الجمعة، يوليو 10، 2009

الســـــــــــــــــــــــوق



















البوست >كخ يابابا< أثبت لى أن أحيانا نحتاج الى بسمة وشوية سكر فى حياتنا فكل التعليقات ركزت على كخ والجاكوزى بشكل خاص ولم يعلق أحد أننى عاطلة عن العمل وأبحث عن وظيفة لتعودنا على هذا النوع من المشاكل وكفاية نقرأ عنها - المهم الرواقان أنتهى والويك أند كمان (أنا عندى الايام كلها ويك أند!! ) تفتكروا صور السيارات الكثيرة الى فوق ديه ايه؟؟؟ هذا ما يدعونه بسوق السيارات - طيب ما علاقتى بالسوق – السوق موقعه مدينة نصر قبل الحى العاشر ممكن تقرب شوية من الصور حتعرف أنى أنا مصوراها من شباك الصالون عندى أى أن شقتى بتطل على هذا السوق البديع الذى يقام كل جمعة وأحد من حوالى 7 سنوات – ولقد ارسلت أنا وكل سكان حينا شكاوى باللغة العربية الفصحى والعامية الى جميع الصحف والمجلات لنقل هذا السوق من حينا ولا حياة لمن تنادى وللان لا نعرف مصير الشكاوى و لم تم أختيار حينا التعس ليكون مكان لسوق السيارات– ففكرت أنى أكتب عنه هنا لعل وعسى حد يدخل عندى من الناس الى بتراقب المدونين ويقرأوا عن معاناة سكان الحى السويسرى بمدينة نصر الى هو أحنا وطبعا الحى لا يمت لسويسرا بأى صلة ولاأعرف سر تسميته بهذا الاسم الا لخداعنا فقد علمت أن الشركة المسئولة عن أعمال البناء كانت سويسرية ولم تتم المشروع ورحلت وتركته اسود على أدمغتنا وكتر خيرهم سابوا لنا الاسم لكن أصلا أحنا تبع التعاونيات أى الحكومة أى ليست أهالى – ما علينا نرجع للسوق – كانت هناك ارض فضاء بين مشروع أ ومشروع ب – حاطين فيها أعمدة كهرباء الضغط العالى ومرة صحينا الصبح وجدناها مسفلتة قلنا خير يمكن شافوا شباب الحى بيلعبوا كورة فيها يخرجوا طاقتهم ونشاطهم فحبوا يعملوا لهم مفاجأة ويجهزوها ملاعب بدل ما الشباب كل مرة يا عينى تجرجر الاجوان معاها كل ما تيجى تلعب – صباح ثاتى وجدنا سور يحيط بالمنتيقة (المنطقة) – الصباح الثالث الجامد بقى لقينا بتاع الترمس وبتاع الفول وبتاع الهريسة الى بيجى من اسكندرية بميكرفون وبتاع الامشاط والفلايات وبتاع الشرابات وكل ما يمكن أن تتخيلوه يبدأ بالصياح منذ الساعة 7 صباحا ووفود السيارت تبدأ تهل على حينا الى مالوش زى ده غير انك تصحى الصبح على اصوات شبيهة بصوت الدبابات المدرعات كأنها على أهبة الحرب وهى أصوات العيال التى بتجر تلاجات الحاجة الساقعة وصناديق البيبس علشان تبتدى تنظم المكان– وبعدين تسمع صوت صوت الملاعق فى صوانى الشاى حد عايز شاى حد عايز شاى وصوت المعلقة والله يطرقع طرقعة تخرم نافخوك – ووالله حتى لو كانت حوائط شقتك عازلة للصوت كل الاصوات ديه كفيلة بتحطيم هذا العازل-
والسوق يسبب أزمة مرورية خانقة تبدأ من أول عباس العقاد وأول الحى السابع الى التجمع لان اصحاب السيارات أقصد بعض منهم قول معظمهم بيهربوا من فيزيتة السوق 10 جنيه ويركنوا برة السوق ممكن على الارصفة بتاعة العمارات وفى الشوارع بتاعة الحى فلا يمكن التحرك فى هذه المنطقة من الساعة 8 صباحا والى أن شاء الله بعد صلاة المغرب ويوم الاحد أيام المدارس مرة فضلت فى التاكسى من أدان المغرب لادان العشا فى نفس المكان لا نتحرك وده أيام الاحاد
يوم الجمعة يوم السوق الرئيسى أنت تعتبر فى عداد الاموات فى بيتك زى أيام حظر التجول كده– أوعى تفكر تنزل تشترى أى شىء لانك مش حتعرف تمشى فى الشارع اصلا ولو مشيت حتلاقى العالم كله بيتفرج عليك كأنك أنت الدخيل وهم وجودهم طبيعى ولو خرجت لن تجد أى وسيلة مواصلات لنقلك الا لو كنت محظوظ أوى ومامتك فعلا بتدعى لك فممكن تلاقى بعد ما تقف كده يجى نصف ساعة أو ثلاثة أربع ولو عندك عربية أنسى خليك فى بيتك احسن لانها مش حتتحرك ولو أتحركت حتمشى بسرعة السلحفاة وطول ما أنت ماشى تلاقى الى بينادى عليك باسم العربية يا فيات يا تويوتا يافيرنا يا يا يا -------- تبيع!!! ولا يمكن أن يزورك أحد فى هذا اليوم لانه سيلعن اليوم الذى أتى فيه لزيارتك (ده لو وصلك) ولو وصل موال بقى أيه الزحمة ديه أيه المنتيقة (المنطقة) ديه أووف أووف أووف (ما كانوش بيقولو كده قبل السوق) طبعا مع خلفية الراجل بتاع العرقسوس فى الشارع وبتاع التين وبتاع لعب العيال!! حتقترحوا على أعزل بس أزاى لو بعت الشقة فلوسها عمرها ما حتجيب شقة عدلة تانية للاسف وبعدين عمرنا كله فى الشقة ديه سوق زى ده يخرجنا منها؟؟؟ طبعا لا تنسوا انه يوم الصلاة وأهالى الحى لو شاطرين وعايزين يلاقوا مكان فى الجامع يقعدوا فيه من بعد صلاة الفجر المهم و بعد الصلاة يبقى حد جدع لو عرف يخرج من باب الجامع من زحمة البائعين الذين يفترشون رصيف الجامع وكمان تلاقى خناقات بالهبل وشتائم أيه بقى يا ما شاء الله يعنى الى ما يشترى يتفرج قاموس والله ممكن تتحط فى موسوعة جينيس مع الكم الهائل من المشاجرات (وجارنا فى الدور الارضى لازم كل جمعة يتخانق مع حد من السوق من علامات اليوم المميزة) ولا الاغانى الى دايرة على كل لون شعبى وعمرودياب وكمان يشغلوا قرآن جنب الاغانى فى نفس الوقت ولا ده سامع ولا ده سامع وأحنا الى بنطرش!! السوق فيه كل أنواع البشر(غير البائعين والمشترين والسريحة ) يعنى تلاقى لصوص وبلطجية وحشاشين ويظهروا بعد انصراف العساكر وعادة ما يؤنسوا أهل حينا حتى يوم الاثنين أى بعد سوق يوم الاحد الى بيكون أخف زحمة -

