الكمسرى على الباقى لكن دعاء على من غلى ثمن تذكرته من ربع الى نصف الى جنيه . نفس الشىء بالنسبة للميكروباصات الخاصة مافيش نظام 75 للعباسية و1.25 لرمسيس هو يا 1.5 يا 2 هو التباع لسة حيوجع دماغه بالباقى. وميكروباصات الحكومة اصبحت ب2 علشان التكييف (غالبا خربان) بس حتدفع 2 جنيه ولو لسة فيه ب 1. 25 السواق حيقولك ماعنديش فكة شوفلى 1.25 وطبعا لو أنت جنتل حتديلوه 1.5 ولو مش جنتيل حتتخانق وبرضة مش حتأخد الربع جنيه. حتقولى الناس الشيك بتشترى العيش أبو ربع الى فيه منه للعلم ب30 قرش وده عليه عرض يعنى الاربعة بجنيه ومحدش حيقف يشترى رغيف واحد بربع. ونفس الشىء للمطحون الملطوع فى طابور العيش أبو خمسة قروش مش ممكن لو عقله سليم بعد الوقفة السودة الا أنه حيشترى أما بنصف جنيه أو بجنيه.

وبالطبع لم يعد فى هذا الزمن طفل يأخذ مصروف ربع جنيه لانه لايوجد أى حلوى بربع جنيه فالشيبسى وشيبسكو وميكانيكو وروتيكو (طبعا اسمائهم غير ذلك) أصبحت بنصف جنيه وأصلا لو أعطيت طفلك ربع جنيه مش بعيد يرفع عليك قضية شح وبخل. فلو كان طفلك متواضع حيرضى بنصف جنيه وحيخمس فى البيبسى مع صاحبه وحيعزم عليه بكيس الشيبسى ولو لم يكن متواضع فديه مشكلتك ومشكلة كل من عنده أطفال ومصروف اليد والصيف هل وأيس كريم بقى وطلبات لن تنتهى مع الجزم أنه لا يوجد شىء بربع جنيه وأن وجد فهو لشىء لا يحبه الطفل.

تشعر أن الربع جنيه مشكلة فى وجدان كل من يتعاملون ماديا أى والله حتى أن النسخة الى شكل نعناع البولو (النسخة المخرومة) أختفت ولا أراها أبدا لان اصلا لا أحد يرجع لك باقى طيب لما محدش بيرجع الربع جنيه بالذمة فيه حد جيرجع عشرة أو خمسة قروش. فمثلا أنا أشترى دواء (مرتين فى الشهر) ثمنه 4.45 ولا أفهم السر فى هذه التسعيرة وبالطبع لن أنتظر الخمسة القروش ولو اشتريت علبتين لن أنتظر العشرة قروش لانه لا يوجد مثل هذه العملات فى الصيدليات! ده ثمن الدواء نفسه معجزة حتى أن مسئول فى الشركة صاحبة الدواء قال لى أن هذا الدواء يخسرهم!! فكل ما أشتريه (لانه مدى الحياة) أقول يارب ما يغلى!!

تفتكروا أنا مفترية أو متشائمة أن قلت أننى متأكدة أنه فى غضون سنتين لن نجد بقية النصف جنيه أعتقد نكتفى بالاهتمام بطبع ال200 جنيه الى طبعت كبيرة فى أول الامر فلم يسنح نظام الاى تى أم بصرفها من الماكينة فتم تصغيرها لتوائم الماكينات بينما هى لا توائم أحتياجاتنا فى شىء فيطلع عينك علشان تفكها وكمان هى أكثر عملة تزيف فينظر لك من يأخذها بريبة وشك ثم ينظر للورقة بريبة وشك ويضعها فى النور ليتأكد أنها غير مزورة وبعدين يقولك مافيش فكة!! ان كان لا يوجد ربع جنيه أو عشرة أو خمسة قروش فكة؟؟ يبقى حنفك 200 جنيه!!!!!!!!!!!!!!!!!!!!!!!!

قلمى

هناك 14 تعليقًا:

  1. المشكلة كمان ان الجنية نفسه فى طريقة الى ان يكون بلا تاثير و الاهم انهم حاليا بيعدوا خمسة جنية معدن لان قيمتها ح تنزل بفعل التضخم و عدم مواكبة معدلات النمو الاقتصادى للنمو السكانى و بالتالى القيمة الفعلية او الشرائية للعملة المحلية فى تناقص مستمر

    ردحذف
  2. أنا عارفة الموضوع ده ياTears وربنا يستر المشكلة أن فيه ناس كتير عايشة ومش دريانة - تحياتى

