الثلاثاء، سبتمبر 21، 2010

على السريع ولكن بدون ضحك

(1)
فى جريدة ما قرأت خبر تحت هذا العنوان " عمدة برلين يهنىء وزير الخارجية الألمانى على زواجه من صديقه"!!! شوف أزاى؟؟ ترى ماشأنى أنا أو شأن أى مواطن مصرى أو أى مواطن حتى من بلاد الواق واق بهذا الخبر؟ ماشأنى أنا حتى لو لم يكن السيد الوزير له ميول منيلة بستين نيلة وتزوج من صديقته؟ ماالذى أضافته لى الجريدة بهذه المعلومة التى لا تمت لأى شىء فى أى شىء بصلة. يبدو أن الشفافية هى أن نعرف ما يدور فى غرف نوم السادة السياسين من البلاد الآخرى.

(2)
أحيانا يستيقط شخصا ما من نومه صباحا وهو "لسانه بيأكله" يريد أن يتحدث فى أى شىء ولو لم يتحدث لحدث له مالايحمد عقباه كأن يصيبه الفالج مثلا لو لم يحرك لسانه وينطق بأى عبث فيقول على سبيل المثال وليس الحصر" الشعب المصرى شعب جاهل لأنه للأن يشاهد أفلام أسماعيل ياسين بينما أسماعيل ياسين أصلا لا يعد ممثلا - ثم يظهر شخصا أخر أيضا لسانه بيأكله ليضيف أن أسماعيل ياسين كان يكرر نفسه!!!
وأنا من موقعى هذا أقول لهذه العينة من الناس عيب وخالى فيه شوية أحترام ولما تصحوا الصبح مع حلاقة الذقن أبقوا خلوه الحلاق يعدى على لسانكوا يخدوا وش بالمرة
(3)
السيد الوزير قال أن سرقة لوحة الخشخاش ليست نهاية الدنيا يعنى بالمفتشر مش قضية بقى وبلا فلقة
والسادة الخبراء قالوا أن اللوحة المسروقة مزورة
طيب ممكن أسأل هو أحنا فى أى بلد؟ بالتأكيد نحن فى مكان ليس له ملامح
(4)
 بدأ العام الدراسى بداية مبشرة بالخير كعادته كام كتاب ناقص من هنا ومن هنا يعنى حسبة 3 أو 4 كتب فى بعض المراحل الدراسية مع عدم توفر الكتب الخارجية بسبب أزمة دور النشر مع السيد الوزير
ولكن لأجل الشفافية وأحترام الطلبة ولتقديس العلم تم وضع كل الكتب الناقصة على موقع الوزارة على النت أى نعم  ليتمكن العيل رقم (1) وهو راجع من المدرسة أن يجعد على شط الترعة ويفتح اللاب توب ويجيب اليو أس بى بتاع أتصالات ويعمل داون لود لملفات البى دى أف بينما البقرة تنظر له بعين حالمة
أما العيل رقم (2) يدخل على أمه الشقيانة طول النهار فى خدمة البيوت بينما جوزها النطع يجلس على القهوة يحشش ويقول لها "ها ياما نزلتى لى درس أمبارح" تقول له لا والنبى ياضنايا أصل النت كان فااااااااااصل أصل عمك بدوى كان شايل سلك الكهرباء من العمومى علشان كان فيه تفتيش!!
مع الأخذ فى الأعتبار أن العيل رقم 1 و2 ليسا من الخيال العلمى
وسمعنى نشيد "يامدارس يامدارس مدرستنا حلوة خالص"
(5)
سؤال أواجهه لشخص لاأعرف من هو على وجه التحديد
متى ستتوقف مهزلة تصريحات السيد المبجل الذى لا أستطيع أن أصرح بأسمه  حتى لا يقوم برفع قضية ويجرجرنى فى المحاكم وأنا دلوقت مش حمل بهدلة
هذا السيد لا يتوقف عن الكلام وفضح الناس على شاشات الفضائيات
لماذا لا يتم ردعه هل هو فوق القانون لمجرد أنه رجل قانون وما السر وراء كل هذا الأهتمام الأعلامى به ؟
وبجد إلى أختشوا ماتوا
(6)
لماذا يتم أعادة جميع مسلسلات رمضان بعده مباشرة هل لأن فى الأعادة أفادة أم أنه يوجد أمتحان من نوع ما للمشاهدين لمعرفة درجة أستيعابه لملابس الحاجة زهرة
وسماجة وأستظراف الدكتورة علا ومرح عائلتها الفائق عن الحد وحتى يتم معرفة مين الى مع الجماعة ومين الى مش مع الجماعة وهى السيرة التى أنفتحت ويبدو أنها لن تتوقف مع أستمرار هطل الست كوم من جوز ماما ومرات بابا وغيرها ولكن الشهادة لله توقفت القناة التى كانت تذيع نشرة أخبار الفراخ
إشمعنا؟؟ علشان الأختلاف فى البط لا يفسد للوز صينية*!!!
(قلمى)
* أسم برنامج كان يذاع فى الراديو

