الأربعاء، يوليو 22، 2009

أنفراد مصرى صميم (تم تعديل بسيط)

نحن (المصريون وليس للتفخيم) ننفرد بتقديم أفخر أنواع السلوكيات :

- الصحبة الحلوة: وهى فى الذهاب الى دكتور الاسنان بالعائلة كلها وممكن الجيران وأولاد الجيران أيضا ماشى الست لازم يكون معاها جوزها أو أى رجل من عائلتها طيب مجرجرة العيال ليه لما هى جايبة معاها حد شايلهم لها طيب ماتسيبهم كلهم فى البيت بدل مايتنططوا ويجروا وفجأة يعيطوا فى العيادة؟؟ وياترى الرجل بيأخد مراته وعياله ليه لدكتور الاسنان رحلة ولا فسحة؟؟؟؟ بجد أنفراد مصرى صميم

- الانتحاريون : فئة من الشعب مش موجودة برضة غير فى مصر وطبعا هم ليسوا من يفجرون أنفسهم فى وسط الناس طالبين الشهادة والى أحنا بعد كده نقعد نفكر ياترى يا هل ترى ده صح ولا غلط لا طبعا مش هم دول لاننا لا نتحدث هنا لا فى السياسة ولا فى الدين لكن الانتحاريون هم ببساطة الناس المصريين الى بتعدى الشارع وهم أنواع:
o الى لازم يعدى على بعد خطوة منك ويشاورلك بكل جرأة علشان تقف له غصب عنك ومش مهم أنت تفرمل والى وراك يلبس فى عربيتك وطبعا لازم يبص لك شزرا قبل مايعدى
o الى بيعدى هو وعائلته وغالبا يكونوا قرطة كده ماشاءالله والعيال تجرى والام والاب معاهم أكياس فى كل أيد ويمكن قراطيس لب أو ترمس وكأنهم فى ماراثون وأهم حاجة أن العيال تبقى من ناحية العربيات وأنت بتتفرج عليهم تحس أنك بتتفرج على السيرك وياسلام بقى لو كان فيه عيل بيتزق فى عربية العيال
o الى بيعدى الشارع وهو مش باصص لك أصلا يبصلك ليه مين أنت علشان يبص لك هو يعدى وياأرض أتهدى ما عليكى أدى
o ونوع أخر هو بقى الى بيستظرف ويقوم ناطط لك فجأة ويعمل نفسه دمه خفيف ويقولك أتخضيت يظهر أنك أتخضيت أنا كنت بضحك معاك وممكن برضة يتفرم وهو بيستظرف بس مش مهم المهم أنه أستظرف وخضك وأنت كده ولا كده رايح فى داهية
o وطبعا فيه أنواع أخرى فرعية لامجال لسردهم هنا علشان ممكن نكتب فيهم قصائد طبعا الانتحاريون دول مش موجودين فى أى بلد فى العالم علشان كل بلاد العالم عندها قانون المرور الى بينظم عبور المشاة مرة واحدة زميلتى لبنانية جت مصر فى زيارة عمل وحبيت أعمل واجب وأفسحها وأول ماركبت التاكسى قالت لى : ييه منى شو هايدا كيف هيك عم يعبر الناس الشارع فى بلدكم - قلت لها بيعبروا بقدرة ورحمة ربنا!!! فيه حد غيرنا عنده أيمان وثقة كده زينا مع أنه مقبل على الانتحار!!!

- المتريلويزيون : وهم بعض شباب وشابات المدونات الذين يكتبوا فى مدونتهم أن أهلهم مطلعين عينيهم وأن أهلهم مش فاهمينهم أبدا وهم غلبوا مع أهلهم وكلام زى المتريليوز حتى أن بعضهم يقدم نصائح للاهل وبأنهم كمان يتقوا الله (دول الاهل) يعنى بأختصار الاهل على بعض المدونات الشبابية الى ربوا وتعبوا فى الشباب تحولوا تحول المتحولون الاشرار الى أعداء خارقين – وسؤال يطرح نفسه هو مين الى أشترى الكمبيوتر ده للشباب الى بيكتبوا عليه وبيدفع ثمن أشتراك الدى أس ال كل شهر مش الاهل برضة ولا يمكن الجيران !! ياترى شعور الشباب والشابات حيكون أيه لو مرة صحيوا كده وفتحوا الكمبيوتر ووجدوا أهاليهم عاملين مدونات وكاتبين فيها قصائد شعر مماثلة عن أولادهم فلذات أكبادهم؟؟؟!!! حينبسطوا ياترى ولا شعورهم حينجرح وعجبى!! مافيش سكر زى الى بينقط من حروف كلمات بعض المدونات الشبابية المصرية على أهاليهم


