الخميس، أبريل 15، 2010

على السريع (4) - أضافة وتعديل

-(1) هناك مجموعة أعلانات هادفة وشيقة تنال أعجابى جدا وهى "البركة فى الشباب" و"قول لا للارهاب" وللحق فهى أعلانات متميزة بمحتواها والافكار التى تهدف الى نشرها - ولكن للاسف لا تذيعها كل القنوات الفضائية بل حتى والقنوات التى تذيعها لا تقوم بأذاعتها بنفس الكم الذى تقوم فيه بإذاعة الاعلانات الهايفة والمستفزة الاخرى - وما لاأفهمه حتى الان كيف لا تمنح جوائز لمثل هذه الاعلانات وتدعم بل وتعطى جائزة لاعلانات "ميلودى أم الاجنبى!!!" بتاعة أيوه كده ياوديع!!! ولايقوى أحد فى هذا البلد ذو 80 مليون نسمة أن يوقف تلك الاعلانات القذرة بكل معانى القذارة والحقارة والدعارة أيضا.

(2) خبر سار لكل الابهات (وليس الاباء) : ماما هيفاء وهبى تقوم الان بالغناء للاطفال؟؟؟؟!!!!! فهينأ لكم فيمكنكم الان مشاهدتها مع أطفالكم دون أن تتوجسوا خيفة من أمهات أطفالكم - فمن يقدر أن يلومكم وهى تغنى للاطفال والبراءة فى عينيها؟؟؟ - آلهى تتشتكى فى معاميعك" وبجد بجد "رجب حوش صاحبك عنى"!!!

(3) بعد مناورات ومناقشات بل الادق مهاترات وأستفزازات وسباب وشتائم من العيار الثقيل وغيره تقرر وقف مناظرات الاخوين لوريل وهاردى (أكيد عارفين أقصد مين) - مابدرى!!! وايه الصحوة والشطارة ديه وعمل تحقيقات لا بجد أما براوة براوة على الحلاوة!!! كنتوا فين من زمااااااااااااااااااااااااااااااان.

(4) عارفين لما محمد سعد وقف فى تركيا وقال ايه الى جاب القلعة للبحر ده برضة كان شعورى وأنا أقرأ  خبرالقبض على مصريين فى الكويت بتهمة تأييد البرادعى - ايه  فين التهمة - التهمة أيه بالضبط ؟؟؟ ثم وأنتوا ايه الى مضايقكم ؟؟ صحيح وأنتم أيش داخلكم؟

(5) أحب مشاهدة برامج المسابقات الثقافية وخاصة من سيربح المليون وواحد ضد 100 - حلقة أمبارح المتسابقة كانت تونسية طالبة جامعية قدمها مصطفى على أنها نابغة عصرها سؤال والثانى والثالث وكان الجهل صديقها والحظ حليفها حتى وصلت لعشرة ألاف دولار فكان السؤال أزمة البترول حدثت فى أى الحروب العربية
والاختيارات هى حرب الست أيام - حرب 6 أكتوبر - الانتفاضة الاولى - وكانت الجهبذ لا تعرف ماهى حرب 6 أكتوبر أى والله وغير متأكدة أنها فى مصر وأجابت حرب الست أيام - والله العظيم أنا كان هاين على ألطم على وشى من الجهل طيب ليه ياماما هو أنت ساكنة فى زحل ولا عطارد ولا ايه بالضبط - أيه الجهل الاسود ده ويابجاحتكم رايحين تدخلوا مسابقات بأمارة أيه - بس أنا أنبسطت أنها خسرت جدا وبالمناسبة كمان لم تكن تعرف ثورة الفاتح فى أى بلد قالت لم تأخذها فى التاريخ!!!!وهذا أكبر دليل على القومية العربية - وبرشة برشة!!!

