الجمعة، أغسطس 21، 2009

المسامح كريم

أصدقاء وصديقات مدونتى وحشتنى كتابتكم أول حاجة عملتها النهارده أنى دخلت على مدوناتكم وقريت كل المواضيع الحلوة الى فاتتنى ولحقت أبعت رسائل لبعض الصديقات قبل أعتكافهن فى رمضان - كل سنة وأنتم طيبين جميعا وان شاءالله يتقبل الله صيامكم بأذن الله -

وحشتنى الكتابة جدا وعندى مواضيع كتيرة عايزة أكتبها بس الالهام طار منى أو لسة مش مجمعة أوى أصل النهاردة ونحن فى طريق العودة الى القاهرة بعد قضاء أيام فى الهدوء فى رأس البر - تعرضنا لحادث سيارة والحمدلله الحمدلله ربنا سلم ولم يتأذى أحد وذلك على طريق مصر الاسماعيلية حيث فوجئنا بسيارة ميكروباص تتجه نحونا بعرض الشارع ولم يستطيع أبنى أن يتفاداها فلو توقف لاصدمت بنا سيارة من الخلف ولو أنحرفنا شمال لارتطمنا بالرصيف - وكنت فى المقعد الخلفى اقرأ ولم أرى الميكروباص الا حين صدمنا وصوت الصدمة كان قوى بدرجة أننى ظننت أننا حتما سننقلب بالسيارة على الفور وحين خرج ابنى ليشتبك مع سائق الميكروباص قلت له الحمدلله أحنا كويسين وقد وجد أبنى سائق الميكروباص يرتعد خوفا فامتنع عن الاشتباك معه وأتضح أنه ترك السيارة للحظة ولم يثبت الفرامل فسارت السيارة فجأة بعرض الشارع لحظة مرورنا لانه الحمدلله قدرنا -
ووقف زوجى يخبر سائق الميكروباص أن ينظر الى السيارة وما أحدثه فيها من تلفيات والرجل لا ينطق بشىء سوى معلش حقكوا على ورغم أنفعال أبنى وزوجى الشديد الا أننا جميعا ومعنا أبنى الاصغر نظرنا الى الرجل فى نفس اللحظة وقلنا له توكل على الله وأبقى خالى بالك - فلن يفيدناالتهليل فى شىء ولا أن نأخذ الرجل للقسم لعمل محضر وبهدلته وقطع عيشه فى الايام المفترجة وبأى حال من الاحوال لن نقبل أى عوض - فما حدث قد حدث ولن يغيره شىء- الغريب أنه بعد أن رحل السائق وقفنا نقول لبعض أننا كلنا كنا حاسين أنه حيحصل حاجة لنا فى الطريق مع أن محدش فينا قال للتانى الاحساس ده غير بعد الحادثة!!
السيارة جديدة أمتلكناها من 3 أشهر فقط بعد سنوات وسنوات من المعاناة من عمر ابنى الاكبر (20 سنة) امتلكنا سيارة للمرة الاولى فى حياتناالزوجية ولا أنسى فرحة الاولاد حين أخبرناهما أننا نعد لهما مفاجأة!!! قدر الله وماشاء فعل وأيه يعنى أنها أتخبطيت وأيه يعنى أنها حتحتاج فلوس أد كده للتصليح المهم والاهم سيظل دائما هو الحمدلله والشكر له للنجاة من موت محقق أو من لا قدر الله حادثة تشوهنا أو تصيبنا بعاهة والحمدلله أننا نملك كأسرة فضيلة العفو عند المقدرة وأن ربنا رزقنى بعيال جدعان ربنا يحفظهم يارب ويطرح فيهم البركة -
وصحيح المسامح كريم (اسم على مسمى - أسم أبنى الكبير)
"قلمى"

هناك 10 تعليقات:

  1. الحمد لله

    حمد الله على السلامة وقدر الله وما شاء فعل

    وكل سنة وانتى واسرتك الكريمة بخير ورمضان كريم

    تحياتى

    ردحذف
  2. اولا: حمدا لله على سلامتكم من السفر
    وثانيا: قدر الله وماشاء فعل وزى ما حضرتك قولتى ربنا ستر والحمد لله انكم بخير وده قضاء ربنا
    ثالثا : ربنا يفديكى بالعربية حاجة وحشة كانت ممكن تحصل


    كل عام وحضرتك بخير واتم صحة وعافية والاسرة الكريمة بخير

    ردحذف
  3. الحمد لله
    على سلامه الوصول يا منى
    ده ابتلاء من ربنا والحمد لله انكم صابرين وبان معدنكم الطيب فوقت زى ده
    فدخله الشهر الكريم
    والعفو فعلا مطلوب والعوض عند ربنا
    بالرغم انى عارف ان العربيه صينى
    وفالخبطات دى مش بتسد بس ربنا يعينكم على التكاليف بقى

    ردحذف
  4. يسعد صباحك
    الف حمد الله على السلامة
    و يا رب تكون الاسرة الكريمة كلها سليمة و بخير
    رمضان كريم

    ردحذف
  5. كل سنة وانتى طيبة انتى واسرتك


    وحمد الله على سلامتك

    والحمد لله ان محصلتش حاجة فيكم لكن السيارة او اى شىء اخر ممكن يتعوض

    والحمد لله على كل حال


    دمتى بكل خير

    ردحذف
  6. سماء\حازم\شريف\محمود\آسافو أشكركم على مشاعركم الجميلة وربنا يديم المعروف دائما بينا

    ردحذف
  7. الف حمدالله على سلامتكم جميعا




    تحياتى اللاسعه

    ردحذف
  8. منمن الطيبة الف حمدا لله على السلامة ويارب يخلى اولادك وزوجك ويبعد عنكم اى شر يارب
    العفو عند المقدرة ياااه على الجمال صدقت يا رسول الله(الخير فى وفى امتى الى يوم الدين) والله دعوة الراجل السواق ليكم بانكم مبهدلتهوش فى الايام المفترجة دى اكيد هتفضل لكم باذن الله وربنا يقدركم باذن الله على التصليحات بتاعتها يارب
    مواه ليكى يا حبيبتى
    رمضان كريم وأكرم

    ردحذف
  9. ماما مازن : وحشتينى جدا جدا أشكرك على مشاعرك وقراءت كمان الى كتبتيه لى على الياهو ربنا يخليكى ويجعل كل أيامك وحياتك خير وبركة ويحفظ لك عيلتك قبلاتى لمازن ومريومة موااااااه

    ردحذف
  10. الحمد لله على سلامتكم
    آسفة اتأخرت في ردي بس والله مكنتش أعرف.بس الحمد لله كلكم بخير و مفيش أى حاجة غير العربية و ربنا يقدركم على التصليح و ترجعوها جديدة.

    أنا بس زعلت على الخضة اللي انتي خدتيها.بس الحمد لله بجد وسلامي ليكم كلكم.

    ردحذف

(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))