الاثنين، نوفمبر 22، 2010

بوجور فتاوى



مضطرة أكتب الكلام ده باللغة العامية علشان أنا مزبهلة ومشرأبة، السنة إلى فاتت طلعت جماعة إسلامية فى الصومال وكانت تجلد كل سيدة ترتدى مشد الصدر بزعم أن ذلك يخالف الأسلام لأنطوائه على الغش و التدليس، وفضلت أسأل نفسى وهم القائمين على نشر الفضيلة فى البلد بيعرفوا منين أن الست لابسة مشد من عدمه الا لو القائم أتدبت فى عينيه رصاصة وكان بيبص على صدرها علشان يعرف، وده طبعا من سمات الشرف والحفاظ على عفة المواطنات –
لبس المشد تدليس ويخالف الشريعة الأسلامية لكن النظر إلى صدور النساء لا يخالفها البتة وكان هذا خبر من سلسلة لا تنتهى من فتاوى خاصة بأمتهان المرأة بزعم المحافظة على الشريعة الأسلامية من أمثال هؤلاء النساء المدلسات.

المهم من كام يوم ولأن الشقيقة السعودية لا هم لها فى هذه الدنيا غير أحوال النساء وتجد معظم القائمين على الشئون الدينية فى البلد يكرسون الشريعة الأسلامية فقط لأجل النساء ولاشىء غير النساء، فتجد سيل الفتاوى لا ينقطع من عندهم بشأن النساء فينامون ويحلمون ويقومون بنشر ما يحلمون به فى اليوم التالى، وكأن الدنيا أنتهت من كل الأمور الا أمور النساء لأن الرجال عندهم بالطبع منزهين عن الخطأ.

مع أنه ويالعجب العجاب مافيش مثلا فتوى بتطلع من بلدهم ولا بلدنا تقول ياجماعة الخير زواج رجالكم من القاصرات المصريات لايجوز؟؟؟ 

 وبعد أن قرروا أن عمل المرأة كاكشير حرام (وده طبعا حنستورده عندنا من عندهم فى القريب رغم أنهم برضة ستاتهم محتاجة شغل) فقد أصدروا قرر يعطى هيئة النهى عن المنكر والأمر بالمعروف الحق فى مطالبة المرأة المنتقبة بتغطية عينيها يعنى إيه؟؟ أقولك أنا يعنى إيه يعنى الست تبقى ماشية منتقبة وعينيها باينة وده الطبيعى، لا دلوقتى الى حيحصل أنه الست تبقى ماشية ولو عينيها فاتنة يبقى القائم من هيئة النهى عن المنكر والأمر بالمعروف حيقول لها غطى عينيك ياشابة علشان عينيكى فيهما فتنة، وطبعا هو مش حيقول لها الكلام ده بالمعروف مع أن الكلام متلوف أصلا، بالذمة يا ناس فيه بنى أدم عاقل يعقل هذا الكلام؟؟

يعنى دلوقت الحق يعتمد على مدى الإثارة، ومدى الإثارة يعتمد على درجة فتنة عينى المرأة بنظر الرائى الى هو عضو الهيئة
يعنى بالبلدى القائم حتدب فى عينيه رصاصة وحيبص على عينين الست الأول ويشوف ويقرر بقى تغطيهم بعد ما يشوف سحر العيون من عدمهم.

ببساطة كده أن من حق رجال الهيئة تغطية عيون النساء إن كانت مثيرة للفتنة ده حسب إرشادات وفتاوى منطقة الحائل بالسعودية.

ياناس يالى بتفهموا فى الدين الأسلامى هل ده من الدين يعنى النظر لعيون النساء دلوقت لا يخالف الشريعة الأسلامية؟؟
وحد حيقول لى هذا شأنهم وسلو بلدهم لكن حين يكون هذا السلو تحت ستار الدين الأسلامى فهو ليس سلو بل سنقوم بأستيراد هذا السلو بالطائرة النفاثة لنقمع بها النساء عندنا هنا وفى بقية الدول الأسلامية لأن الأخت الشقيقة قدوة.

فمتى نكف عن هذا الهطل والعبث الذى لا يتنهى فبدلا من النظر إلى نهود وعيون النساء تحت ستار الحفاظ على الفضيلة والشرف. فالنبحث عن طريقة نحافظ بها على أصالتنا من التردى وعقولنا من الأسفاف وأرواحنا من التملق والزيف وقلوبنا من العنف والقهر.