- أنكر الاصوات : بائعى الخضار والفاكهة وبتاع الروبابيكيا الى بينادوا على بضاعتهم بالميكروفون على أعتبار أن اصواتهم كروان ويقومون بتمارين صوتية قبل الدخول لمسابقة ستار ميكر أو أى مسابقة غنائية وكمان فى عز ما الناس بترتاح فى بيوتها نفسى حد يسرق منهم الميكروفون – عمرك شفتهم ولاسمعت عنهم غير فى مصر!!! صديق عزيز من أصدقاء مدونتى أخبرنى أن بائع الروبابكيا من الفولكلور المصرى (تاهت على ديه)

- الجيرة الجبارة: لو حبيت تعرف أسماء جيرانك وأولادهم خصوصا أنك عمرك ما بتشوفهم ولا بيشوفك ولا حد فيكوا بيسأل عن التانى فما عليك الا الاستماع الى كل من يقومون بالنداء عليهم من تحت بلكونتك أو شباك غرفتك وأكيد حتسمع الاسماء كويس جدا وحتفظها عن ظهر قلب خصوصا لو بينادوا عليهم بعد منتصف الليل ساعتها أنت ممكن تعرف أولادك معنى صدى الصوت لانهم حيسمعوه كتير – المفروض الانفراد ده يتحط فى موسوعة جينسس لانه لا يوجد دولة متحضرة فى الدنيا الناس بتنادى على بعضها من البلكونات أو من تحت البلكونات\الشبابيك غير فى مصر

- النظافة البراقة : العائلات التى تصطحب أولادها الى النادى : النوادى الراقية ويطلبوا لهم بيبسى\شيبسى وسندويتشات ليه عمرهم مايفكروا يقولوا لعيالهم يرموا كيس الشيبسى الفاضى فى سلة القمامة ويحبوا يسيبوا أولادهم يرموه على الاض علشان يفضل يطير فى منظر سريالى بديع على كل الترابيزات الى حواليه لغاية لما يجى عامل النظافة الغلبان يرميه فى سلة القمامة الى لزقة فى ترابيزة العيلة أياها !! طفولة مصرية مافيش بعد كده ولا بقى لو اسعدك الحظ وذهبت الى السينما وبعد ماأنبسطت من الفيلم وأنت خارج بص باصة سريعة على صالة السينما وشوف الزريبة وكلمة زريبة قليلة فشار مرمى على الارض ومهروس بالاقدام وعلب الفشار الفاضية مكفية هى وعلب الكانز – ياترى فى بيوتهم بيعملوا كده أكيد لا بس ده لاننا مصريين وده أنفراد


- مقولات مصرية فى الصميم: ومنها مقولة لا أجدها فى ثقافة أى شعب غيرنا وهو حبك برص وتلاتة خرس!!! يعنى أيه؟؟ هو البرص حيحبنى أزاى أصل الموضوع ده تعبنى من صغرى لما كنت بسمع المثل ده وأشمعنا ثلاتة خرس!! ليه مش خمسة أو عشرة وبعدين دور كده فى كل شعوب الارض مش حتلاقى غير المصريين الى بيتريقوا على أصحاب العاهات حتى فى العيد تلاقى حد ظريف يبعت لك رسالة على الموبيل يقولك كل سنة وانت طيب بمناسبة شم النسيم والتوقيع جمعية مرضى الزهايمر – فيه خفة دم سمجة فى الدينا غير كده لا بجد أنفرادة أنفرادة وحسبى الله ونعم الوكيل – وعاشت الانفرادات المصرية مين يزود؟؟


" قلمى"

هناك 11 تعليقًا:

  1. والله يا منى

    فكرتينى بقصيدة حافظ إبراهيم :

    أُمورٌ تَمُرُّ وَعَيشٌ يُمِرُّ وَنَحنُ مِنَ اللَهوِ في مَلعَبِ
    وَشَعبٌ يَفِرُّ مِنَ الصالِحاتِ فِرارَ السَليمِ مِنَ الأَجرَبِ

    وسبقه المتنبى بقوله:
    وكم ذا بمصر من المضحكات ولكنه ضحك كالبكا

    الاستفزازات كثيرة وأصبحت اللامبالاه عند كثير من الناس

    بس واضح إنك مفروسة من عمايلهم شوية !!