(6) قادنى حظى العثر الى دخول عدة منتديات نسائية لم أكن أعرف أصلا أنه يوجد مثل هذه المنتديات ولله الحمد موجودين بالزوفة وهى ليست مصرية فقط بل وعربية من جميع الاقطار ومعظمها أن دل على شىء فيدل على كم الهيافة الموجودة عند بعض (وليس الكل) الفتيات والسيدات - وألطف شىء بقى عند الدخول يطلع لك مربع كده يقول لك أحلف أنك ست مش رجل ؟؟ ياسلااااام !!! وبعدين يقول لك المنتدى خاص بالفتيات والسيدات وكأنهن جالسات فى بيوتهن ويقول لك لا تترك صور للبنات ولا تضع موسيقى وتفاجأ بوجود كلام وعبارات  تبعد كل البعد عن معنى الحياء - ليه هو أنتوا فاكرين أنكم  قاعدين على المصطبة فى بيتكم ده فيه ألف رجل بيدخل ويشوف الكلام ؟؟ والى زاد وغطى كمية المعلومات الخاطئة الموجودة فى شتى المجالات حتى الدينية - من الذى يراقب مثل هذه المنتديات؟؟؟ والغريبة أنى أكتشفت أنه يوجد منتديات خاصة للرجال فقط - ولا أجد قول سوى يا مهاطيل وهطلات العالم أتحدوا وأستمروا فى الهيافة وتضيع الوقت!!!!!!!!!!!!!!

(7) فيه قول كده سمج بيقول علمنى الهيافة يابا فيقول لك تعالى فى الهايفة وأتصدر وده بمناسبة كل الإذاعات في مقديشو قد امتثلت تحت الضغط، لإنذار جديد أصدرته مجموعة من المتمردين الإسلاميين المتطرفين، منعت بموجبه بث كل أنواع الموسيقى. لم ينتهى الخبر عند هذا الحد بل أن منع الموسيقى يعني أنه لا يمكن حتى استعمالها للوصل بين البرامج وتم أستعمال أصواتاً أخرى، مثل أصوات إطلاق نار، أو سيارات، أو زقزقة عصافير، للربط بين البرامج والأخبار نفس الجماعات ديه من كم شهر كده جلدت عدد من السيدات لارتدائهن مشدات الصدر وقد تم منع النساء من أرتدائه على أعتبار أنه مخالف للشريعة الاسلامية!!!!! طيب هو الاصلاح ده مش له أولويات (ده لو أعتبرنا أن الموسيقى ومشدات الصدر أصلاح أصلا)!  طيب مش تحلوا مشكلة المجاعات الاول ومشكلة القراصنة وغيرها من المشاكل الى عندكم قبل مشكلة الموسيقى والسوتينات؟؟؟؟؟

(8) مبروك الشاعرة السعودية "حصة هلال" على فوزها بالمركز الثالث فى مسابقة "شاعر المليون" الخاصة بالشعر النبطى والتى ألقت فيها قصيدة عن فوضى الفتاوى وقصيدة أخرى عن الارهاب والتى من جرائهما جاءتها تهديدات بالقتل - الشاعرة ستقوم بصرف مبلغ الجائزة على طفلتها المعاقة المصابة بالتوحد وعدم النطق
مبروك يا أخت حصة مرة أخرى - أحترم أمومتك أولا ونبوغك وشجاعتك ثانيا
(9) كلمة أخيرة  CHAOS أى فوضى وهى المنتشرة الان فى العقول والاقلام بل وفى كل الزاويا و بكل المقاييس وحتى أخر قطرة
قلمى

هناك 17 تعليقًا:

  1. السلام عليكم

    بالنسبه للإعلانات عندك حق والله
    بقت حاجه تقرف بمعني الكلمه
    وميلودي بجد حاجه وحشه خالص مش بس "أم الأجنبي"
    لأ دي من أيام هرقل بتاعها والبت الي معاه
    ولا تتخيلي حضرتك مقدار تعاستي لما تراجع عن الانتحار في آخر اعلان لية
    قامو غيروه وجابو وديع

