النظافة من الايمان

" النظافة من الايمان" ياترى ما معنى هذه العبارة المكتوبة فى كل شوارع مصر المحروسة وضواحيها والتى أعتقد أنها من التراث أو الفولكولور المصرى لاننى على ما أذكر لم أراها فى أى بلد قمت بالسفر له (بعض الناس تظن أنه حديث عن الرسول عليه الصلاة والسلام - وهو ظن غير صحيح)

هل العبارة تعنى أننا نغسل ايدينا وأسناننا وبالتبعية وجوهنا قبل الذهاب الى العمل صباحا ؟ أو تعنى أننا نغسل رجلينا قبل ما ننام؟ أو أن الرجالة تحط مزيل العرق AXE والستات تحط REXONA بتوع الاعلانات ؟ أكيد واضعوا اللافتة لا يقصدوا النظافة الشخصية ولو أنهم لو تنشقوا رائحة العرق فى الاوتوبيسات والميكروباصات والتوك توك حيخترعوا لافتة أخرى وبتوع أعلانات مزيل العرق حيدركوا أنهم لو أدنوا فى مالطة AXE و REXONA ايه هى الناس لاقية تأكل !!المهم (نقصر)

ياترى لما شلة ستات حلوة كده قاعدين فى العربية واحدة بتسوق العربية وواحدة جنبها و3 منورين فى الكنبة وتبص تلاقيهم هووووووووووب راميين شوية قشر لب من شباك العربية بعد ما أزأأأزووووووووووه!!! ده يبقى أسمه أيه وأنا جبت المثل لناس راكبة عربية يعنى ممكن أوى يبقى فيه كيس فى العربية نرمى فيه قشر اللب لان القزقزة لا تحلى غير وأحنا راكبين العربية وبعد كده ممكن أى واحدة منهم ترميه فى أى صفيحة زبالة !!

كم واحد بيقف عند بتاع الفول يأخد السندويتش التمام وبعد ما يأكل ويحبس بالشاى بتاع الست أم دجدج تلوث الى بتعمل الشاى قاعدة جنب بتاع الفول ويتكرع التكريعة الطرازنية يكور ورقة الجرنال أو الكراسة أو الكتاب المدرسى وممكن تلاقيها ورقة امتحانات الى ملفوف فيها السنكاوتش أو الطعميية ويرميها فى الشارع هى وكيس الطرشى– عادى يعنى وأيه المشكلة مع أنه لو مشى شوية – حيلاقى صندوق زبالة أو أى حتة لالقاء القمامة

كم واحد من الشباب الحلوة الى بتشرب كانز الاول يرمى الحتة الصفيح (الى بتتطرقع وممكن تتخض لما تفتح الكانزية أى علب البيبسى الصفيح) فى أى حتة وبعدين بعد ما يشرب يقوم مطبقها ياسلام كأنه هرقل وجاب التايهة وبعدين هووووووووووووب برضة شوطة عالية ولا أبو تريكة والكانز تطير فى اى حتة وممكن تلبس فى دماغ أى حد عادى يعنى المهم أن نقطة النهاية مش أنها تكون فى الجون لا فى شارع أبونا –

وفى الصيف بقى ما أحلى الصيف العيال تنزل تشترى أيس كريم ولبان (مستيكة) وطبعا تلاقى الشارع مزين بشتى الاشكال ورقة الكونو وعصاية الستيك وكوباية الجلاس – واللبان بقى واحدة نطرقعها وننفخها ونعملها بالونة وبعدين بعد ما طعمها الحلو يروح نرميها علشان تلزق فى جزم الناس الى ماشية ويأكلوا واحدة تانية وماما وبابا تلاقيهم بيتفرجوا عليهم من البلكونة وعلى وجهم ابتسامة اضحك علشان الصورة تطلع حلوة وبابا بيشرب سيجارة ويرمى الطفية على غسيل الجيران والعقب فى الشارع بعد ما يخلص علشان ماما ميزانيتها لاتسمح بشراء طقطوقة بلاستيك لكن تسمح بالعكننة وأريفة الجيران والمزيد من اضفاء روح النظافة فى الشارع –

ولا بقى أجمل حاجة هى تنفيض السجاجيد الذى لا يحلى غير يوم الجمعة يوم الاجازة علشان الست تطفش جوزها من البيت السجادة تتنفض على السلم !!! يعنى ننظف سجاجدينا ونأرف غيرنا عادى أيه يعنى مش بيتنا وسلمنا نعمل الى أحنا عايزينه ياسلام أيه مانضفش ؟؟؟ أيه يعنى التراب يفضل على السلم بعد ما ننفض مش مهم نمسحه بعد ما نخلص الجيران لبعضها يبقوا هم ينضفوا ورانا لو حبين!!! (ده غير التراب الى بيدخل رئة كل واحد من الجيران – وغير صوت التنفيضة بقى ياعينى سيمفونية!!!) بس أصل الست نظيفة بتاعة القطنة مابتكدبش نسيت تقلنا كيفية تنظيف السجاجيد وأحنا قفلين علينا باب بيتنا؟؟؟

مش حأقدر أقولكم على كم الصراصير الصغننة الى بأشوفها فى العديد من الاماكن مش الاماكن الشعبية لا لا لا أنا شخصيا أمبارح كنت فى مكان فى الطل فى الهواء وبعدين الراجل أدانى الباقى بصيت لقيت صرصار صغنن على الباقى وماشى على أيدى طبعا مش حأقدر أقولكم حصلى أيه بس كان نفسى أعرف هو كان موجود فى أنه جيب من جيوب البائع اليمين ولا الشمال - طار من أنه داهية وحط على أيدى!!! أه يانى ياما؟؟

بس تصدقوا والله وأيمانات المسلمين وغير المسلمين النظافة من الايمان ؟؟؟؟!!!!!

"قلمى"