    لكِ كل الود

    ردحذف
  2. رضا: أنا مفروسة لان خسارة حالنا ده بجد أنا بحزن من كم اللامبالاة والاستهتار الموجودين -

    ردحذف
  3. ياه ياه يا منى قد كده شايله ومعبيه

    احنا وبعون الله عندنا كل الانفرادات دى ما شاء الله

    بنروح للدكاتره مع بعض علشان روح الاسره اللى مش موجود غير هنا بس

    حتى واحنا بتعدى الشارع مع بعض وبنخض سائقى العربيات ولو دسونا حتى منزعلشى ليه؟؟؟ مفكرتيش ليه يا منى
    ده لاننا كنا رجاله ووقفنا وقفه رجاله

    حتى بياعين الروبابيكيا يا منى انتى فنانه !!!محستيش ان ده نوع من الفلكلور الشعبى قبل كده ازاى دى عدت عليكى بس

    وحتى واحنا بننده على بعض من الشارع ده بيعزز روح الجيره ويقويها
    بالله عليكى فى اى عماره فاى حته حد من السكان عارف اللى جمبه
    ياه ياه يا منى

    حتى السينما اللى بتتكلمى عنها والنوادى والزباله وكل ده بنعلم بيه ولادنا قد ايه عامل القمامه ليه دور فالمجتمع
    ده دور تربوى يا منى

    واما عن حبك برس وتلاته خرس
    مش عارف ازاى انتى معترضه
    يا منى يكفينى فخر انى اقلك ان احنا الدوله الوحيده اللى عرفت معنى زنقه الكلاب
    على طول نقول مزنوقين زنقه الكلاب
    حد جاله قلب يقول الكلمه دى غيرنا بس

    وده ليه عشان كنا رجاله ووقفنا وقفه رجاله

    ردحذف
  4. حودة : بجد ضحكتنى موت :)))تصدق كانت كل الحاجات ديه تايهة عنى !!!

    ردحذف
  5. منى العزيزة كيف حالك اتمنى تكونى واسرتك بخير ويكون تدريب ابنك ماشى بخير


    شوفى يا ستى طب فى حد فى الدنيا يقول لابنه آسفة( تف على عمو يا حبيبى)
    اعتقد دى انفرادة من انفرادتنا برضه

    الموضوع بقى فى مرحلة خطر يستدعى حملات توعيه على شاشات التليفزيون وعلى موجات الاذاعة ومحطة المترو وفى المدارس والجامعات والمساجد والكنائس الموضوع عايز هزة وصحوة من جديد

    اصحاب العاهات دول من ارق ما خلق ربنا جل وعلا وعندهم ذكاء غير عادى ربنا ميزهم بكده ده تميز مش نقص لكن تقولى لمين مين يقرا ومين يسمع طب ما ياما بيتكلموا متسمعيش منهم الا كل جارح مش كان ساعتها الخرس لهم احسن الموضوع ممكن تكتبى وتتكلمى فيه كتييير قوى قوى قوى
    عاشت دماغك وقلبك الصاحى يا منى

    ردحذف
  6. اضم ضحكاتى لضحكاتك على تعليق د\ محمود ههههههههههههههههههههه

    ردحذف
  7. ماما مازن : نورتى وحشتييييييييييينىىىىىىىىىىىىىىىىى وفعلا أنا مش بحب التريقة على أصحاب العاهات والمرضى بجد حاجة مؤلمة - التدريب خلص الحمدلله وأن شاء الله فاضل تسليم مشروع الترم الصيفى يوم 4 أدعيلوه على فكرة أبنى الكبير نجح لولولوىىىىىى

    ردحذف
  8. بس انتي نسيتي تقولي على لعب الكره في الشارع لغايه 3 و 4 الصبح والصوت العالي لأن مفيش حرمه لليل وعجبي امان يا مصر امان

    ردحذف
  9. السلام عليكم
    مني عنك حق يا ستي
    طيب عيادة الدكتور والعيال صغيرة هتروح فين وع مين ومين يستحملهم غير المرضي اللي في العيادة والتعبان يمشي ويجي بكرة ويوم الاستشارة يغيرها
    اما الطريق يعني حضرتك مش شيفة الزحمة والراجل معاه جيش هيعدي ازي هيضطر يشاور لاي عربية عشان تقف بس والله يامني في ناس زوق زوق زوق وتقف لوحدها وبتقول للناس عدي الطريق خصوصا لو لشخ او عجوز يعني
    اما شباب اليومين دول الفرفير ومش عجبهم اهلهم بكرة يعرفوا قد ايه هما بيحبوهم ويخافوا عليهم
    كفاياة كدة رد ع البوست
    دمتي بخير وود

    ردحذف
  10. هم فعلا اناس يعبثون بحياتنا ويشوهون كل ماهو جميل بحياتنا


    لقد ناقشتي قضايا جدا مهمة


    فهم يتنفسون معنا


    احترامي غاليتي

    ردحذف
  11. waw مبروك القالب الجديد للمدونة

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))