الجمعة، يوليو 24، 2009

وَأَمَّا بِنِعْمَةِ رَبِّكَ فَحَدِّثْ-تحديث لزم التنويه عنه

==================================================================
تنويه:
هل تذكرون بوست مدونة صديقة الخاصة بحازم النبراوى - قام حازم مشكورا بعمل الموضوع التالى بصوته ونشره فى مدونته - الصراحة أنا نفسى العالم كله يسمعه لان فيه ناس كتير بتكسل تقرأ فيبقى على الاقل تسمع علشان تفتكر النعم وتحمد ربنا عليها - حازم جزاك الله كل خير
http://arabfreeradio.blogspot.com/2009/07/blog-post_26.html
===================================================================

أنا بصدق فى الاشارات (مش أشارات المرور) لا لكن ساعات بتحصل كذا حاجة وراء بعض كل حاجة مالهاش علاقة ببعض لكن بتكون بالنسبة لى علامة تخلينى أفكر فى موضوع معين وبرضة بتخلينى عايزة أكتب عنه وأشارك اصدقاء مدونتى فيه - يعنى مش بتكون خاطرة خاصة بى -
الصورة الى على شمال الكتابة تم ارسالها لى من شخصين مختلفين تماما ومحدش فيهم يعرف التانى لكن التعليق على الصورة كان واحد وهو الحزن على عدم الرضا - رغم للوهلة الاولى قد نظن أن الصورة كوميدية حيث تنظر السيدة العجوز للشابة وتتمنى قوامها والشابة تتمنى الماس الخاص بالسيدة العجوز بينما الشاب يتمنى أموال الرجل العجوز ويتمنى العجوز زوجته - وللاسف أن عدم الرضا أصبح ظاهرة عامة لا تخص فقير دون غنى أو شاب دون الشخص البالغ لا وفى لقائى الشهرى مع صديقات العمر وجدت أننا تحدثنا عن نفس الموضوع كما أنه أصبح يشغل بال الكثيرين مع تمنى زوال هذه الظاهرة بأسرع وقت وقد تعرضت صديقتى للسرقة فى مجال عملها (شركة مالتى ناشيونال يعنى ماشاء الله كل الناس فيها مرتباتها كويسة والحمدلله) وقد تم سرقة الخاتم والدبلة من على مكتبها بعد أن خلعتهما للوضوء ونسيت أرتدائهما قبل الذهاب لفرصة الغداء - والذى لا تعرفه السارقة التى هى زميلة أن صديقتى أبتاعت هذا الخاتم بعد أن قبضت جمعية وكان نفسها فى الخاتم ده بس طبعا محدش يعرف كده لكن السارقة وهى رغم أنها تعمل معها وعلى نفس المستوى على الاقل المادى سرقتها ليه؟؟ هل لانها فقيرة لا ؟؟ (الفقر ليس مبرر للسرقة) لكنه عدم الرضا - يعنى الحمدلله يبقى عندى وأبص للى مع غيرى - لان محدش عجبه حاله وحالة غيره الى بتحلاله - ومعظم الناس مش راضية بحياتها ولا راضية بلى ربنا قسمه ليها والنهاردة أنا شاهدت أخر فقرة من برنامج الدين والحياة للشيخ خالد الجندى كان بالصدفة بيقول أننا بنألف النعمة ونعتادعليها وننسى نحمد ربنا على النعمة أصلا ونشكره عليها فلما يحصل أى تغيير تبقى صدمة يعنى الى معاه فلوس النهاردة يعتبر أن ده حق مكتسب يعنى بكرة برضة لازم يبقى معاه فلوس فلو حصل له أى حاجة يتصدم أفتكرت عالطول المهندس شريف الى قتل زوجته وأولاده لانه أصبح عليه دين وخاف على أسرته من الفقر لم يعطى نفسه فرصة التفكير ولو لحظة فى أن ربنا العاطى الوهاب وفى أخر الحلقة كان الشيخ الجندى بيقول للمشاهد أحمد ربنا على نعمة البصر أحمد ربنا على نعمة أنك مش بتغسل كلى أحمد ربنا أنك عايش وبتسمعنى و خلصت الحلقة - عارفين أنا فكرت فى أيه أنى أجيب ورقة وقلم واكتب كل النعم الى ربنا أنعمها على وفكرت أنى اقولكم الفكرة ديه كمان لان يمكن صحيح الحمدلله مافيش مننا حد بيبص للنعمة فى أيد غيره ورضى بقسمته لكن ساعات بيسهى علينا أننا نشكر ونحمد ربنا على نعم كتيرة جدا أنا حأكتب لكم على 10 نعمة من النعم الكتيرة الى أنا باقول الحمدلله أن ربنا كرمنى بها وأنا فعلا كتبت النعم فى ورقة عارفين كتبت كم واحدة 50 أيوه ولو قعدت وفكرت شوية حلاقى أكتر أنا الورقة حكملها بالليل وحأعلقها عندى على الثلاجة علشان كل الى فى البيت يشوفها جربوا أكتبوا كده وشوفوا حتلاقوا كام حاجة أنا تقريبا كنت شفت بوست عند حد بخصوص موضوع أننا نكتب النعم ديه بس معلش وماله لما نتذكرها تانى وتالت ورابع والى أخر العمر
الحمدلله
1- أنى مسلمة وديه أكبر نعمة فى الدنيا
2- أنى مصرية يعنى مش فى بلد من البلاد التى لا تنتهى فيها الحروب
3- أن كل حواسى الخمسة سليمة وبأستعملهم فيما يرضى الله وأنى فى صحة جيدة مهما أشتد بى التعب
4- أن ربنا رزقنى بأولاد صالحين يعرفوا الرضا بما يقدمه لهم أهلهم حتى لو بسيط
5- أن ربنا أعطانى ميزة التخيل والابداع
6- أن الحمدلله استطيع التحدث والقراءة والكتابة بلغتين أجنبيتين غير العربية
7- أنى كان نفسى أروح عمرة وربنا رزقنى بها السنة الى فاتت كأحلى مفاجأة
8- أن زوجى رجل صالح وأهل زوجى ناس طيبين وربنا يكرمهم جميعا
9- أن صديقاتى يعتبرونى قدوة لهم وبيحبونى حب من القلب لا تشوبه أى غرض يعنى الحب فى الله
10-أننى سافرت بلاد كتيرة وأستفدت فى سفرياتى