    بالنسبه لبرنامج واحد ضد مية
    فعلا بشوف ناس غريبه
    يعني أنا بعتبر نفسي من تانية ثانوي معلوماتي تجمدت ومش بقيت بستقبل أي معلومات
    الناس دي بحس انها مولوده معلوماتها متجمده
    مع ان في بعض الناس بتكون فعلا مثقفه

    بالنسبه للمنتديات
    ههههههههه
    الفاضي يعمل اية

    ردحذف
  2. السلام عليكم

    مني كل مرة بتكتبي ع السريع بلذاذة

    المرديه بعصبية
    زيدة
    وكمان في حاجات كتير مش اتعودت عليها منك

    ع العموم في منع الموسيقي احسنولهم الاجر والصواب
    اما الاصوات الاخري لا
    لا للاصوات المزعجة

    واهلا باصةات الشجر المء

    أو زقزقة عصافير،

    معكي حق في استفزاز الاعلانات خصوصا وديع التي اشتهرت بين الشباب الان وهما مش عارفة جهلة ولا ايه

    معتقدش ان اي شيء يحسن من شكل المرأة ضد الاسلام مشدات الصدر

    ربنا يصبرنا علي الجهل

    ردحذف
  3. sweet angel: عندك حق ميلودى على بعضها حاجة أرف - أما بالنسبة للمعلومات ممكن تزيديها بالقراءة دائما ولن تتجمد أن شاءالله.

    ذكرى: حاجات كتيرأيه!!! أنا كل الى كاتبه حقيقى ومستفز وطرحته بشكل لطيف وهى حقا أشياء مستفزة كان يلزمها طرح بشكل أقسى لكنى راعيت عدم التمادى؟؟!!! وبعدين أنا لا أتحدث عن الاجر والصواب والثواب أنا أتحدث عن الاوليات فى الاصلاح هو حال بلدهم حيتصلح لما يمنعوا الموسيقى؟؟

    ردحذف
  4. غير معرف15/4/10 6:30 م

    منمونى الجميل
    السلام عليكم ورحمة الله وبركاته
    اسمحيلى اعلق على السريع بتاعك اللى مش سريع ابدا دى رؤية وقراءة فى واقع حقيقى
    1-شوفى يا ستى انا بعشق الاعلانات الهادفة دى جدا لانها بتعلق قوى مع ولادى وساعات مش بيبقوا فاهمينها فبشرحها لهم بطريقة يفهموها وازود لهم امثلة على قد سنهم
    الاعلانات دى اقوى دليل على ان الاعلام ممكن يهد وممكن قوى يبنى يعنى انا مش ضد الترفيه بالعكس انا مع الترفيه بس مش الترفيه المسف اللى يكسف وانا حقيقى بدعى للناس اللى اشتغلت الاعمال دى ان ربنا يجازيهم خير زى ما بدعى على اللى بيعمل حاجة تأذى بان ربنا ينتقم منه
    2- مفيش حاجة اسخف من انك تلاقى طفلة صغيرة يا ولداه متخيله ان دلع هيفا ده عادى وانها علشان تبقى سكر تعمل زيها دى مصيبة ليه بيحصل كده بقى لان بابا لازق عينه فى الشاشة وواهم نفسه انه بيشوف اغنية اطفال
    الله يرحمك يا محمد يافوزى ويرحم ايامك ويرحم ماما زمانها جايه
    3- انتى اكيد قصدك الاتنين بتوع الكورة والنوادى لو قصدك كده يبقى انسى وقولى عواف (على راى اهلنا فى قرى مصر) على الرياضة واخلاق الرياضيين والحاجات اللى كنت بسمع عليها من جدى الله يرحمه
    4-والله يا اختى اذبهليت وذهلت واشرأب عنقى وصغر فاهى يعنى تحولت للوحة تكعيبية لبيكاسو لما سمعت الخبر
    طب ايه دخل عيشة فى أم الخير بالبلدى كده وسمعينى سلام لو مكنتش انت تدلعنى مين هيدلعنى
    5-يعنى هى فى الجامعة يعنى بتاع 20 مثلا طب متظلميهاش هى اتولدت بعد الحرب دى بكام ب17 سنة مثلا طيب هى هتعرف ازاى
    طيب وهى فى تونس ايه دخل تونس فى حرب انتصرت فيها مصر والعرب كلهم
    طيب وبعدين معاكى بقى متوقفيش للناس ع الواحدة طنشى يا ستى علشان خاطر العروبة وبعدين معاكى بقى وسمعينى سلام ذئاب الجبل
    6-تحسى انك داخلة غرفة تغيير ملابس فى نادى مثلا و عليها لوحة للنساء فقط وبعدين هل تعتقدى مثلا لو دخل رجل المنتدى ده بيتنحنح ويعلى صوته ويقول يارب يا ساتر ههههههههههه علشان اللى قالعة راسها تلبسها
    نحن نعيش فى عالم من العسل والسكر وسمعينى سلام سلامتها ام حسن
    7-ناس لذيذة مش عايزين يخنقوا ستاتهم رغم ان فى انواع سوفت مبتخنقش بس وماله يلا اربط الحمار مطرح ميعوز صاحبه
    طيب ومعنى ذلك انهم ملهمش نشيد وطنى حاليا طب والاغانى الدينية والاناشيد والتواشيح الدينية تحت بند ممنوع برضه واللا ايه

