الأحد، سبتمبر 06، 2009

الهطل


رسخ فى ذهنى موضوعان كنت قد قرأتهما فى الاجازة وقد منعتنى ظروف مرض زوجى من الكتابة عنهما وللحق لم أنساهما لغرابتهما ولانهما يندرجا تحت بند الهطل : والهطل كلمة لا أحبها ولاأعرف لها معنى سوى هطل المطر ولكنها تليق على الموضوع حيث أننى أعتقد أن الهطل هو درجة أدنى من العبط والهبل رغم أننى أعلم أنها كلمة فى القاموس المصرى الحديث الخاص جدا

والموضوع الاول هو عن مؤسسة تدعى كرايونكس أنستتيوت مكانها ولاية ميتشيغان فى الولايات المتحدة الاميريكية والمؤسسة عبارة عن مقابر للتجميد أى أنها ثلاجات لحفظ الموتى الذين يصدقون أن العلم سيصل يوما الى درجة يمكن فيها بث الحياة مجددا فى اجسادهم فيختارون التجميد أملا فى ذلك اليوم – وللتمتع بخدمات المؤسسة ينبغى فضلا عن دفع كلفة مراسم الدفن أن يكون المرشح للتجميد عضو فى المؤسسة ويدفع العضوية السنوية (لحد ما يتكل!!) وأن لم يكن عضوا كلفة الدفن ستزيد طيب هى التكلفة كام؟؟ للعضو 29 ألف و250 دولار (مش فاهمة ايه 250 المحشورة ديه) أما غير العضو فحيتجمد ياعين أمه ب35 الف دولار!!! والمجمدين حاليا 91 من البشر غير 58 من الحيوانات!!!! أنا لما قريت الموضوع فى الاول قلت أكيد هواء البحر لطشنى وسرحت وقلت أكيد أنا بقرأ عن فيلم رعب لكن لقيت أن ده مش فيلم وحقيقة والناس القائمين على المؤسسة دكاترة وعلى أحدث تقنية علمية فى موضوع التجميد حتى أنا
دورت فى النت ولقيت أنها بحق وحقيقى وليست خيال علمى – يعنى هطل على
أسس علمية معملية فذة
وكمان ناس متفائلة وكلها أمل أنها ترجع تعيش فى الدنيا مش فى الاخرةوعجبى

المهم أن الهطل ده فكرنى بفيلم رعب شفته من كذا سنة عن شخصية ليس لها ملامح تدعى جيسون وده كان متجمد فى سجن وكان عوتول فى الاجرام وبعد يجى كام ميت سنة كده صحى تانى ودور فى الناس القتل بطريقة أفلام العنف الاميركية الهطلة التى أمقتها وده بقى موضوعنا التانى وهو أنى بالصدفة البحتة قريت موضوع عملها مجلة مش مصرية عن مشاهدة أفلام الرعب فى الوطن العربى ولقيت حوار مع العديد من الفتيات الى ماشاء الله شابات واعية كده ومصحصحة أى على درجة من العلم والثقافة تقول لك أنا بحب أفلام الرعب جدا لان الافلام الرومانسية ديه مأفوارة (من اوفر بالانجليزى؟؟؟؟) ومش منطقية والبنات الى من بقية الوطن العربى الى مش بيقولوا مأفوار (لانها كلمة مصرية هطلة) يقلن أفلام الرعب أقوى بكثير من الافلام الرومانسية وواقعية وكمان جذابة وبها قصة!!! يعنى البنات ألطف الكائنات لا تحب
الرومانسية وتعشق الرعب ياحالولى طيب أمال مين الى بيحب الرومانسية
الكلمة الوحشة ديه ياااااااااى
اذا كان الشباب متهمين أنهم مش رومانسيين يبقى الى يعرف الرومانسية أكيد المخلوقات
الفضائية الى من الكواكب التانية الى بتطلع فى أفلام الرعب!!! المصيبة أن النسبة ديه كبيرة جدا حتى فى القراءة البنات تقول لك أنا لا أقرأ القصص الرومانسية!! ولاتصدق فيها ولاتظن أنها موجودة فى هذا العصر- مع أن أخو صديقة لى فى فرحه من كام شهر طلب من صاحبه أثناء الفرح الذهاب الى العمارة التى يقطن فيها ويقوم بوضع الورد على عتبة الشقة قبل قدومهما لتكون مفاجأة للعروسة يعنى فيه رومانسيةاهو وفيه أستعداد لها – وأتعجب من حب البعض لهذه النوعية من الافلام اللامنطقية والتى تحتوى على كم بشع من المناظر المقززة والمثيرة للغثيان ولاأعرف أى متعة تكون فى مشاهدة هذا التخلف والتهييس (كلمة أخرى أكرهها جدا)
لكنها ملائمة طحن على هذه النوعية من الهطل ويابنات ياألطف الكائنات وديه دعوة للى بيتفرجوا كتير على أفلام الرعب خفوا شوية وكفاية الجرائم الى تطالعنا بها
الصحف والمجلات ليلا ونهارا بلاش أنتوا كمان تتقلبوا فرانكشتين أو دراكولا والاجدد فى السوق سو نمرة ستة
ومش حأقدر أقول لكم دعوتى الشهيرة لاننا فى رمضان
قلمى