أنا كتبت البوست ده لى للتذكرة بكل نعم ربنا على وعلشان أذكركم أنتم كمان - وعلى رأى كلمات الاغنية الشبابية المشهورة اليومين دول:
قوم دور جوة نفسك خاليك واثق فى نفسك حتلاقى ميزتك حاجة مافيش حد فيها ينافسك - ميزتك ديه هى نعمة من نعم ربنا عليك الى كل واحد فينا أكيد موجودة جواه (ممكن يكون مش واخد باله منها) ومحتاجين أننا نحمده ونشكره عليها
" قلمى"

هناك 14 تعليقًا:

  1. فيه جملة فى حديث قدسى شدتنى جدا وهى:" وان رضيت بما قسمته لك ارحت قلبك وان لم ترض بما قسمته لك فوعزتي وجلالي
    لاسلطن عليك الدنيا تركض فيها ركض الوحوش في البرية ولا ينالك منها الا ما قسمته لك وكنت عندي مذموما"
    اظن دى قمة الجلال الربانى ربنا قال ان الرضا هو سبب راحة القلب ولكن بجد الرضا صعب جدا فى الزمن ده ولكن تكفى المحاولة بجد ربنا يوفقك يا منى لانك انسانه جميلة بمشاعرك الراقية ومنى سلام
    مصرى دائما

    ردحذف
  2. صدق الله " وإن تعدوا نعمة الله لا تحصوها "

    كما قلتى فعلاً أننا عندما نألف النعمة ننسى أن نحمد الله عليها
    فالحمد لله على نعمه التى لا تحصى
    والحمد لله أن أعطانى الفرصة لكى أقرأ هذا الكلام وأحمده على نعمه