ولو أنت بتحب الافلام والمسلسلات ممكن يصلك أى حوار تريده من غير تعب أنت بتسمعه غصب عنك حتى لو قفلت الشباك -الاسبوع الى فات كان واحد بيكلم واحدة عن مراته على الموبابيل وبيقولوها أنا بقى حاطلع عينيها والخ وأكمل أنت السيناريو المؤدب – وتشوف كم السيارات تقول كل الناس ديه جاية تبيع وكل الناس ديه جاية تشترى لحد ما أبنى قال لى على فكرة ياماما السوق ده بقى نزهة ومصيف يعنى الواحد بيجيب مراته وعياله والشمسية ويقعد حتى بصى على القهاوى الى أتفتحت أنت مش سبتى الشغل ما تيجى نفتح مطعم صغير فيه (أتكسف يقول قهوة)؟؟؟!!! الحقيقة النهاردة فكرت أعمل مشروع تانى وهو أنى أجيب شوية رمل من أسكندرية ومياه وأخلى حد يعملى أمواج أصطناعية وأعمل للسادة مرتادى السوق بلاج اه والله حتة كده على جنب يا أسطى– وأسميه بلاج منى وأخلى العيال واحد يبيع عوامات والتانى كراسى وشماسى وأنا أقطع لهم تذاكر!!!