    ردحذف
  3. ولسه يا ما هنشوف أنا حاسس ان قبل 2010 متخلص هتكون فيه ورقة ب500 جنيه أهو كله تقليل من قيمة العملة بس بجد انتى لسه فاكرة الربع جنيه انا تقريبا مشفتوش من أكتر من سنة .. بس بجد مقالة جميلة وفى انتظار كل جديد ويا حلاوة الربع جنية :)

    ردحذف
  4. السيد عزب : انا ماشفتوش من أكتر من سنة برضة لغاية لما لاقيت الربع جنيه الجديد :)

    ردحذف
  5. Mona ....
    على فكرة أنا معجب جدا بالعملات وخاصة
    المعدنية وعندى عملات من جميع أنحاء العالم وطبعا عندى المليم والنكلة العادية والمخرومة مثل النعناعة وعدد منها حاطة بالميدالية وطبعا القرش والتعريفة إنتهى وكذا العشرة قروش والخمسة قروش إنتهت يعنى ماحدش حايرجعلك الباقى قروش بمعنى بيضحكوا علينا لما بكتبوا السعر للدواء4.45
    لأن الخمس قروش كما قلت إنتهت من السوق وعندى عدد كبير منها حوالى عشرين جنيه لاتصلح إلا للذكرى .
    الحكومة ناوية تخلى حياتنا كلها ذكرى زى ذكرى المغنية المغربية الله يرحمها وشكرا لك

    ردحذف
  6. عزيزتى مدام منى: أدام الله كلماتك بيننا وموضوعاتك الصعبة التى نرى حياتنا معها بشكل واقعى جدا..كل كلماتى هى ربنا يستر علينا ( الدعاء)..أشكرك على موضوعك وكلماتك الشيقة ووفقك الله دائما

    ردحذف
  7. أنا بطلت أستفسر عن الأسباب من زمان..بقيت حاسس ان الحكومة بتجرب و بتلعب بينا لعب ، جايز ميكونش في ضرورة لتغيير نظام العملات لكنها الحاجة للتغيير و السلام...زي اللي قاعد مأنتخ ف السرير فقام يتمشي عشان يفوق شوية..بردوا فوق السرير...
    تحياتي الكبييييييرة...

    ردحذف
  8. ؤيع جنيه ايه يامنى طيب ماهو الجنيه قانونا فيه 100 قرش ياترى تقدرى تصرفى القرش دا طبعا انا قصدى قرش العملة مش قرش حاجة تانيه

    ردحذف
  9. والله انا بقيت بامشى مايل على جنب من تقل الفلوس فى جيبى ده غير الشخلله المنتظمه مع الحركه حاجه تكسف


    تحياتى

    ردحذف
  10. اصل القصة انهم خرموا اقتصاد البلد وسدوا خرم الربع جنيه



    ناس فاهمة


    ههههههههههههه

    السلام عليكم

    ردحذف
  11. العملة مش بشكلها ولكن بقيمتها..مثلا في بريطانيا كل ما العملة المعدنية تكبر في القيمة تصغر في الحجم سبحان الله..ولو روحتى السوبر ماركت تخدي الباقى بالسحتوت..حكايتك دي فكرتني بواحدة كانت زميلتنا من السودان وقبل ما يلغو الجنية السوداني ويعملو الدينار كان الجنية المصري تقريبا بالف سوداني وكنت طلبت منها ان اجيب مليون جنية سوداني عشان ابقى مليونير بقى والحمدلله ماسمعت كلامي لانهم لاغوه بعدها ...

    ردحذف
  12. كثيرا ماكنت أحتفظ بالربع جنيه المخروم وكنت بخبيه مش عارفةليه


    المادة أصبحت تقيم بقيمة الانسان

    يعني معاك جنيه بتسوى جنيه

    هي كدة حياتنا

    وبالنسبة لحملة التدوين انا بضم صوتي لصوتك





    شكرا عزيزتي

    ردحذف
  13. سلامو عليكو..
    ربع جنيه ايه يا بنتى ده راح وراحت ايامه بس زمان كان له هيبه.
    برجاء قبولى صديقة للمدونة
    لك تحياتى

    ردحذف
  14. فعلا لالزوم للربع جنيه فهومابيجيبش حاجه ولا حد حيرجعه كباقي ولا حد حيقبله كبقشيش
    عموما أعتقد إن عملتنا لازم تكون معدنية حيث أننا ربما أكثر شعب في العالم يحتقر عملته الورقية ويقطعها ثم يلزقها ويكتب عليها حساباته من جمع وطرح وارقام التليفون ومش نافص الا انه يكتب عليها مذكراته
    أوافقك أن الانسان لا يجب ان يكتب الا اذا شعر بالشئ قبل ان يكتبه
    تحياتي

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))