    منى
    متعكِ الله بالصحة
    وتقبلى تحيتى

    ردحذف
  3. السلام عليكم
    فعلا مش شرط الفقر يكون سبب السرقة علي فكرة ممكن يكون مرض نفسي

    اما عدو الرضا والاقتناع بما رزق به الفرد ده اكبر نقمة الحمد لله علي كل شيء بس الانسان مجرد انه بيحلم ويتمني من ربنا دون النظر لما متع به غيره والحمد لله والشكر لله علي كل شيء
    بس انت عندك اولاد ايه ربنا يخليهملك وتفرحي بيهم

    علي فكرة يامني انهارده في المسجد كنت بصلي العشاء وبنت موبايلها ضاع واتهمت ست عجوز يعني كبيرة في سن مامتها

    واسرت علي تفتشها وطلعت بريئة من تهمة السرقة وكان حد اخد الموبايل وخباه في الحمام عيل صغير
    المهم ان الست المظلومة صعبت عليا قوي وفضلت تبكي ةتقول انا اتفتش انا اتفتش

    كان نفسي اخد لها حقها بس احترمت المكان اللي مليء بالصوت العالي وصلت العشا وتركت المسجد
    ده موقف لسه امبارح

    دمتي ودامت مواضيعك الشيقة

    ردحذف
  4. مصرى دائما: نعم الرضا صعب جدا فى الزمن ده بكل الاغراءات الى حوالينا بس لو نذكر بعضنا وكمان نجاهد نفسنا أن شاء الله ربنا حيكرمنا جميعا وأشكرك على زيارة المدونة -

    رضا: الحمدلله على كل نعمه عليك وذكرك دائما بها

    ذكرى (رهف قلبى) الحلوة:لاحول ولا قوة الا بالله الظلم ده شىء بشع - أنت عارفة صديقتى لم تبوح لى أبدا بأسم الزميلة لانى كنت أعمل معهم قبل ترك العمل وهى حزينة مش علشان ضياع الخاتم لكن لان ده يكون تصرف زميلة والموقف ده عمره ما حصل معانا طوال 14 سنة لكن هى أنتقلت لفرع تانى وحصل لها كده وأيوه أحيانا بيكون مرض نفسى بس فى حالتنا لا أظن - والله أعلم ربنا يساعدنا جميعا ويذكرنا جميعا-

    وربنا يخليكم ويحفظكم جميعا وديه كمان نعمة نعمة التواصل مع ناس طيبين مثلكم

    ردحذف
  5. يارب
    اللهم انى اشهدك انى راض عنك
    اللهم ارضنى وراضنى وارض عنى
    رضيت بما قسمت لى وكيف لا ارضى
    وقت سترتنى بسترك الجميل
    ورفعتنى بين الناس
    اللهم ان نظرت لما فى يد غيرى
    فليس احتجاجا على قدرك
    انما هو ضعف نفسى
    اللهم لك الحمد حتى ترضى
    ولك الحمد بعد الرضا
    ولك الحمد ابدا ابدا

    متشكر ليكى يا منى ويارب نفكر بعض دايما بالنعم اللى احنا فيها

    ردحذف
  6. بارك الله فيكى يا مدام منى انك فكرتينا بنعم ربنا علينا
    اللهما ارزقنا الرضا ....يارب
    والله لسه كنا لسه بنتكلم فى الموضوع ده فى ندوة صغيرة عن رضا الانسان باختياره
    واعجبت بكلام احدنا بان نهاية دعاء الاستخارة ( واقدره لى وارضنى به )
    لان الرضا بالشىء اهم من ان يحدث

    ردحذف
  7. الدكاترة: حودة وشريف - ربنا يرضيكم جميعا ويرضى عنا وعنكم يارب وأنا فعلا ده كان غرضى من كتابة البوست وهو أن كلنا نتذكر النعم لانها فعلا نعم الله علينا لا تحصى هى بس عايزة تذكرة صغننة

    ردحذف
  8. الواحد مبيحسش بالنعمة الا لما بتروح منة

    وربنا انعم علينا بحاجات كتير لازم نبصلها ونشكرة وأكيد الشكر دة اللى بيحقق الرضا

    دمتى بكل خير وسعادة

    ردحذف
  9. ايه الرضا ده
    ربنا يديم عليكي نعمه و يرضيكي دائما.
    الرضا في الزمن ده بقى صعب قوي بس أكيد كل ما نفكر نفسنا بالنعم الكتيرة اللي احنا فيها نحمد ربنا و نتكسف على دمنا و نرضى بما قسمه الله لنا.