هناك 11 تعليقًا:

  1. صباح الخير يامنى ويسعدنى انى اول تعليق
    موضوع الهطل الاولانى بيفكرنى بمثل قديم بيقول اللى معاه قرش محيره يجيب حمام ويطيره ناس معاها فلوس مش عارفه توديهافين وناس برضه عندها علم مش عارفه تعمل بيه ايه دول يعملوا اختراع اهبل فالهبل التانيين يصدقوه ماهو عودة لفيم المجانين فى نعيم - مش بقول لكو انه فيلم عظيم - كان من بين احداثه برضه توفيق الدقن فتح شركة اسمها الفضاء الخارجى بيبيع ارض القمر للناس اهو دا كان فى الخمسينيات من القرن العشرين
    اما الهطل التانى عايز اجاوب عليه بسؤال هو فين البنات ؟؟؟ هو فيه بنات اليومين دول ؟؟؟ البنات والأولاد حاليا تشابهو مبقاش غير يعنى حاجات بسيطه فيزيقية هى اللى بتفرق بينهم شيشه وتنكيت بصوت عالى ولعب طاوله على القهاوى ناقص ايه من المظهر للبنت ؟؟
    قليل قوى لما اشوف بنت لابسه فستان وقليل قوى لما اشوف بنت حالمه صوتها واطى بتهمس مش بتتكلم قليل قوى لما اشوف بنت بتقرأ روايات عبير مثلا
    يبقى تقول بقى اشوف افلام رعب واكشن يبقى مفيش وجه للعجب هنا
    لعن الله المتشبيهين من الرجال بالنساء والمتشبهات من النساء بالرجال
    معلش طولت عليكى لان البوست بتاعك جميل ويستحق الرد عليه باطول من كده بس مش عايزك تزهقى

    ردحذف
  2. هذا هو غرور البشر بالعلم والتقدم العلمى , ولا عجب مع الامريكان !!!!
    وبالنسبة لل 250 دولار دى دمغة حضرتك !!
    وبالنسبة للرعب فعلا انا مستغرب معظم البنات فاكرين ان الفرجة على الرعب دى بتكسر الحاجز النفسى الموجود عندهم من الخوف الطبيعى الموجود فى الانثى
    ملحوظة
    اول مرة اخد بالى من المدونة الانجليش
    مبروك ولو انها متأخرة جدا

    ردحذف
  3. يا سلام
    يسلم كيبوردك يا منى
    التوبيك ده فالجون وركزى بقى فالبنات اللى بقم مش بنات دول
    والصوت العالى واخيرا اتجرأت
    الفاتحه للرومانسيه
    يارب يارب اتجوز واحده تكون حساسه
    ورقيقه( فيمال) يعنى زى ما الكتالوج بيقول
    بس تفتكرو هلاقى !!!

