مش عارفة طلبة معايا هرتلة اليومين دول يمكن علشان لسة بيصاحونى على المدفع لان الصيام عندى مستمر فقررت النهاردة أساعد وزارة التربية والتعليم وأضع أسئلة الامتحانات على النت بمناسبة سؤال نأجل المدارس ولا منأجلش والى مالوش فى الاغانى والافلام مش حيعرف يحل بعض الاسئلة بس ممكن يغش من الى جانبه لان الغش مصرح به فى مثل هذه الظروف ولو بنت أو سيدة حتجاوب الاسئلة تتأكد أن معها محرم لانه لا يجوز لها الولوج على النت من غير محرم حسب الفتوى السعودية مع أنهم لسة مفتتحين أول جامعة مختلطة فى بلدهم لسة من يومين بس - أنا شخصيا أبنى قاعد على يمينى والتانى
نايم
نايم
السؤال الاول : المادة الصحة والبيئة
ماهى فى رأيك خطة الحكومة للتحصن ضد أنفلونزا الخنازير فى ظل عدم وجود كفاية من المصل؟
1- توسيع رقعة الرى بمياة الصرف الصحى لتشمل معظم أنحاء المحروسة فتتلوث كل المحاصيل فنأكل ونموت ونريح الحكومة -مع ملاحظة أنه لن يتم التحقيق فى موضوع المياه الا بعد أنتخابات الرياسة 2011
2- أعطاء المزيد من الصلاحيات لسائقى الميكروباص بأن يدهس ما لايقل عن 5 أفراد فى اليوم دهسا أى فرما حتى الموت
3- توصية الاطباء بزيادة جرعات البنج فى أى عملية علشان المريض يتقلب ونخلص منه
4- أصدار فتوى أن الانتحار حلال - راجع فتوى الرشوة حلال
5- كل ما سبق
السؤال الثانى: اللغة العربية الفصحى
أقرأ النص التالى ثم أجب عن الاسئلة
فى كل حى
ولد عترة
وصبية حنان
وكلنا جيرة وعشرة وأهل وخلان
أين يقع هذا الحى فى الوقت الحالى؟
من هو الولد العترة فى ظل التحرش؟
من هى حنان؟ مع أستبعاد حنان ترك وحنان مطاوع
جيرة وعشرة شخصيات كرتونية أذكر فى أى ست كوم تشاهدها
الاهل معروفين اذا فمن هم الخلان؟ حمبوزو لاوى بوزوه أم سيادة اللواء جاركم أم عمال لم القمامة الذين نتشوق لرؤيتهم فى نفس الحى
السؤال الثالث: مادة أنا وأنت والحب تالتنا -مادة جديدة بمناسبة زيادة الحصص
حبيبى يامتغرب قرب على قرب من المقصود بهذه العبارة
هل هى هدى عبد المنعم الايرون يومان أم الكاتبة نوال السعداوى مع شرح سبب أختيارك
كان فيه بنت أسمها ترالالم ضحكتها مش طبيعية
هل هى د\هالة مصطفى أم مشيرة خطاب مع شرح سر الابتسامة الساحرة فى ظل الظروف البائسة
كوز المحبة أتخرم عايزله بنط لحام
أين تجد هذا الكوز فى قرية البرادعة \تل بنى تميم أم فى قرى أخرى
واين يتوفر بنط اللحام فى ظل تصريحات محافظ القليوبية أنه مافيش تيفود يامضللين ده واحد دكتور بيضرب الشهادات
سنرى سنرى مين راح ينهار نهار بعد نهار
على من يطلق هذا التوجيه؟
خبراء العدل أم رجال الاعمال الهاربون بأموال البنوك أم البنوك نفسها – كل ماسبق\لاتوجد أجابة صحيحة
السؤال الرابع : اللغات الحية أنجليزى \فرنساوى
الاسئلة مترجمة لانها سربت
هشتكنا وبشتكنا ياريس
أكتب فى هذا الموضوع فيما لايزيد عن 3 أسطر عن الهشتكة المقصودة مع الاستدلال بالرئيس الايرانى والملف النووى السحرى
أو بأنهيار المترجم تحت وطأة خطاب القذافى ولا يستدل بأى رئيس أخر
الرقص مع الذئاب
بالرجوع الى الفيلم المذكور أعلاه أكتب توقعاتك لمباراة أحفاد الفراعنة مع باراجواى مع شرح لماذا تظهر كلمة فراعنة عند كل مباراة دولية – لو كانت توقعاتك خاطئة لن تحسب لك درجة السؤال الماتش النهاردة
أخيرا أتجرأت وحعلى صوتى عليه
أشرح كيف تكون الشرشحة فى العصر الحديث عن طريق الغناء فى سطر واحد مع عدم الاستدلال بطامورة كنموذج
السؤال الاخير خارج المنهج
هل يتزوج أبن أمل حجازى من بنت نانسى عجرم؟
لن يقوم المصحح بنشر أجاباتكم حفاظا على أرواحكم وأرواح عائلتكم
هذا لو تمكن من قراءتها
أنتهت ورقة الاسئلة
ماتنسوش صاحونى على المدفع
قلمى
كل عام وانتم بخير
ردحذفههههههههههههههه
ردحذفاول مرع اعرف انك ليكى فالكوميدى
بس دى للاسف بيسموها البلاك كوميدى
ه هرتله بس جميله يا منى
ودى نوع جديد فكتابتاتك اول مره اشوفه
موفقه دائما
ايه الجمال ده .....
ردحذفكده اقفل المدونة وانا مستريح لانك عديتينى بمراحل فى اللون الساخر واطمن جدا ان فى ناس لسه بتكتب فى الادب الساخر فى المدونات بالشكل الراقى ده ....
بجد عجبتنى جدا خصوصا ان كل الافكار طازة لانج ....لان كل الناس تناولت مواضيع الاسئلة بشكل ساخر ...بس الموضوع ده جديد جداباحداثه وكمان فى مواد جديدة ماعدتش عليينا قبل كده
الهرتلة المرة دى مالهاش حل ، عايزة اقولك انى ضحكت من قلبى فعلا ودة كان بعد يوم شاق وصعب علية قوى يعنى هونتى كتير على الواحد من خلال اسلوبك الساخر الراقى فى نفس الوقت ، استمرى يامنمن :)))
ردحذفانا فعلا كتبت الهرتلات ديه لاجل أدخال السرور عليكم وأن كانت الاحداث غير سارة بس حنعمل ايه كوميديا سوداء فعلا على رأى محمود - أما شريف فاياك تقفل المدونة وده بعض ما عندكم ياأفندم :) - أتمنى دائما أن أكون عند حسن ظنكم بى يارب
ردحذفملحوظة السؤال الخارجى منقول من غلاف مجلة عربية :)