على السريع (3)

1- قررت تأليف أغنية أسمها "أمنا الغولة" وسوف أقوم بغنائها تحت أسمى الجديد "بستلة" هذا بمناسبة صدور أول أغنية رعب وهى العووووو وبمناسبة أن الى بيغنى فى الحمام أغانيه بتتعبى فى شرايط (أرجو الرجوع الى شريط أبو الليف الجديد: على فكرة المغنى أسمه كده والله العظيم)- ويا أهل المغنى دماغنا وجعنا دقيقة سكوت لله

2- وأنا فى التأمينات الاجتماعية (للمرة الالف ولسة مخدتش معاشى أدعولى بقالى سنة أى والله والختمة الشريفة) لقيت الموظف بيشخط وينطر:"أنا مش فاضى أنا مشغول" "بستلم البطاقات الجديدة"- سألت الى جنبى الا ياخويا بطاقات أيه ديه قال لى بطاقات الفيزا علشان نقبض المعاش ياحاجة (زغردت فى عبى على التكنولوجيا) قوم يكمل ويقول لى أنا استلمتها من 5 شهور وبأجى اقبض بها! وبيشرحلى وياريته ماشرح بدى الموظف الكارت يحطه فى الماكينة ويسحب كده ويكتب المبلغ ويديهولى – طب أيه؟؟ بجد أيه وألف أيه لزمتهم أيه بقى البطاقات لا بجد طب أيه؟؟؟؟؟؟؟

3- ياترى أيه أمكانية عمل كشف على القوى العقلية للناس الى بتفتى اليومين دول يعنى الى قال الكعبة تتهد وتتبنى بطريقة منعا لاختلاط النساء بالرجال أثناء الطواف ده شخص طبيعى؟؟ فى الكليات العسكرية فيه كشف هيئة قبل القبول وفى الهيئات (الخاصة طبعا) فيه كشف هيئة برضة أسمه أنترفيو قبل القبول فمافيهاش حاجة لما نعمل كشف قبول أسمه الكشف على القوى العقلية لامثال هؤلاء.

4- حأموت وأعرف برنامج التوك شو موسم (5) فى عين العدو واللهم لا حسد – ياترى وصل لسيزون (5) أزاى رغم كمية السماجة والبتاتة والتلامة الى فيه – أن دل على شىء فيدل على خفة دم المشاهدين!!!

5- لايزال كيلو السكر ب5 جنيه وأحنا قاعدين؟؟؟؟ وزعلانين أن اللحمة غليت عموما اللحمة طلع فيها دود زى المش فالافضل أكل المش أوفر وبعدين السكر مضر بالصحة حتى كله سوميات ومش ضرورى كيك وبسبوسة وكده لزوم الريجيم وكمان بلاش الشاى والقهوة لانها منبهات وأحنا لازم ننام ولا ننتبه علشان منفكرش لاننا لو فكرنا حنموت وده المطلوب!!!!

6- بنك مصر بجلالة قدره فى يوم أجازته طلع بيان أن رامى لكح لم يسدد مديونيته ياخسارة الزغاريد!!!!

7- بيقولك كلنا فى وطن واحد ويحيا الهلال مع الصليب وأوعى تقول أن فيه فتنة لأقطع لسانك من لغلوغه تيجى بقى تدخل على حبة منتديات على شوية مدونات وفوقهم سايتس تلاقي كلمة الكفار- الكفار- الكفار- هى ديه مصر القرن الواحد وعشرين ياعبلة!!!

8- على رأى الى قال "ناس لها بخت وناس لها ترتر" وكل واحد يضع العبارة ديه فى القالب الى يريحه القوالب كتيرة ومتوفرة بكل الاحجام

9- زوجة ساركوزى (رئيس فرنسا) ووالده لا يرغبان فى أن يرشح نفسه للرئاسة مرة ثانية ليستريح نانوس عين ماما ياناس تعب ياعينى من فترة رئاسة واحدة واحدة فقط والنبى شوية تعب فى قرطاس وأرميهم من الطائرة بطريقة الرش على الحكام العرب يا سيادة البريزيدون

10- سؤال يلح فى ذهنى من فترة الا هو أيه معنى الوطن؟؟؟

(قلمى)