الأربعاء، يوليو 15، 2009

طامورة كمان وكمان

النهاردة كانت حتحصل عركة فى منزلنا العامر بسبب السيد المبجل تامر حسنى وذلك لانى سمعت كلام العيال - وده جزاء الى يسمع كلام العيال – ووعدت أبنى أنى أعطى السيد تامر حسنى فرصة وابطل أنقده بدون سماع أغانيه وخصوصا أن شريطه الجديد هايل !! ومكسر الدنيا ومكسر عمورة كمان وأسمع ولو أغنية قلت له ماشى يا سيدى سمعنى (ياخسارة تربيتى فيك )
وسمعت أول أغنية كانت ماشية بتزق لغاية لما لقيتها أتعوجت ولقيت فنجان الشاى أتدلق على وهو مولع لما سمعته بيغنى ويقووووووووول :
"معقولة أنت الى تشكرى فى جمالى وفى روحى وكمان حسنى حسنى ده أنا الى دايب رسمى فهمى نظمى وفوزى وشوقى لو تحبى (مع تشديد الياء فى نهاية كل ى)!!!! أنا الاول مافهمتش خفت أكون سمعت الكلام غلط فقمت بأعادة الكوبليه لقيته فعلا بيقول كده وأن فهمى رسمى نظمى ده كمان أسم الاغنية – سألت أبنى أيه العته ده قال لى بس المزيكا حلوة!! طيب والكلام قال روشنة!!! ياليلة مطينة بستين جلة!!! رسمى فهمى نظمى وفوزى وشوقى لو تحبى !!! لا وبتشكر فى جماله وحسنه ؟؟ يا نانوس ياحيليوة ياترى حسنك علشان أسمك تامر حسنى ؟؟؟حسن أيه يا أبو حسن؟؟ حقيقى القرد فى عين أمه غزال!!!
طبعا قامت معركة لانى متخلفة لا افهم فى الروشنة فحبيت ألطف الجو وأخليه يشوف أغنية متصورة بدون موسيقى وأبداع الفرقة الى بتغنى فى أنها تعمل صوت مطر ورعد فى مقدمة الاغنية – ولسة ماشفش حاجة لقيته نادى أخوه علشان يتفرج وبعد أقل من ثانية أدونى نظرة: أقرأ الحادثة مقتل أم على يد شابين (أولادها) بسبب طامووووووووووووورة – فقلت لهم أنا أسفة جدا دا أنا بضحك معاكوا ده حتى طامورة عسل وعمورة قشطة مين تانى !!!
أتفرجوأ أنتم على الاغنية أسمها أفريكا- هى أنجليزى ولو عاجبتكم أبقوا سلموا على رسمى وفهمى ولو ماعجبتكوش ابقوا سلموا على نظمى وفوزى وشوقى لو تحبوا !! وخلينا بعيد عن حسنى خالص أوعوا لحسن أروح وراء الشمس -


http://baricko.us/africa.htm

" قلمى"

هناك 8 تعليقات:

  1. ههالة15/7/09 1:04 ص

    لمى الدور يا منمن وحبى رسمى وفهمى ونظمى وشوقى وابعدى عن الشر وغنيلة دة العمر موش بعزقة ياماما

    ردحذف
  2. جميل جدا الفيديو وبالاخص تقليدهم لصوت المطر والبرق

    اما بالنسبة لتامر حسنى فهو ارحم من انهم كانوا يوروكي فيديو لبوسي سمير ولا نجلاء (بتاعة اغنية الحصان عارفاها؟)

    وبصراحة كل اللى بيغنى اليومين دول (اخر تفاهه) واهو كلة كلام يملى وقت فراغ الشباب ويلعبوا فى دماغهم

    ولا حول ولا قوة الا بالله

    تحياتى واحترامي وتقديري

    ردحذف
  3. ههههههههه

    بصراحه انا مسمعتهاش بتاعه نظمي دي

    تعرفي اني لما بعد مع حد من اصحابي او ولاد خالتي بيعتبروني متخلفه

    لما يسألوني بتحبي تسمعي ايه واقولهم نجاة يعدوا يتنهدوا بأة ههههههه

    ويسلام لو قولتلهم اصلي مسمعتش الحاجات الجديدة سمعوني الاغنيه واقولكم رأيي

    دي قمة التخلف بأة ههههه

    بالنسبه للينك رووعه بجد وراقي جدا

    بس فعلا مش اي حد يفهمه يعني انا ممكن اتفرج عليه لوحدي

    متهيألي لو أتفرجت عليه مع حد من بتوع طااامورة هتبقي التريأة للركب :))