المصيبة بقى فى شكل السوق بعد ما الناس تمشى يعنى أنا أسفة للفظ لو فيه كلمة أقذر من مزبلة كنت كتبتها وللاسف بيسبوا السوق قذر كده لغاية يوم الاحد لان فيه سوق تانى هم حينضفوا مرتين – فعبارة النظافة من الايمان لم تصل لمرتادى السوق ولا على القائمين عليه - ولا استطيع تصوير المنظر لكم لشدة قبحه

السؤال الاول : جهابذة التخطيط فى حى مدينة نصر أو معرفش مين المسئول عن هذه المهزلة الغير كوميدية ياترى معلش فى السؤال هو انتم قبل الشهادات الجامعية أتعلمتوا أن سوق سيارات يوضع داخل مربع سكنى يا بعدة أقول أيه بس علام ايه ده؟؟


السؤال الثانى: أكيد مرتادى السوق والقائمين عليه لايعرفون معنى تلوث سمعى وبصرى وبيئى؟؟؟ وهل مخلوق فكر فى كم الامراض الى ممكن تنتشر فى الجو الجميل الصيفى ده؟؟؟


تفتكروا فيه حد مسئول ممكن يقرأ البوست ويرأف بحالنا والله أحنا مش محتاجين غير نقله لمكان أخر مكان يلائمه ويلائم السيارات بعوادمها الى الحمدلله أنا وزوجى وعيالى نعانى من حساسية لاستنشاقها كل جمعة وأحد من سنين وأكيد الكثير من سكان هذا الحى الى مش جميل خالص يعانون من نفس الحساسية الصدرية-
بس ياسلام لو حد مسئول يجى يسكن فى حينا فالحى السويسرى يتحول الى سويسرا حقيقى يارب !!!؟؟؟؟

أصلنا لو بطلنا نحلم نموت - ومش كل الايام جاكوزى ولا كل الى ساكن فى مدينة نصر الناس تنق وتقر عليه ويقولك ياختى ساكنين فى مدينة نصر!!!
أبقوا تعالوا بس يوم الجمعة :)



"قلمى"

هناك 13 تعليقًا:

  1. أول مرة أكون صاحب أول تعليق حاجة حلوة

    جميل قوى النقل الحى و المباشر بالكلمة و الصورة كأنك مراسة و مصورة و محررة فى نفس الوقت، برافو.

    عندى ليكى طريقة لحل المشكلة و تحتاج منك لإتباع الخطوات الآتية:
    1 - تتعرفى على حد حرك و مدردح فى الحزب الوطنى
    2 - قوى معرفتك بيه و عرفيه إنك ممكن تكونى انسانة مفيدة و تعرفى تخلصيله مصالح شخصية ليه هو و مافيش مانع من الهدايا.
    3 - تستغليه لتعريفك بناس مهمة فى الحزب
    4 - و من ثم تستغلى سلطاتهم لدعمك فى دخول الحزب.
    5 - كونى عضوة نشطة فى نفاق و تملق القيادات علشان ياخدوا بالهم منك و يراعوك.
    6 - إعملى اللى إنتى عايزاه فى البلد و الناس لأنك خلاص بقيتى محميةو إستغلى الحماية فى إكتساب كل ما تستطيعين من أموال و أراضى و إلخ إلخ
    7 - تحولى إلى شخصية مهمة فى الحزب
    8 - أكيد القيادات ستهتم بوضعك فى منصب يليق بيكى و تكونى إنت نفسك مسئول مهم.
    9 - بالطريقة دى تستطيعى أنت شخصيا أخذ القرار بحل مشكلة سوق السيارات اللى مضايقك و الكل يقول سمعا و طاعة.

    بس المهم تفتكرى لو إنت وصلتى للمرحلة دى هل ستحلى المشكلة أم أنك ستتركى المنطقة و تريحى دماغك؟

    ردحذف
  2. اها يا ترى مين بيحقد ويقول ساكنين فمدينه نصر وجاكوزى وبتاع...... الناس مسبتشى حد فحاله.... لا حول ولا قوه الا بالله..... يا ترى الكلام على مين؟!!

