عارف

برغم خوفى وابتعادى
بدور عليك

بدور عليك فى كل فرحة أفرحها وأنت مش معايا

بدور عليك فى كل دمعة تنزل وانت مش جانبى

كل مرة أقول حاجى والنهاردة حأقولك

بس كنت بستنى وصبرى مصاحبنى

لانى كنت بقول لا لسة ماأنش الاوان

عارف

أنا صوتى مش متحاش

أنا صوتى جوة الضلوع محبوس

خايف يصرخ ويبوح

نفسى أقولها وأعيشها وأرسمها

بس أنت كمان تقولها

حاول مرة بس مرة وعايشينى فيها

عارف

لسة فجرى مهزوم

وقلبى زى ما أنت بتقول مقسوم

خايف يقرب ويهديك حنان

وخايف يبعد ويموت جوايا من غيرك الامان

زمنى مش زمن الرفض ولكنه برضة لا لسة ما أنش الاوان

ويمكن ميكونش فيه أوان

أنا موجى مش عالى ولا مراكبك ممكن تتوه فيا

أنا بنت أقل من عادية

أنا نخلة انت بايدك زرعتها طرح بلحى والريح بتمرجحه

بيناديك تعالى خد منى حباب النينى بس أوعى تروح منى وتضيعه

عارف

أنا مجرد طفلة تايهة ومنسية

متسنية الى يعدينى ويخد بأيدايا

يمسك كفى ويحضن بالوناتى

ويخطفلى نجمة من السما مضوية

انا زيك عصفورة شريدة

عشى هو خطواتك وحنان عينيك ليا

عارف

لو كنت أقدر أقول

كنت مش بس قلت لا ده أنا كنت حكيت

وكمان على الربابة غنيت

أنا لا عمرى رفضت

ولا على بعدك قدرت

انا ألف مرة بحبك وحبيت

بس أنت لا عمرك قلت ولا حتى على بابى جيت وخبطت

قلمى

ملحوظة: البوست ده كان تعليق منى على بوست (عارفة) المنشور فى مدونة أخر يوم فى الجنة بعد ما كتبته عجبنى وقلت أحطه عندى
http://mahmoudelshiekh.blogspot.com/2009/10/blog-post_15.html