هناك 15 تعليقًا:

  1. اخر شىء نتوقعه ان يتحدث وزير ثقافة عن لوحة نادرة بهذا الاسلوب لكن هو متأكد ان حصل بلاوى كتير قبل كده و برضة هو لازق فى الكرسى بغرى

    بيستضيفوا مرتضى منصور لانه بيجيبلهم اعلانات...قناة الحياة فى رمضان انفقت على مسلسلاتها و برامجها 110 مليون جنية..ايوه الرقم صح و من السيد البدوى مالها شخصيا ...القناة كسبت فوق المبلغ ده بكتير من الاعلانات...تصورى؟

    اعادة الملسلات بعد رمضان اراه ميزة لانه مكنى من مشاهدة ما لم استطيه ان اشاهد وقت السيول الرمضانية

    ردحذف
  2. اطرف تعليق لموضوع اسماعيل ياسين ...قال انه الظاهر وقع للبرادعى ...
    وبالنسبة لفاروق حسنى ....
    هقولة ما انت قاعد فى تكية ...وماحدش بيتحاسب الا بمزاج الكبير ....
    اشوف فيكم أسبوع يا بعدا

    ردحذف
  3. غير معرف21/9/10 5:22 ص

    السلام عليكِ مدام منى
    أنا تقريباً متفق معك في كل ما طرحتِ خاصة في أمر هذا المنصور الله يهيده ، لا أعرف الصدف وراه اسمه وصفته وإن كان منصوراً بالورق ففي الضمائر لا أظنه يحتفظ بنفس القدر

    أما وجه اختلافي فهو اختلاف نسبي وليس مطلق وهو بخصوص الكتب ، من قبل كنا نتأخر عن هذا كذلك ورغم أن التأخير مرفوض لكن بم أن هناك تطويرا للمناهج وتغييرا ولأنها السنة الأولى له فربما نلتمس العذر خاصة أن التأخير المعلن عنه أقصاه أسبوع وأول أمس كنت في مدرسة ثانوية حيث أجري مصلحة خاصة وتصادف أن ذهب لمسئول توزيع الكتب في مخزن الكتب وأشاهد عملية توزيعة الكتب التي تغيرت طباعة ومضمونا ً ربما ليس من البديهي أن أطرح رأيي في المضمون لأن مطالعتي عابرة لكن سأتحدث عن الطباعة والشكل لأنه حقيقة تغير وضع الكتب وصارت أقل في الحجم وأشيك وبراقة وجذابة ، والله كان هاين علي ألطش كتاب :))
    على كل حال أنت محقة كذلك في جانب لكن الريف على فكرة صار كالمدينة وربما في حالات أفضل وأيسر في تركيب بعض الخدمات ولأن أصلي قروي فأقر بتوفر كل هذه الخدمات في الريف حتى الفلاح الأجري من اليسير أن تجدي لدى ابنه حاسب حتى لو كان محدود الإمكانيات .. الدنيا تغيرت يا مدام منى وصارت كماليات الأمس أسايات اليوم ، ومع ذلك فهو قياس ليس مطلق ونماذجك موجودة وبقوة وربما تميل لها الكفة لكن في المجمل سنسامح عن هذا الأسبوع .. موافقة :)

    ردحذف
  4. غير معرف21/9/10 10:17 ص

    بس يا منمن ما تقدريش تنكري مدي التسلية اللي الراجل الفضحي بيضيفه للحياة! و بعدين هما مش قادرين يوقفوه عشان علي رأسهم باطحة و سلامي الجامد قوي للقانون!

