السبت، مايو 08، 2010

على السريع (5)

مش حتكلم كتير لانى مصدعة موت - هم كم كلمة كده فى السريع بس علشان نفوخى يمكن يهدى شوية

بيقولك أتسرق من المطبعة 800 ألف جنيه (تالفة) وأثناء التحقيقات أكتشفوا (يامى يامامى) سرقة 2 مليون جنيه أخرى (ما قالوش أن كانوا تالفين هم كمان ولا لا) والاوضة بتاعة الخرنة 28 متر ومحصنة ومصفحة ياترى ياهل ترى مين الى سرقها؟؟ أكيد توفيق الدقن لما لبس طاقية الاخفاء - بالذمة الفلوس هى برضة الى تلفانة ؟؟؟؟

كل يوم أفتح الجرنال يقولك مقاطعة اللحمة – جروبات على الفيس بوك مقاطعة اللحمة – اللحمة يمين اللحمة شمال - المهم قاطعتها أنا والعيال وأبوهم يجى 10 أيام كده والنهارده نزلت أشترى طلبات الشهر من كارفور لاقيت تقريبا مصر كلها فيه وتلاتة أرباع مصر بتشترى لحمة واللحمة لسة سعرها لم ينخفض – تفتكروا عملت أيه؟؟؟ أشتريت كيلو لحمة مفرومة وصممت أعمل محشى بذنجان وكوسة وفلفل بالارز واللحمة المفرومة ومسقعة باللحمة المفرومة– وسلمولى على المقاطعة يابتوع المقاطعة!!!

السنة الى فاتت أولادى قالوا لى نشترك فى قناة الجزيرة الرياضية وأحنا حندفع الاشتراك لانهم عارفين الظروف المادية المستجدة قلت ماشى – بقالهم كم شهر دلوقت بيحوشوا علشان تجديد الاشتراك الى حيخلص أخر يوينو ده ومستنين يشوفوا مباريات كأس العالم على شوق (وأنا كمان) قوم ايه بقى؟؟ قالوا لنا لا لا لا لا لا لا مش حتعرفوا تشوفوا المباريات الا لو دفعتوا ما يعادل 100 دولار (أيوه 100 دولار دولار ينطح دولار) غير التجديد الى ب400 جنيه – يعنى أدفع 100 دولار علشان أشوف مباريات لمدة الشهر بتاع الكأس أمال التجديد ده لايه!!! وده بقى اسمه أيه؟؟ قانون البلطجة ولا قانون الحاجة تبرر الوسيلة ولا قانون الى مالوش كبير يعمل الى هو عايزه ولا قانون النصب على الناس ولا أيه بالضبط ؟؟ والعيال بقالهم اسبوعين بيفكروا يعملوا ايه وياترى لو قعدوا فى الكافيه يتفرجوا حيبقى أوفر؟؟ وأنا طبعا مش عارفة أدعى على مين ولا مين ولا مين؟؟؟

بيقولك تفريغ الشريط فى قضية مقتل سوزان تميم حتتكلف 750 مليون جنيه (معرفش ليه) المهم فكرت أبعت للمحامين وأقول لهم عندى أستعداد افرغ لهم أنا الشريط وكل الشرايط الى هم نفسهم فيها بنصف المبلغ أى 375 مليون جنيه حأعمل ب350 مليون جنيه مشاريع تشغل الشباب الى مش لاقية شغل وال5 مليون حأقسم 2 على أولادى و3 للناس الى  حتساعدنى فى تفريغ الشريط و20 مليون حأخدهم وحأهج من البلد ومش حأرجع لها تااااااااااااااااانى
وكفاية كده النهاردة وكمان النور أتقطع بمناسبة الحرررر

"قلمى"
لما النور أتقطع قعد يروح ويجى خلال نصف ساعة حوالى عشر مرات!!!