ولن أحول كلاماتى إلى شعارات لنصرة المرأة أو غيرها من العبارات الرنانة ولكنى فقط أتمنى أن نصحو من غفوتنا وكبوتنا (المنيلة بستين النيلة) قبل فوات الأوان.

ونعرف ونمارس الدين كما شرعه الله لا كما نشرعه نحن ونفصله على حسب مزاجنا الخاص جدا. 
( مَا يَلْفِظُ مِن قَوْلٍ إِلا لَدَيْهِ رَقِيبٌ عَتِيدٌ )
 قلمى

هناك 13 تعليقًا:

  1. طبعا مش هقدر اتكلم من الناحية الدينية

    لكن هتكلم عامة


    لو الست لبست شوال من فوق لتحت ومش باين منها ولا اى شىء والرجل لسه زى ما هو له فكر شهوانى هيبقى لا عملنا اى شىء


    الحل فى العقل وسيطرة التفكير الارادة على الانسان

    ردحذف
  2. عادي على فكرة !!
    احنا مجتمعنا قاصر .. و مقهور ..
    و معندهوش مخ .. طبيعي انه يستورد اي حاجة .. !

    ردحذف
  3. السعودية شوهت الاسلام و اساءت له اكبر اساءه و لو عدتى للتاريخ ح تلاقى ان الاسلام كان فخر لغاية ما السعودية ربنا كرمها بالبترول و نشرت فكرها الوهابى القائم على الهاجس الجنسى و من ساعتها و المسلمين بقوا زى ما انتى شايفاهم و كل يوم فى النازل

    عجبتنى اوى الجملة دى

    الشقيقة السعودية لا هم لها فى هذه الدنيا غير أحوال النساء وتجد معظم القائمين على الشئون الدينية فى البلد يكرسون الشريعة الأسلامية فقط لأجل النساء ولاشىء غير النساء

    ردحذف
  4. عالم فاضيه ..وادي الملك بتاعهم رايح أمريكا يتعالج .دي دي نقرة ودي نقرة والا إيه؟

    ردحذف
  5. انتى عندك حق

    و كلامك أقرب من الناحية الدينية و المنطقية للصواب

    لكن .. تعالى شوفى لو كلامك ده إنتشر و أصبح له مردود هتلاقى رد الفعل الأخر الجاهز بأنه لا يخصك التدخل فى الشأن السعودى .. و إنك إيه فهمك فى الدين و إنك و إنك ..

    كل اللى أقدر أقوله .. الله المستعان

    تحياتى

    ردحذف
  6. لكى كل الحق لما قولتى بدلا من أن نهتم بنهود النساء وعيونهن فمن الأفضل أن نحافظ على أصالتنا من التردى والاسفاف، فربنايديهم على أد نفوسهم المريضة والتى تسببت لنا بأضرار كبيرة سواء كانت معنوياأو فكريا

    ردحذف
  7. بصي يا حبيبتي انا هتكلم معاكي بصراحه

    طبعا عندك حق في انهم بيناموا ويحلموا بفتاوى النساء زي ما انتي قلتي

    لكن بالنسبه لتغطية المراه لعينيها

    فوالله يا منى انا بشوف سيدات لابسين النقاب وعيونهم غايه في الجمال

    انا عن نفسي بفضل ابص لعينهم من جمالها فما بالك بالرجال

    انا مش شايفه حاجه في الفتوى دي حتى لو طلعت من ناس فاضيه مورهاش اي حاجه


    لكن ان واحده تنتقب وتخلي عيونها الجميله ظاهره للرجال انا مش مع ده

    ده رأيي ووجهة نظري

    ردحذف
  8. بصراحه مش فاهمه يعني ايه نخلي رجل تاني هو اللي يبص ويقرر

    وبعدين هو لما الواحده تلاقي ان في شئ عندها ممكن يفتن الرجال بيها وتغطيه بتبقى كده دخلت عصر الجواري