    ردحذف
  3. عارف ان مش كل الناس اللى ساكنه فمدينه نصر مرفهين واعرف مناطق كتير فيها يمكن اتعب من وصفك لمنطقتك ..... بلاش مدينه نصر انا كنت بروح الزمالك علشان ساقيه الصاوى انبهر بالمكان وهو يدوبك عند منزل الزمالك بس متلاقيش حد ماشى على رجله والحياه لطيفه والارض بتلمع وحاجه فل اتمشى شويه الاقى الجانب الاخر من الزمالك وحتت غريبه... فمره كنت بروح عياده فالدقى وما ادراك ما الدقى فقلت اشرب شاى ولان الشاى فكافتريات الدقى سعره مختلف مش عارف ليه فى فرق عمله باين هناك قلت اتمشى شويه يمكن الاقى قهوه راحت رجليه موديانى فحتت غريبه حسيت انى فعشش كده وعشوائيات وحاجه عسل ولقيت رجاله كده واقفين على اول الشارع وبيبصولى اوى فقلت يا واد ميهمكشى ادخل انت ناوى خير ده شاى اتارينى دخلت منطقه فيها قهاوى وفيها عرض للافلام الاباحيه وفيها بنات قاعدين وحاجه تكسف وده كان الجانب السىء من الدقى...... بلاش امشى فشارع السودان وميدان لبنات تحسى بالروقان والرفاهيه كملى بقى شويه لحد ارلاض اللواء هتلاقى حجات عسل حيث المواصله الاساسيه هى التكتك والزحمه اللى تزهق....... طولت عليكى انا عارف

    بس كنت عايز اوضحلك ان كل منطقه فيها كده وكده الحمد لله احنا كنا زمان قاعدين فساقيه مكى وربنا كرمنى (بطنطتى) حيث الهدوء والروقان ومحدش بيجرى على الاتوبيس....

    بالنسبه لموضوع السوق متياسوش من الشكاوى لان ده حقكم حقكم فعيشه نضيفه وهدوء احنا بنتكلم فابسط اشكال الحياه مش جاكوزى وبتاع...ز متتنزلوش ومتزهقوش ومتعزليش من مكانك برده انا كنت رحت مع خالى السوق ده وعارف شكله كويس فعلا زى ما وصفتى وربنا يعينك بجد

    ردحذف
  4. حودة : ياترى مين مين مين؟؟؟؟!!!

    د\كافى : شكرا لمرورك وكمان أول تعليق لا أنا الحمدلله لا أعرف استغل حد ولا أنافقه وفى الغالب لو رحت عندهم حتسجن وانا لا أتصور نفسى ابدا فى منصب قيادى لانى لا اعلم ما يمكن أن يحدث قالقلوب متقلبة ولا أتمنى من الله سوى تثبيتى أن لا يغيرنى أى شىء مادى زائد عن الحد كمنصب أو غنى فاحش فى هذه الحياة بس لو يأيدى أعمل حاجة من غير منصب حأعملها من غير استغلال ولا نفاق وأكيد فى وسيلة أن شاء الله و اشكرك مرة ثانية

    ردحذف
  5. شقة ايه اللي تبيعيها لاأ طبعا هما اللي يمشوا.و أكيد مصير السوق ده النقل إلى مكان آخر لما هيضيق عليهم أكتر و الشكاوى تكتر عن كدة.

    آه بالنسبة لموضوع الشغل انتى عاوزة تفهميني ان واحدة بدراستك وشهاداتك مش لاقية شغل ازاي دي البلد كلها شغل تلاقيكي انتى بس اللي مش بتدوري كويس دى حتى البلد كلها فرص....مش عارفة ايه الشعب ده
    ههههههههه
    ربنا يوفقك يا رب ويخفف عنك الصداع ويزيح السوق من عندكم..قولى آمين

    ردحذف
  6. دودو : بأدور ده أنا قدمت وبعت يجى ل100 شركة والله بس معلش الارزاق بيد الله ومحدش عارف الخير فين والحمدلله فرصة جميلة للهدوء والتأمل والتفكير - أشكرك يا جميلة

    حودة : ما أنا عارفة ديه جملة بس لزوم أن الناس فكرة أن مدينة نصر ديه او لالا - أنا عندى ك 4ونصف وعزبة الهجانة وصقر قريش وشوية مناطق عسل بس ديه مش فيها توك توك فيها قاتلين قتلة :)))) وربنا يستر علينا