هناك 16 تعليقًا:

  1. مين قاطع اللحمة يا بنتي

    كله بيضحك على كله

    اللي قاطعوها هما اللي مش اد سعرها بس

    اشتراكات القنوات دي بجد قلة حيا ...عملوها فيا مرة بتوع الاي ار تي وقال ايه حيرفعوا عليا قضية علشان مش باسدد وانا مش باسدد علشان قطعوا الاي ار تي قوم ايه؟؟؟؟؟؟؟ رحت المكتب وقابلت المدير ورميت له الريسيفر عالمكتب وقلتله هما اعلان وايميل

    واحد في الأهرام عن فضايحكم وبأساميكم وواحد واحد والايميل للشيخ بتاعكم في السعودية خليه يوقف لكم توكيل الشغل


    قوم إيه؟؟؟؟؟؟محدش رفع قضية وكله جبن و طز في الاي ار تي والجزيرة وووو

    بعدما كنا بنوفر المباريات للكل بقينا نشحت قنوات رياضية

    كفايه الا ضغطي وطي يختي ومش عايزة اتكلم عن البنك ولا التفريغ

    ردحذف
  2. أنت عارفة يانو أنا مشتركة فى الجزيرة والشوتايم علشان خاطر مباريات الكرة للاولاد مايقعدوش فى الكافيه والقهاوى - أبتدينا بموضوع الجزيرة والشوتايم من كام شهر عملت أندماج مع أوربيت وبقيت القنوات سمك لبن تمر هندى وعملوا قنوات مدبلجو بالعربى وسموا القنوات osn هو فيه أيه؟؟ مش عارفة يعنى نحافظ على الاولاد من قعاد الكافيهات برضة يطلعوا لنا بأرف ماهو كمان أحنا مش قاعدين على بنك؟؟ بجد الرحمة حلوة

    ردحذف
  3. يا منى كده اعصابك هتتعب وكفايه عليكى الصداع..ومتركزيش عشان اكرم وكريم محتاجينك
    وبعدين متابعه الماتشات فالكافيهات ليها متعة تانيه
    وكتر اللحمه بيجيب اكتئاب..
    عالعموم ربنا يصبرنا على ما بلانا
    ابقى انزلى بالخواطر اروق هههههههههه
    اهى ببلاش على الاقل

    ردحذف
  4. صباح الخير...
    و هاييجي منين الخير ، من كام سنة كده قولت اسمع كلام الحكومة و اشرب اللبن الصبح و اكون انسان متحضر...مرة ف مرة لقيت ان انا العنصر الشاذ في البلد دي اللي بيدخل المترو من باب الدخول و يخرج من باب الخروج...اللي بيحترم اشارة المرور و يستني اما العربيات تقف عشان يعدي...بقيت بصدق اسلوب موظفين خدمة العملا لأي شركة لما يقولي هانبذل قصاري جهدنا يافندم لحل المشكلة...
    اتضح ان سياسة التعامل معاهم لازم تكون زي ما كلمات من نور وضحتلك بالظبط ، أنا بحمد ربنا اني مبفهمش ف الكورة اساسا...
    تحياتي الكبيييييييرة...

    ردحذف
  5. على فكرة فعلاً أنا شاعر بمقاطعة اللحمة ، عندنا في كفر الشيخ الجزارين بيلفوا بعربيات من أسبوع يعلنوا عن الأسعار الجديدة .. حالياً ب 40 جنيه

    أما وقائع السرقة والتلف وهذه الأمور .. لست متابع لهذه القضايا لكن أتمنى أن يأخذ الحق مجراه فيها ويأخذ الجاني عقابه

    أما قنوات الجزيرة فأحسن ما في الأمر بالنسبة لي أني لست مغرم بمباريات الكرة .. ومش مشترك في هذه القنوات ولن أشترك

    ردحذف
  6. والله يامنى بالنسبة لموضوع فلوس المطبعة اعتقد حيصدر قرار قريب بخصخصة مطبعة وزارة المالية علشان يبقى اللى عايز فلوس يطبع
    بالنسبة للحمة ..... مش عارف اقول ايه اللحمة لحمة برضه
    اما موضوع قنوات الجزيرة والله انا لما الاقى ماتش عايز اشوفه انزل على القهوة اتفرج عليه مع حجرين شيشه وكوباية شاى فى الهوا او التكييف ارخص
    اما موضوع سوزان تميم معلش بقى انا حدخل المناقصة وحاخد بس 100 مليون