    ردحذف
  4. السلام عليكم منى
    سعيدة بتحسن احوال
    حلو قوى العنوان
    االهطل

    ردحذف
  5. سلام عليكم
    و كل سنة و انت طيبة
    أشكرك على سؤالك و اهتمامك ربنا يكرمك، بس ليه العتاب؟ أنا لعلمك لى فترة مش عارف أزور المدونات و لا حتى مدونتى فأرجو المعذرة.

    جميل قوى الموضوع اللى اتكلمت فيه و ده دليل على تشوه نفوس و عواطف الأجيال الجديدة و ضياعهم و ربنا يستر و يهديهم.

    و سلامة زوجك ألف سلامة ، يا رب يكون بخير الآن و تطمئنى عليه.

    تحياتى

    ردحذف
  6. فعلا العنوان معبر جداً
    ههههههههه

    تعرفي و أنا صغيرة يعنى تاشارات كدهكنت بحب افلام الرعب بس دلوقت مش بطيقها و بخاف بجد و ابقى عاملة زي الاطفال واستخبى فى اللى قاعد جنبي.
    بالنسبة بقى للموضوع الأول ده عشان العلم كل لما بيتطور بدل الناس ما تفهم اكتر, بتتغابى أكتر.
    و لسة ياما هنشوف ..و عجبي
    سلام

    ردحذف
  7. هشام : رديت عليك فى مدونتك

    شريف : أيوه تحليل منطقى

    محمود : ربنا حيرزقك أن شاءالله بها لانك أنت شخصية جميلة ورقيقة أيضا

    Sonnet: شكرا على السؤال وعلى الزيارة العنوان كمان عاجبنى :)

    د\كافى : الحمدلله على أنك بخير ولم أقصد أى عتاب فقط قلقلت على الاختفاء وحرمانك لنا من مواضيعك الحلوة


    دودو الجميلة: أنا مبسوطة أنك رجعتى تنورينى تانى وقريت تعليقك على مساحة من البوح طبعا لك حق ربنا مايحرمك من أدهم أبدا ويهدى سركما لاخر العمر سلامى له وقبلاتى لاولادك وطبعا قبلة كبيرة لك ياحلوة

    ردحذف
  8. اولا موضوعك جميل جدا



    مش هقولك بقى ان الغرب دول عبط ولا مؤسسة كرايونكس دى بتستهبل ....... لكن هقولك ان فعلا رغم انى مش بحب الغرب الا انى بحترمه ,,,,,, شايل كلمة مستحيل دى من قاموسه


    تانى حاجه الهطل والتهييس وباقى الحاجات دى بتبقى اوقات معبره قوى رغم بردو انى مش انصار القاموس الروش


    على فكره انا مش بحب أفلام الرعب ده انا حتى بخاف اقف جنب امى وهى بتدبح الفرخه .......... محدش يتريق


    رمضان كريم


    وصبح صبح ياست الكل


    المصرى

    ردحذف
  9. والله فعلا معاكى حق
    هوا فعلا هطل

    ردحذف
  10. يا منمن دا انتى دعوتك لذيذة ومش هتتقبل علشان احنا لحد دلوقتى معرفناش ايه هى المعاميع ههههههههههه
    يعنى لو قلتى الهى تتشكوا فى معاميعكم اشك انها هتتقبل هههههههههههههههه
    عموما يا جميلة وحشانى خالص واسفة جدا جدا على تقصيرى فى السؤال عن والد اكرم
    بس سامحينى معلش
    وحشانى خالص جدا
    سلامى ليكى
    والهى يتشكوا فى معاميعهم بتوع الاعلانات اياها هههههههه والله يا اختى بتكسف جدا وربنا وخاصة بقى لو جوزى قاعد معايا الكسفة بتبقى دوبل ههههههه
    تحياتى ليكى ولكل افراد عائلتك جميعا

    ردحذف
  11. هههههههههههههه واشاركك الدعاء للدكتور محمود دا يعنى الظاهر كده معندوش امل يلاقيها واللا ايه ههههههههههه

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))