    ردحذف
  7. ربنا يعينك على السوق ده
    ويمكن حد يسمع

    ردحذف
  8. بصراحة الله يعينك السوق دة انا عارفة ورحتة مرة قبل كدة

    فعلا تلوث سمعى وبصري وزحمة جدااااااا وعدم نظافة

    مش عارف انصحك باية!! لكن اعتقد مع الوقت ومرور السنين والايام والشهور يمكن حد يسمع شكوتك ويحاول يحلها

    الموضوع كلة محتاج صبر كلها 300 - 400 سنة وانا حاسس ان حد هيسمع شكواكي وربنا يسهل

    تحياتى وتقديري واحترامي

    ردحذف
  9. منى عااااااااااااا كنت بكتب التعليق والكهرباء قطعت من تقريبا10 الصبح والحمدلله يارب جت الساعة3 الحمدلله احنا هننهب كويس بس جيت لقيت السوق انفض وكل واحد راح لحاله ههههههههه
    عموما يا اختشى المنتيقة دى منتيقتكم واوعى تسيبيها الا بقى يا حبيبتشى لو راحة فيلا مثلا فى حتة حلوة واللا حاجة ربنا يوسع عليكى وعلى الشباب اولادك يارب
    وبعدين اشتكى ومتبطليش شكوة يمكن لعل وعسى حد يخاف الله ويرفع عنكم الاذى ده حاجة غريبة فى وسط السكن كده طب ده انا بشوف فى الافلام الاجنبى ان الحاجات اللى شبه كده بتبقى بره المدينة يعنى تلاقيها على طريق صحراوى مثلا وبتبقى زى مهرجان منظم لكن احنا بنحب بعضنا بقى ومنقدرش نبعد عن بعض اه فتلاقى الحاجات دى فى وسط الكتلة السكانية من اجل تلاحم قوى الشعب امال ايه وبيبقى مهرجان غير منظم الا قوليلى بييجوا بتوع مراجيح واللا لا علشان لو مفيش فرصة برضه مشروع هايل واشرفلك عليه واهى سبوبه بقى يا اختشى

    منمن العزيزة سمعتى اغنية مدحت صالح دى لا باظت ولا خربت ولا جابت جاز لامؤاخذة دى عيشة ظريفة جدا ولافى دماغ ضربت ولاحد بيشتكى لحظة عايشين ف حرية زمن القيود اختفى اتحدى لو واحد يوم انضرب بالقفا والناس بتختشى ولاحد بيرتشى الله على الحياة بقى لونها شفتشى دا احنا لاصوتنا اتنبح ولافى مالطة بندن
    هحاول ابعتلك الفيديو ع الياهو باى وميرسى انك بتستحملى الرغى بتاعى

    ردحذف
  10. ماما مازن : لا تخيلى نسيت بتاع المراجيح أخ بس هو موجود وموجود قفص كمان كده زى بتاع القرود حاطين فيه مرتبة وكور علشان العيال تنطط فيه ياه أزاى نسيته ده!!! مش حتنفع معاكى السبوبة ديه :) وأنا عارفة أغنية مدحت صالح كويس جدا وربنا يخليكى -

    حازم : 300-400 سنة!!! بس ساعتها حيبقى فيه سوق للطائرات مش السيارات والبنى أدميين حيبقوا روبوتس- شكرا لمرورك

    ردحذف
  11. واللة عندك حق انا بيطلع عينى فى المروااح والمجى بس بهرب من الطريق التانى اللى من المثلث هههههههههههههههه, تحياتى

    ردحذف
  12. منى الغالية، انتى اكتر واحدة محتاجة تعيشى فى مناخ هادىء بعيد عن الزحمة والضوضاء وخلافة ودة طبعا بحكم انك كاتبة رائعة ومبدعة فمثل هذة المقالات والخواطر الجميلة تتطلب الهدوء والصفاء الذهنى، والامل هنا ان يطلع احد من المسئولين على مثل هذة المهازل لعل وعسى ان يصدر قرار بنقل هذا السوق الى مكان اخر وان كان امل ضعيف ولكن لابد الا نفقد الامل ،وفقكى اللة وازاح هذا الصداع الأزلى الى الأبد

    ردحذف
  13. عزيزتى منى واللة ساكن هنااك بردواا بس ايجاار علشان النق والاررررر, تحياتى

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))