    اختلف معاكي

    الجوهره الثمينه بنحافظ عليها وبنحب ان مفيش حد يلمسها او حتى يبصلها

    منتظره ردك هنا يا حبيبتي

    ردحذف
  9. يادكتورة المقصود من وراء الكلام انه الى حيأمر الست أنها تغطى عينيها هو رجل غريب من هيئة الأمر بالمعروف والنهى عن المنكر يعنى الأول حيشوف عينيها الى مش متغطية مثيرة ولا لا وبعدين يقول لها غطى عينيك أظن الكلام واضح لان فى الأساس النقاب من غير ما نغطى العينين يعنى هى نازلة منتقبة عادى وممكن تكون عينيها مش مثيرة أصلا أو حلوة والى حيقرر ده حسب مزاج الرائى من رجال الهيئة وأفتكر ده ينفى كونها جوهرة ثمينة ده يؤكد أنها مجرد جارية فى عصر رجال لا يحترمون النساء وأظن الكلام واضح ومش محتاج تفسير أكتر من كده - تحياتى

    ردحذف
  10. اوك يا منى بس بالراحه ليه حاسه بعصبيه في كلامك

    الاختلاف في الرأي لا يفسد للود قضيه

    على العموم رأيك احترمه ولكل منا وجهة نظر تحترم

    ردحذف
  11. العصبية مش موجهة لك على الأطلاق العصبية على حالنا إلى يغم وعلى الطريقة التى تعامل بها النساء تحت ستار دينى مزيف وده موضوع يطول شرحه وبالطبع الأختلاف لا يفسد للود قضية وأنا لم أختلف معاك أنا أحترمت وجهة نظرك أنا فقط وضحت المقصود مش أكتر

    ردحذف
  12. منى......
    الموضوع ده عندهم فيه عقدة لأنى كان ليا موقف معاهم وأنا بالحج وكانت زوجتى معى وكنت حاجا أنا وهى وطبعا كانت محجبة وفى صحن الكعبة قريب جدا من الحرم كان يجلس شيخا كبيرا على كرسى بفرشه( كنبه) يفتى للحجاج والناس ولما إقتربت من أسأله عن منسك من مناسك الحج
    فإذا به قبل أن أتكلم ينظر إلى زوجتى ويقول لها غطى وجهك ياأمرأة أو إبعدى عنى فقلت له : أنت لاتفقه فى الدين إزاى بتفتى للناس وإنت موش عارف إن حج المرأة فى وجهها ويديها ( يعنى تظهرهما ) كما قال الرسول صلى الله عليه وسلم فسألته هل هذا الحديث صحيح أم لا فرد صحيح قلت له: إذن سأذهب لآنك لاتصلح للفتوى.
    موضوع آخر حدث لى كنت فى محطة أتوبيس البطحاء بالرياض بالسعودية وكان معى إبن أختى علاء ذاهبا إلى سكنه بمدينة المجمعة على بعد 200 كيلومتر من الرياض العاصمة مقرعملى ومنزلى وأذن المغرب فذهبت أنا وهو للمسجد فوجدنا الناس تقول لايوجد ماء بالمسجد فقال لى علاء هناك فى الدور الثانى من هذا المجمع التجارى وأشار إليه مسجد (زاوية صغيرة) وبه دورة مياة ملحقة فذهبنا ومررنا على سيارة الأمر بالمعروف والنهى عن المنكر بها شيخان وعسكرى مسلح وفوجئت بأحد الشيخين يقول لى إنت رايح فين روح صلى بالمسجد وإلا حنحبسك فرديت عليه بعنف وقلت له : أنا بصلى قبل ماتتولد وموش محتاج منك تعلمنى بدل ماإنت قاعد كده تحرس الناس روح جيبلهم ميه للمسجد لأنه مافيهوش ميه أو روح صلى ياشيخ أنا رايح أصلى بالدور التانى لأنه فيه ميه تعالى معايا إا كنت عايز تصلى فرد الشيخ الآخر إيه ياشيخ عصبى ليه كده هوه عايز مصلحتك قلت له: لما يعرف مصلحة الناس اللى واقف يساعدهم موش يتأمر عليهم بدون داعى وتركته وعلاء بن أختى يتعجب من جرأتى لأنه يعمل معاهم وعارف إنهم ممكن يحبسونا بدون أى كلمة واحده وإنتهى الموضوع ولاتعليق عندى

    ردحذف
  13. الأستاذ فاروق : بصراحة يارب يخلوا عقدهم لنفسهم وبس علشان كفاية أرف

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))