    ردحذف
  7. مدام منى : علشان الصداع عندك يخف احنا يجلنا اككتئاب واحباط كمان ..
    انا باحالو مش اركز اوى فى المواضيع دى لانها مالهاش حل وانا اللى خسران زيك كدة بالصداع.. بلاش حساسيتك الزايدة دى وهما بيحاولوا يقضوا عليها وانتى واحنا لسة برضه بنحس وبنعترض وبيجلنا صداع..عزيزتى ربنا يوفقك ويبعد عنك الصداع بس مش عارف ازاى

    ردحذف
  8. موضوع المباريات ده عامل ازمة للمتابعين لها بس يمكن ماعنديش تفاصيل لانى مش بفهم فى الكورة خالص و لا بطيق اشوفها...بحس ان كل مرة هى هى نفس الحكاية و فيه اتنين و عشرين بيتخانقوا على كورة واحدة بيجروا وراها

    لو كل الناس قالت مش ح نشترك اكيد السعر ح يتخفض

    يعنى عندك مثلا الا ار تى بعد بيع قنوات الرياضة من كتر ما بالغت فى اسعار قنوات الافلام و الحكايات فى الوقت اللى بيفتح فيه قنوات كتير مجانا متخصصة بتجيب نفس الشىء زى الحياة سينما و مسلسلات و بنوراما و ميلودى و كايرو فعدد المشتركين قل جدا و حاليا بيعملوا اجراءات قانونية لبث القنوات بشكل مفتوح و الاعتماد على الاعلانات الكثيرة اللى ممكن تيجى بدل ما همه بلا اعلانات حاليا عشان ماحدش بيشوفهم و بيتردد ان ده ح يحصل من شهر يونيه حسب ما نشر فى جريدة اليوم السابع

    ردحذف
  9. Tears: هى وجهات نظر بس يمكن علشان أنا من عائلة رياضية وكمان أنا أحب أشارك الاولاد فى متابعة المباريات بدل ما كل واحد يقعد فى أوضة ومباريات كأس العالم ديه لها متعة ثانية خالص وكمان بتفكرنى بأبويا الله يرحمه - هى الفكرة فى الضحك على الناس وأنا لاغيت أشتراك الايه أر تى وسبب أشتراك الجزيرة هو الاولاد :)

    هشام : وأنا لما أعوز أتفرج حأنزل اقعد على القهوة برضة مع الشيشة!! حلوة فكرة المطبعة :) أما المناقصة فممكن تشاركينى علشان نعمل مشروع الشباب بمبلغ أكبر

    د\صبرى أخبارك أيه وأخبار لبنان ايه أن شاءالله ترجع بالسلامة - أنا الصداع ده مرض عندى من زمن وبالطبع التوتر بيزوده والله أنا بأحاول أكبر دماغى بس ساعات مش بقدر

    المستفز : تتصور أنا مش بعرف أعمل غير أنى أدخل من باب الدخول وأخرج من باب الخروج صحيح الذوق مش بينفع بس مش بعرف للاسف - وكمان للاسف أنا لى أهتمامات رياضية :)

    أحمد شريف : أيوه أن شاءالله يقبضوا على الجناة - وكله حيبقى تمام - أما الكرة فكل واحد فينا له هواياته والحاجات الى بيغرم بها وطبعا تختلف من الواحد للثانى هو أهم حاجة أننا لا نسفه ما يحبه الاخرين أو نعكنن عليهم عيشتهم فيما يحبون أما مقاطعة اللحمة يمكن ده عندكوا فى كفر الشيخ بس هنا لا وكمان هى 40 جنيه ديه كده رخصت؟؟؟