    يلا ما علينا
    شوفى البلوجر غضبان عليا دلوقتى ومش راضى يخلينى اعمل دخول فمش اشكال
    معكم مامة مازن
    حياة بكل ما فيها
    من أمام شاشة الكمبيوتر -غرفة الانتريه -بيتنا
    مع السلامة

    ردحذف
  5. ماما مازن : منورانى ياااه من زمان لم ارى تعليقاتك الحلوة والطويلة ديه
    والله ضحكتنى صحيح أنا ظالمة بالنسبة لرقم 5 - بس والله غرفة تغيير الملابس فى النادى محترمة عن بعض المنتديات انا بقى الى بيجلى أزبهلال وبأتحاول زى المتحولون لما بصادف المنتديات ديه -
    نشيد وطنى؟؟؟ هم دول يعرفوا اصلا معنى كلمة وطن لانهم لو يعرفوه ماكانوش عملوا كده فى ستاتهم والذى يدل على مدى الانحطاط وهى الشريعة الاسلامية برضة بتقول بصوا على صدور النساء وحسبى الله ونعم الوكيل

    ردحذف
  6. جميلة كالعادة :)

    ما فهمتش رقم تلاته بس بالنسبة لرقم اربعه فالديكتاتوريات لازم تجامل بعضها

    مع ان المصريين لم يتظاهروا فى الكويت بل كانوا بينظموا اجتماع و القانون لا يجرم ده و اصلا حتى لو مظاهرة طيب ما الكوايته ايام الغزو اتظاهروا عندنا و ماحدش قربلهم ثم ان المصريين فى انجلترا و امريكيا تظاهروا ضد النظام و لم يمسسهم احد و لا ده فرق الحضارة؟

    دمتى بخير

    ردحذف
  7. غير معرف15/4/10 9:46 م

    السلام عليكِ
    مدام منى .. إن شاء الله تكوني في أفضل حال

    بصفة عامة هناك توافق لدي حول أغلب ما طرحت وعلى رأسه بالطبع موضوع الإعلانات
    على فكرة يوجد حالياً حملة لطيف وهادفة جداً يقوم بها المجلس القومي للرياضة لنشر مفهوم الرياضة من أجل الرياضة ..
    حملة قوية جداً على فكرة

    ردحذف
  8. Mona ....
    والله سعيد جدا بتواجدك معى ياأستاذهوعلى فكره رديت على البوست وعندى طلب أرجوكى حاولى فيه وهوترجمة بعض الكلمات إقرأى ردى على البوست الخاص بك موضوعاتك التى تقوليها فعلا تحزن الواحد على حالنا ولا أعرف ليه إحنا حالة مستعصية بهذا الحد شكرا لك

