الثلاثاء، يناير 11، 2011

مهرجان بلدهم " للبصل"

اليوم وصلنى إيميل من صديقة لى تعيش فى السعودية يحتوى على العديد من الصور الطريفة لثمرة البصل ، والإيميل لا يحتوى على أى معلومة حتى فى عنوانه وفى أخر صورة وجدت كلمة "مهرجان البصل فى سويسرا"!!!!

قلت أطلع برة المود وأفصل دماغى شوية من الشحن وأدور على إيه مهرجان البصل ده؟؟؟ طبعا لم أجد غير نفس الصور (أقل أو أكثر أو مختلفة) ومافيش معلومة غير نفس الكلمة "مهرجان البصل فى سويسرا" - وكل واحدة حاطها فى المنتدى كاتبة شوفوا ياحلوين جبتلكم إيه - على أعتبار أن الحلوين مش مهم غير أنهم يشوفوا الصور!!!

المهم دعبست كده شوية لقيت كم معلومة بالأنجليزى ترجمتها وقلت أحط الصور أصلها بصراحة جميلة وكمان أول مرة أسمع حكاية مهرجان البصل ديه - يعنى الواحد طول ما هو لسة عايش بيتعلم مهما كبر سنه.

والمعلومة تقول :
يقام مهرجان البصل فى سويسرا كل سنة  في اليوم الرابع من شهر نوفمبر في المنطقة القديمة في سويسرا - برن، حيث يجتمع المزارعون لبيع ما يزيد على 100 طن من البصل. ويبدأ المهرجان، الساعة الرابعة فجرا بتقديم شوربة البصل للمشاركين فيه، وعلى أنغام الموسيقى يحتفل المشاركون بهذه المناسبة، ويتم عرض مجموعات مميزة ومنسقة بعناية من البصل، والتعرف على الأنواع المختلفة منه والتنافس في تجميل ثمار البصل كما يتم عرض غيرها من الفواكه والخضر والمكسرات، ويقوم أيضا بائعى الشوارع وتجار السلع المستعملة بعرض بضاعتهم التقليدية أثناء المهرجان مما يضفى على السوق حيوية شديدة.  ويقوم الناس بألقاء الأوراق الملونة بعضهم على بعض أثناء المهرجان كما تقام حفلات شعر ساخر على الأحداث التى جرت فى العام الماضى فى الكافيهات كما تنشر أيضا الصحف الساخرة فى هذا اليوم.
ويعد هذا المهرجان واحد من المهرجانات الشعبية المحلية ويعد من عوامل الجذب السياحي للسائح أثناء جولاته فى سويسرا. (البصل عامل جذب وتحتها 100 خط آلهى يسعدكوا).

والصور التالية هى بعض ما وصلنى على الأيميل ياحلوين :)


















الا هو إحنا عندنا هنا فى بلدنا مهرجانات؟؟؟ أكييييييييييييييييد هو فيه أحلى من كده مهرجانات!!!!!!!!!

هناك 10 تعليقات:

  1. منى العزيزة الغالية
    بصلة المحب خروف
    والله المناظر آخر روعة حببتينى فى البصل حاجيبه من السوق أخضر كمان ( موش موجود بمناظر البوست) وعندى من إمبارح عدس معمول من إيد زوجتى العزيزة مالوش حل حاتبقى ليلة خل ريحتها بصل ونزود عليها التوم.
    كنت عارف مهرجان الطماطم وشوفته بالتليفزيون لكن دى أول مرة أعرف مهرجان البصل
    تيجى نعمل مهرجان التوم ( 12 جنيه الكيلوا والبصل بجنيه ونص ) وتبقى حتى حاجة جديدة ونخرج بقى من مود الحزن ده ونرجع نشحن تانى
    شكرا لكى يامنى ضحكتينى وريحتينى بتعليقك عندى ( منى الغرباوى غير معرف )

    ردحذف
  2. السلام عليكم و رحمة الله و بركاته

    عجبت لأهل مصر يمرضون ؟ .. و لديهم البصل و الليمون
    ....
    بس مين يفهم؟

    صور متميزة و مهرجان جميل .. بس مين بيعرف يقرأ ما بين السطور؟

    ردحذف
  3. يا مهرجناتك يابصل

    وللبصل الاف الفوائد

    ههههههههههههههه

    تحياتى

    ردحذف
  4. يعنى بيشبهنى بمهرجان شم النسيم يعنى نقدر نقول عيد شم البصل

    ردحذف
  5. كويس ان ادخل مدونة وألاقي فيه شئ مختلف تماماً عما تتناولة بقية المدونات ..وطبعا مافيش شئ مختلف اكتر من البصل..والعيد بتاعه والمعلومة دي انا اول مرة اسمعها في حياتي الصراحة وفي في سويسرا غريبة دي
    انا سمعت عن عيد الطماطم مثلا في اسبانيا على ما اعتقد
    لكن البصل..حاجه غريبة وطريفه فعلا
    الصور بجد هايله ..ده بصل يجو يشوفو إخواته عندنا هنا متعلقين على الحيطان والبلكونات ومتربين وحالتهم حاله
    احنا اخرنا نخرطه
    هما هناك بيعتبروه جذب سياحي
    شفتي اهي السياسة دخلت تاني اهوه هانعمل ايه
    حسبي الله و نعم الوكيل

    ردحذف
  6. غير معرف13/1/11 11:27 م

    السلام عليكم و رحمة الله.

    من باب الرأي و الرأي الأخر, موضوع طريف و لكن الا تعتقدون معي انه من الخواء الفكري التعليق عليه و بذل الغالي و الرخيص للدفاع عن عيد البصل و الثوم و الطماطم.

    أن شاء الله نمرة 3 يكسب

    ردحذف
  7. وااو على الجمال

    صور جميلة اوى يا منى

    حقيقى شعوب جميلة وفنانة


    شكرا ليكى انك بتاخدينا من الجو الكثئيب اللى حوالينا لاماكن تانية وافكار تانية

    ردحذف
  8. إلى غير المعروف:
    1- من الأفضل أن تكتب اسمك فحرية الرأى لا تعنى الأختفاء وراء غير المعرف

    2- ليس لك الحق فى مخاطبة من يعلقون عندى

    3- وإن كان من الخواء الفكرى فلم اضعت الوقت فى القراءة والتعليق - أن الموضوع من باب الطرافة ولا يحتاج لكل هذا الأنفعال والتهكم غير المبرر

    ردحذف
  9. العزيزة منى:

    اعتذر عن تعليقي السابق و عذري اني لم اقصد اهانتك او اهانة احد من المعلقين..

    مصطفى علي

    ردحذف
  10. حلوة جدا جدا حكاية مهرجان البصل دي :)
    و الله حاجة لذيذة اوي ..
    احنا كمان عندنا مهرجانات .. !!
    الانتخابات مهرجانات .. كله مهرجانات .

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))