    ومش ليكي دعوة بطاااامورة لوثمحتي خلينا جنب الحيط هههه

    دمتي بألف خيررر يارب

    ردحذف
  4. منى
    صباح الفل
    أنا اقترح اننا نشكل تنظيم يكون هدفه الأول والوحيد هو التخلص من طامورة ومش مهم مصيرنا بعد كده أيه كلنا فدا ذوق ولادك يامصر
    أمس خرجنا نتمشى وتسمرت أقدام المفعوص أحمد أمام سينما تعرض عمر وسلمى وراسه وألف صرمة يدخل الفيلم يا بني يا حبيبي ده فيلم قديم بصلي من فوق لتحت وعينيه ملاينة اتهام بالجهل والتخلف وقال ده عمر وسلمى تو
    هو احنا خلصنا من ون لما عملولنا تو
    وسلميلي على فهمي ونظمي وحلمي وخالو معتز بالأردن وطنت سنية بالدويقةوأنكل هيثم بالامارات
    وتو تربتت تو
    منى شكرا على الأغنية ذوقك راقي جدا
    اثبتي على موقفك ولا يهمك تهديد الولاد ولادك دول وأعدك اننا خلال عشرة اتناشر سنة نشكل لجنة حكومية للتخلص من اثار تامورة سلام بقى لفهمي جه

    ردحذف
  5. واضح ياصديقتى انك من مستمعى طرب الزمن الجميل اللى فات وانتهى وشوفى الفرق بقى زمان ( على يعنى ايامى لما كنت صغير علشان انا مش جدو يعنى ) بس كنت اسمعهم تلاقى مين فى نفس الوقت صباح - شادية - ليلى مراد - محمد فوزى - دول بتوع الاغانى اخفيفيه وتلاقى بقى الطرب ام كلثوم - عبد الحليم - فريد الاطرش - عبد الوهاب وغيرهم كتير تبقى مش عارف تسمعى مين ولا مين وكل واحد مميز تسمعى مجرد اول حرف تقولى اه دا فريد مثلا - النهاردة انا علشان منمش وانا سايق العربية بشترى الشرايط اللى هى فيها اغانى متنوعه لمطربين متنوعين اهو خبط فى الدماغ علشان الواحد مينمش من التعب واقسملك بالله تعالى لا اعرف مين اللى بيغنى كله شبه بعضه سواء كلام او موسيقى او اصوات
    ربنا يعينا بس خدى بالك من نفسك علشان هما دلوقتى اغلبيه وربنا يعينك ويعنا وتسمعى نصحتى اشتريلك كاسيت صغير كده وكام شريط من الاغانى بتاع زمان واقفلى الحجرة عليكى واسمعيهم ووطى الصووووت علشان لاتتعرضى لهجوم اسمعى سرقه يعنى

    ردحذف
  6. أصدقائى أنا مبسوطة أن الاغنية عاجبتكم :)) أبنى شاف البوست وقال لى ماما بجد أخر مرة تكتبى عن طامورة وأنا فعلا أخر مرة حأكتب عنه !!!

    ردحذف
  7. لو التليفزيون أعطى فرصة إذاعة أغانى المطربين القدامى كان الشباب اكتشف الفن الحقيقى لكن للأسف مافيش فرصة نسمعهم لذلك أذواق الشباب انحدرت
    وكل ما يذاع حديث فقط حتى الأغنية تاخدلها أسبوعين ثلاثة وتنتهى يكون طلع غيرها وهكذا .

    بس إنتى باين عليكى بتخافى من التهديد
    دى أول زيارة لى لمدونتك . وجيت وإنتى فى موقف صعب تقبلى تحياتى

    ردحذف
  8. منى العزيزة الفيديو تحفه انا بعملهdownload ميرسى لذوقك الجميل ولادى الحمد لله زيي يمكن علشان لسه صغيرين بنتى بتلعب مع بنت عمها فى سنه رابعة ابتدائى قالتلها تعالى اوريكى صور نزلتها ع الجهاز(الكمبيوتر)راحت لقيتها منزله صور طامورة شهقت شهقة كسوف وقالتلها ايه ده يا بت يا نهارك اسود انتى مش مكسوفة قالتلها ليه قالت لها مفيش الله يهديكى يا يارا
    جت يارا تشتكى قولتلها الله يحرقك انتى وتامر فى ساعة واحدة
    البت فى سنة رابعها وامها فرحانه انها بتنزل صور تامر مش تقرص ودانها لا عادى فعلشان كده احب ابشرك بما هو افظع من تامر ونقعد نقول ياريت ايامه دامت الادب والذوق والاخلاق هههههههههههههههههههههههههههههه

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))