    ردحذف
  10. خلينا أقول على حاجة نسيت أقولها

    حابب أحييكِ على حرصك على عدم جلوس الأبناء الأعزاء ربنا يحفظهم إن شاء الله على المقاهي بجوار الشيشة وما جاورها

    ثانياً ، أنا أحب الكره لكن لست مغرم بمتابعتها قديماً يمكن كنت أحب متابعتها لكن الوضع والظروف تغير ، وتبقى هوايات مطلوبة وقد تكون ترفيه والترفيه هو الآخر مطلوب لترويح القلوب والنفوس

    بالنسبة للحمة .. نعم نزلت كخطوة أولى الكيلوا كان وصل 70 جنيه ، أتمنى تنزل عن كده كمان لكن هذه خطوة إيجابية ، والناس تقدر تفهم من خلاله إنها عايشة في سوق حر بيعتمد على العرض والطلب زي حال كل الدنيا وتقدر تساهم بفاعلية في تسعيرة مواد استهلاكية كثيرة بسلوكيات جماعية على شاكلة المقاطعة

    أخيراً بالنسبة للقبض على الجناة ، نتمنى الخير والصلاح يا مدام منى وندعوا الله لتحقيق هذا الأمر
    عذراً ليست لدي تفاصيل بالمرة في هذا الموضوع لمناقشته لكن كما قُلت لكِ أتمنى الصلاح ومن لا يتمناه !!
    شكراً

    ردحذف
  11. كثيرة هي سلبيات مجتمعنا
    حتى كادت ان تخنقنا


    ولم يزل الكثير

    ردحذف
  12. يا بنتى إرحمى نفسك شوية أعصابك مش كده ..عنده ناس عايزينك
    هتحرقى دمك و برضه مش هيحصل حاجه
    إتسرق البنك المركزى و خلاص اللى كان كان .. لأ و بيقولك التهمة منحصرة فى الموظفين ال13 اللى جوه..ربنا يسترها على الناس

    أنا شخصيا هجيت و الحمد لله

    ربنا يديمها هجة و نعمة

    سلمتى

    ردحذف
  13. مش لاقى تعليق بجد بس عجبتنى اوووى مدونتك وأفكارك وطريقتك وبالتوفيق دائما
    وأتمنى أن تشرفينى بزيارة مدونتى المتواضعة :)

    ردحذف
  14. شكرا لزيارتك لمدونتى المتواضعة وازدادت شرفا بهذه الزيارة وأتمنى أت توافقى على وضعى لمدونتيكى فى المدونات الصديقة حتى أتمكن من متابعة كل جديد لكى . تحياتى لكى :)

    ردحذف
  15. انا مش هقدر انطق اساساً ..!!
    بس بشكل عام يعني ..
    اللحمة محدش هيقاطعها ..
    لأن الناس في مصر عمرهم ما كان عندهم ثقافة التفكير في اتجاه واحد ..!!
    عشان كدة انا شايفة ان التغيير صعب اوي يحصل في مصر ..!
    بالنسبة لكاس العالم .. و اشتراك القنوات ..
    دة بقى بيزنس استغلالي .. مش هنعرف نعمل فيه اي حاجة اصلا .. و لو قلتي للناس يقاطعوها عشان ترخص .. هتلاقي برضه ثقافة عدم التفكير في اتجاه واحد غالبة و مسيطرة بشكل غبي اوي .

    ربنا يعينك على حر الصيف .. و يعيننا كلنا .

    ردحذف
  16. كلام حضرتك فكرني باية ميل جه من مرات اخويا يطلب منى مقاطعة الفواجرا.ولفواجرا هو كبد البط أو الأوز المسمن....احسن حد مخه يروح لبعيد....قلت ليه بقى يا مرات اخويا ..قالت عشان الفرنسيس الوحشين بيسمنو الوز بالعافية....قلت طب ما انا مقاطعها من قبل ما اتولد ويمكن امي ماتت وما سمعت عنها ...حد يقاطع حاجة بيسمع عنها ....نهارك فل

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))