الجمعة، مايو 15، 2009

أعلانات كمان وكمان

النهارده سمعت أعلان فى الراديو - أنا كنت أظن (زى أيظن كده بتاعة الفيلم الهابط) أن السماجة الاعلانية فقط على شاشة التليفزيون طلع لا علشان الى معندوش تليفزيون يجيلوا نقطة برضك لما يسمع الراديو -

الاعلان بيقول لك ياسيدى لما تبقى فى البحر (ولا فى النهر مش فاكرة أهو أى مية) وتيجى موجة توقعك (يارب تيجى موجة تشيل مؤلفى الاعلانات كلهم) وبعدين تبص تلاقى تمساح يجى عليك ويأكل أيدك (مش فاكرة اليمين ولا الشمال اصلى كنت عايزة أعرف نهاية الاعلان ده ايه) - حيبقى فضلك أيد تانية تأكل بيها باوند كيك مولتو!!!!!! ياسلام ايه الابداع ده يا خواتى عسل والله أنا مكنتش مصدقة الى بسمعوه زى كده روتانا سينما مش حتقدر تغمض عينيك وعلشان كده طفيت الراديو علشان ميغمش عليا -

أكيد مؤلف الاعلان ده هو أخو أو أبن عم الخفة التنح والرخم والسمج بتاع كوكاكولازيرو

أنا بس عايزة أعرف هو ده أسمه ايه - لا بجد - هل ده نوع جديد من الاستظراف أصلى حاسة أنه راشق لنا فى كل حتة!!!!

يارب أن شاء الله فى الويك أند تطلع عليكوا تماسيح النيل كلهاو كمان الى فى جنينة الحيوانات علشان تأكل ايديكوا الاتنين ونشوف بقى حتشربوا كوكاكولازيرو وتطفحوا باوند كيك مولتو أزاى يا بعدة يا بتوع الاعلانات

"قلمى"

هناك 11 تعليقًا:

  1. هههههههههههههههههههههههه

    جمييييل يامدام مني ووحشاني مووت

    ويااااارب بجد عشان يعرفوا ساعتها ال بيعملوه ف الناس

    هبقي أسأل ماما بأة ع الاعلان ده اصلها مدمنة راديو

    تسلم ايديكي

    دمتي بألف خيرر يارب

    ردحذف
  2. اه والله فعلا سمعته وساعتها قولت زى( سمبل بتاع محمد صبحى) يخرب بيت مطنك يخرب بيت ضحكتك
    بسمعه على نجوم اف ام بقالى كام يوم وكل مرة بقول نفس الرد وساعات بتهور لابعد من كده
    عسسسسسسسسل يا منى بجد وفعلا وحقيقى

    ردحذف
  3. مصمم اعلانات كوكاكولا اسمه علي علي وهو كرياتف ةايركتو في شركه اسمها برومو سفن

    والاعلان رائع جدا

    واعلانات مولتو باوند كيك

    ممكن كمان نضيف عليهم اعلانات بوريتو مؤمن

    الاعلانات دي بتعتمد علي الفكره و اسلوب جديد

    ممكن ما يكونش متوافق مع بعض الاذواق

    لكن اعتقد انه الاجدار تتكلمي عن اعلانات بيريل

    لاني من وجهه نظري بتهدم قيم

    ردحذف
  4. الى مصمم الاعلانات طبعا الناس أذواق وأنا شخصيا لا أرى أى كريتفيتى فى الاعلان وممكن لو حضرتك عارف على ممكن تنقل له وجهة نظرى وده مش عيب انه يعرف أن فبه ناس مش بتحب أعلاناته وأما القيم فأيضا ليس من القيم أنك تبقى خاطب فلانة ومصاحب فلانة تانية زى ما أعلان الاستاذ على يروج له ده برضة هدم لقيم الاخلاق مش كده ولا ايه؟؟؟؟

    ردحذف
  5. ده كان إعلان بجد؟ هو دة الإبداع المصري! علشان نبقى احنا اللي اخترعنا إعلانات الرعب

    ردحذف
  6. غير معرف17/5/09 3:04 ص

    ازيك يا مني
    هي وجهات نظر من ناحيه الابداع هنا او لاء

    بس التقييم على الفكره ليه شويه معايير

    مش مهم ذكرها

    بس في زي مدارس في الاعلان

    احنا دلوقتى في مرحله اسمها ما بعد الحداثه

    ودي بتعتمد على الفكره

    وهتلاقي ان الافكار اصبحت محوره اكتر

    من ناحيه الاعلان بيهدم القيم

    انا متفق معاكي تماما

    لان انا اصلا برفض استخدام بنات فى الشغل بتاعى :)

    فا ما بالك لما يكون الموضوع علاقات و حركات

    بس انا لسه مصمم ان كان الاولي تتكلمي على اعلانات بيريل

    لان الى يغيظ اني سمعت انها اخدت جوائز

    ردحذف
  7. لك حق تتغاظ - بس أنا فى "فضفاضة" أتكلمت عن بيريل وكمان عن أعلانات أخرى فى "وجع مصرى" و"تهييس" وعلشان خاطر الجائزة حأفكرلهم فى حاجة قريب ده لو ماكانتش التماسيح طلعت عليهم D:

    ردحذف
  8. غير معرف18/5/09 1:26 ص

    بالتوفيق يا مني

    ردحذف
  9. للأسف دى نسخة من الصورة اللى بنشوفها فى كل مكان دلوقت فى الشارع ووسايل الاعلام والمواصلات و و و و حتى تصريحات المسئولين وعناوين الصحافة الذوق الفاسد انتشر فى كل شئ ربنا يسترها على كل واحد عند حساسية للحاجات دى لأنه لو كتم فى قلبه هينفجر وشكرا

    ردحذف
  10. سلام عليكم انا من الشركة الى عملت اعلان مولتو ده و انا رأيى ان الاعلان جامد جدا و ليه جزء تانى و فى ممكن ثالث و اسم الشركة ليوبرنيت .

    ردحذف
  11. انت ليه لحد دلوقتى ما كتبتيش حاجه جديده يا مني

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))