    ردحذف
  9. كل داه وعالسريع؟؟؟؟؟؟؟؟؟؟؟؟؟

    طيب بعد قراءة وتمحيص أكتب لكي على السريع :

    عليه العوض في حاجات كتير كتير كتير .و أسعدتيني حقيقي بماما هايفه علشان العيال محتاجيين توعية ويا ترى حتغني لهم وهي مش لابسه إيه؟؟؟؟؟؟ تحياتي

    ردحذف
  10. رقم 3 المعنين هما شوبير ومرتضى بس أصل مرتضى بيرفع قضية على أى حد فلم أحب ذكر اسمه علشان أنا مش حمل قضايا بس مضطرة ابوح بأسمه - اللهم أحفظنا

    ردحذف
  11. السلام عليكم

    صح ... و الله العظيم صح
    كل كلامك مضبوط و صح و موافق عليه
    لكن بس هى حكاية المصريين فى الكويت اللى مش واضحة كويس
    انا مغترب فى دولة خليجية رائعة .. الإمارات .. أهلها أطيب ناس فى الخليج بالكامل ... و والناس اللى متغربة و خصوصا فى دول الخليج و من واقع المعيشة و التفاعل .. مش مفروض أبدا إنهم يحافظوا على حاجة فى الغربة أكتر من رزقهم و رزق أولادهم و بالتالى بلدهم ...و إلا هيحصل زى ما حصل فى الكويت
    إحنا مش فى بلدنا عشان نتكلم فى السياسة براحتنا .... إحنا فى الأول و الأخر متغربين عشان لقمة العيش .. و نرجع فى الأصل و نقول إيه اللى غربنا و رمانا على المر؟
    كل لبيب بالإشارة يفهم
    ده رأيى الخاص من واقع تجربتى و وجهة نظرى

    تحياتى لك و لقلمك

    ردحذف
  12. الشاعر القنان أحمد فتحى : وجهة نظر تحترم - أنما أعتراضى على موضوع الاعتقال والترحيل لهذا السبب وأظن هم لم يثيروا بلبلة أو شىء من هذا القبيل ولو كل واحد حيقول رأيه حيترحل ويتسجن ديه مش تبقى عيشة وهو لو نفس الناس فى بلد أجنبى كان حيتقبض عليهم لو عبروا عن رأيهم لا أعتقد - ترجع بالسلامة

    ردحذف
  13. بعض الدول بتحط الدين في مقدمة اولوياتها..طبعا احنا عارفين ان العناصر المذكورة اللي تم منعها جايز يكون بعضها لا يمت للدين بصلة لكن بعض الشعوب ليها حاجات كده متتفهمش...

    ردحذف
  14. حلو أوى أسلوبك فى طرح موضوعات الحياة اللى بنصادفها وتعقيبك ورأيك فيها ..بيعجبنى فيكى إعتدالك فى رؤيتك للأمور.. ربنا يوفقك ويسعدك

    ردحذف
  15. فعلا أحلى وصف لوريل وهاردي
    بس ياترى مين لوريل ومين هاردي !!

    أما عن ضحالة الثقافة فحدثي سيدتي ولا حرج.. أهم حاجة يعرفوا كلمات الأغاني الهايفة ومين حيكسب في ستار أكاديمي .. وكل سنة وإنتي وأكتوبر وحربه بخير
    تحياتي

    ردحذف
  16. منى ...
    أنا ضد إن الواحد يبحث عن لقمة العيش
    وبس ويسيب الدنيا فى حالها ويبقى شيطان أخرس لا ربنا ماخلقناش عشان نكون بدون لسان خرس الفرق بينا والحيوانات إيه بقى دومتى لنا .شوفى البوست الجديد . فاروق

    ردحذف
  17. غير معرف21/4/10 3:42 م

    سلام عليكم مدام منى
    هذا رابط هيفيدك في موضوع دورات التخاطب
    http://www.ahlam-elghad.com/

    هعود لك بمزيد من التفاصيل بس اليومين دول أنا على سفر وجلوسي قليل .. يوم الجمعة هفوق بإذن الله

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))