    أديني جيت و آسفة على الغياب بس أنا مش في البيت بقالي كام يوم عند بابا.
    منتظرة دايما جديدك إن شاء الله.
    سلام

    ردحذف
  10. آه يا منى الرضا نعمة ما بعدها نعمة سبحان الله نعمه لا تحصى ولا تعد
    فاكرة فى بوست مشابه عملته دعاء وعملت دعوة اننا نعمله فى مدوناتنا كتذكرة لينا بنعم ربنا علينا
    الرضا يا اختى بقى عمله نادرة الناس بتنسى تحمد وتشكر وفعلا بتالف النعمة وتنسى تشكر المولى عز وجل عليها يعنى فى حد بيفتكر يقول مثلا الحمد لله على نعمة النظر صعب شوية تلاقى وهكذا
    اللى يغيظك بقى ان واحد يكون ربنا اعطاه النعم والفلوس والمنصب وتلاقيه يشتكى لطوب الارض ومعندوش رضا برضه طب ده تقوليله ايه وتقوليله احمد ربنا كل واحد مبياخدش اكتر من نصيبه يقولك نصيب ايه طب ده تقوليله ايه
    تقولى ربنا يهديه
    ربنا يراضينا ويرضى عنا آمين

    ردحذف
  11. دودو وحشتينى وقلقت عليكى الحمدلله أنك بخير ويجعل بيت أبوكى دايما عامر بكم يارب ويخليه لكم ويخليكم له - يلا أنا مستنية كتاباتك - الحمدلله بصى أنا شفت حاجات كتيرة صعبة فى حياتى وهى الى علمتنى أنى أرضى بالقليل وأنى أبقى مستعدة لاى صدمات - وطبعا أخرها سيابان الشغل وخصوصا أنه كان بيدخل مورد لنا كويس جدا بس لانى عودت نفسى من زمان وده مش رياء ولا كبر بس ديه حقيقة أنا بحاول أكون راضية وأفتكر نعم كتيرة خصوصا لما بأشوف بعض من الى حواليا ماشاء الله أحسن منى بكتير ومع ذلك الشكوى عندهم لا نهائية - ماتغيبيش علينا ياقمرة وسلامى لاسرتك -

    ردحذف
  12. ماما مازن : بصى أنا مش حاقولك غير حاجة واحدة ارد بها على تعليقاتك الجميلة الى جتنى بعد مارجعتى من الاجازة ربنا دايما يطرح لك البركة ويجعل حياتك وحياة أولادك فى سعادة لانك فعلا ماشاءالله نحسبكى على خير أنت عندك مقدرة على أسعاد الجميع ويكفينى أنك قعدتى تقرأى كل البوستس بعد مارجعتى من اجازتك - اما طامورة أبنى حاطط صورته وال بيبر على الكمبيوتر برضة :)))) ياهاااااااى :)))مواااااااااه

    ردحذف
  13. آآآآآآآآآآآه مبروك على المدونة الجديده و زعلانة عشان ماقلتيش.

    ردحذف
  14. ما أجمل هذا الموضوع ! تعرفى يا منى ان الرضا من أهم الامور التى يشعر فيها الانسان بالامان النفسى ، وقد قرأت فى احدى الكتب الدينية ان أقوى أنواع الرضا ليس فقط ان يرضى الانسان بما كتبة اللة لة فى الدنيا من صحة وعافية ومال وجاة وخلافة بل هو الرضا عند الابتلاء ، اللهم ارزقنا الرضا بكل ما كتبتة لنا يارب العالمين

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))