    و بالمناسبة هما بيعيدوا الجماعة؟! أصلي ما شوفتوش

    بحبك
    رهام مكي

    ردحذف
  5. Tears: وحشتينى معنديش أعتراض على أعادة العرض لكن ليه بعد رمضان فورا هو أحنا لحقنا وليه كل المسلسلات لماذا لا يوجد غربلة للأفضل بدلا من أعادة العاطل مع الجيد - وبالنسبة للمبلغ ربنا يزيد ويبارك بس يارب يفتكروا حد من الغلابة.

    شريف : أيوه قرأت التعليق ده من جلال عامر - أتمنى أن تستجاب الدعوات آمين يارب

    أحمد شريف: أختلف معاك هذه المرة وطبعا وديا المدارس لها وقت محدد ويجب أن يكون كل شىء جاهز فأن لم نحترم الصغار فلن يتعلم الصغار أحترام الكبار والألتزام وأنا لا أنكر أى مجهود يتم لأصدار كتاب مدرسى بشكل جيد وجذاب للطالب أما تطور الريف فليس كل الريف متطور وهذا لا يقلل من شأن من فيه بل هو مسئولية القائمين على التطوير وأنا لا أتحدث عن الريف أو الصعيد فقط ولكن أيضا عن المناطيق التى ليس بها كهرباء وعن الأهل الذين بالكاد يملكون قوت اليوم فكيف بالله سيملك طفلهم جهاز حاسوب.

    ريهام: منورانى وفعلا أوقات يكون كومديان درجة أولى - أنا ماليش فى الجماعة ولا أحب أعرف عنهم حاجة خاااااااالص :) وكفاية شفت أهل كايرو فى رمضان ونكتفى بها لأنى ماليش فى المسلسلات خالص مالص بالص :)) والعربى بالذات والمصرى بالأخص

    ردحذف
  6. أستاذة منى

    (:

    الست مواضيع أنقح من بعض

    1 - يملى فراغ الجريدة ( و أحنا مالنا )

    2- تقريبا معهوش فلوس يحلق (يا رخم )

    3- دعونا نتفائل المتحف لسه موجود( اللى هو مصر )

    4- كاد التعليم أن يكون خنيقا ( دة لو مكنش بالفعل )

    5- تقريبا ربنا مديله صحة زيادة هو حضرتك مبتشفيش بيزعق أزاى

    6- مش عرف

    بالرغم أن قناة الفراخ أفيد (:

    صبرنا ياااااااااارب

    (:

    3-

    ردحذف
  7. الإختلاف فى البط لا يفسد للود صينية

    تسلم إيدك و دماغك

    هى دى فعلا خلاصة القول المباح و المستباح الشفافية و الإيضاح

    ده غير إنه إيه يعنى لما تتسرق لوحة زى ما قال السيد المبجل وزير الثقافة الفنان .. ما هى حاجات كتير مسروقة و بتتسرق و هتتسرق و ما حصلش و مش هيحصل حاجة

    إنما نقف عند لوحة ثمنها 55 مليون دولار .. ده إحنا نبقى شعب رخم

    ال 55 مليون دولار بكرة الحكومة تجيبهم من ضرائب عقارية و ضرائب هوائية و ضرائب مائية .. و غيره و غيره
    مش حكاية بقى ...

    و انا من هنا أنادى و أطالب و أشجب و أتذمر من كل الأقلام الشريرة اللى برضه بتنادى و تطالب و تشجب و تندد و تتذمر من سرقة اللوحة


    خالص تحياتى
    دمتى بخير

    ردحذف
  8. ازيك مى اخبارك اية


    احنا فى زمن العجايب والواحد مش بقى يستغرب من اى حاجة تحدث امامة


    مع خالص تحياتى

    ردحذف
  9. تعليق واحد بس والباقي لا تعليق

    إسماعيل ياسين برقبتهم كلهم أنا بجيبه لأولادي يتفرجوا عليه أرحم من قلة حيا الممثلين الجداد اللي بيحشروا قلة الحيا حتى في أفلام مفروض تكون أفلام


    انا مصدعه ومتصدعه ...........طيب مشفتيش اللي طلع من أمام أبو الهول يقول : لابد أن نحارب الفقر و إلا ستصيبكم لعنة أبوالهول ...


    شكلي حتوقف عن قراءة الجرائد كما توقفت عن مشاهدة التلفزيون كفايا أوجاع في بيوتنا ومن حولنا وفي كل مكان

    وعلى رأي الدكتور راغب السرجاني : فلسطيم جرح ينزف الشيشان جرح ينزف والراجل عمال كل يوم والتاني يزود بلد ..........اللهم اسالك الرحمة

    ردحذف
  10. هاهاهاهاهاه لفت نظرى برضه موضوع صديقه ده يا مدام منى ...و كمان حكاية اعادة المسلسلات بعد رمضان على طول

    اسماعيل ياسين ؟؟؟ يسلم لسانهم كلهم و فعلاً ده كلام كان لازم يتقال من زمان ... أيوه هو له 5 أو 6 أفلام زى البحرية و الفانوس السحرى و ابن حميدو بيضحكونى لكن غير عن كده بحس انه كان الله يرحمه محمد سعد بتاع عصره و مش معنى إن فيه بعد كده أزمة حقيقية فى صناعة الفيلم الكوميدى منعت ظهور كوميديان كبير بجد إن اسماعيل ياسين كان موهوب .اسماعيل ياسين نجح بالناس اللى حواليه زى زينات و القصرى و الشاويش عطية لكنه مثلاً مكانش يقدر يعمل أدوار الريحانى أو فؤاد المهندس أو مدبولى .عشان كده بدأ مونولجست و انتهى مونولجست من تانى عشان يعيش لأنه معندوش مقومات نجم حقيقى لكنه بالفعل مونولجست قدير : خامة صوته كويسة جداً و له موضوعات فعلاً مميزة زى مراتى نساية - حماة +حماة - ما تستعجبشى ..الخ

    ده مجرد رأى شخصى و الخلاف فى الرأى لا يفسد للود قضية ... تحاياتى على البوست الجميل كالعادة :)))))

    ردحذف
  11. تصريحات وزير الثقافة فى منتهى الحقارة واللامسئولية

    ردحذف
  12. الحمد لله تغلبت على نفسي ولم اشاهد اي مسلسل .. وجع دماغ وحاجات مكررة واعلانات تجيب الضغط وبرامج حوارية تافهة وفضائح يومية
    ليه بقبنا كدة

    معلش اعذريني على الانفعال
    تحياتي

    ردحذف
  13. هم جم منين؟ جم مننا
    طيب وايه اللي خلانا كده علشان احنا حابين نبقي كده
    طيب وليه احنا حابين نبقي كده؟
    علشان احنا مانتحركش الا بالعصايه والكرباج

    ارجعي 200 سنه لورا شوفي مصر كانت عامله ازاي هتلاقيها كانت بلد كويسه

    كانت الناس مش كده خالص مكانش فيهم الامراض الاجتماعيه الخبيثه دي من الخنوع والفشل والياس والاستسلام والكسل والجبن والتراخي

    وفي الاخر بننتقد النظام؟

    طيب مالنظام ده بيعبر عننا اصلا

    ردحذف
  14. بجد كل النقاط اشجع من بعض .زو اللي مضايقن يمضايق حضرتك الشخص اللي بيدفع فلوس لحلقات علي الفضائيات عشان يفضل يرغي في كلام اعجب من بعضه ..و زهرة ايه المزورة دي طيب سؤال فين الاصليه و لما هي مزورة محطوطه في متحف ليه من قله اثثارنا ...و الكتب يعني الناس مكنشت قادره تدفع نصاريف ولادها ينزلوا من النت و يطبعوا ازاي خصوصا القري ...تسلم ايدكي
    دمتي بكل الخير

    ردحذف
  15. مصر عاوزة تتعمل من الأول ..!!
    شوفوا لنا واحد بتاع فسيخ .. عشان الحلواني اللي بناها تقريبا كان فاشل !!

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))