ياميش إيه إلى أنت جاى تقول عليه؟؟؟ (تحديث)

كنت كاتبة المقال ده سنة 2011 النهارده حأعيد نشره مع عمل تعديلات بسيطة ... اللهم بلغنا رمضان...
 
تقريبا كل بلاد العالم خفضت من إستهلاكها بما فيهم الأمارات والسعودية لغلو الأسعار والأزمة الأقتصادية وكده يعنى إلا مين إلا المصريين فلا زالوا يستهلكون أضعاف مضاعفة رغم أننا نمر بظروف أصلا غير مستقرة ولإستهلاك "ولا أى أندهاش". 
ويومين كده وحتلاقى إيه حدوتة الياميش بتاعة كل سنة... والشكوى من أن السكر سعره أرتفع وياحبة عينى الستات حتقع فى حيص بيص هو إحنا حنعمل الحلويات إزاى....

 كأن بسم الله ماشاءالله مشاكلنا كلها خلصت وفاضل بس الياميش وقمر الدين علشان كله يبقى آلسطة – هو الصيام مش حينفع الا لو عملنا كل يوم خشاف وقمر الدين وياسلام بقى لما نعمل الحلو كنافة بالمكسرات ولا القطايف لزوم الحلو مع كوبية الشاى بالنعناع –

 

 ياناس ده فيه ناس مش لاقية تأكل ولا أنتوا مش عايشين فى البلد – ياميش إيه اللى لسه الناس حتموت عليه من سنين طويلة كده أيام القائد الزعيم عبد الناصر ماكنش فيه حاجة أسمها ياميش ولا الناس كانت تعرف المكسرات تتصوروا وكانوا عايشيين ورمضان ماشى آخر حلاوة كان فيها عصير المشمش بتاع قها وآجا وماكانش فيه لفة القمر الدين السورى والبسبوسة بتتعمل سادة والدنيا ماشية وماكنتش بتقف على الياميش وكان السكر تبع التموين والحر كانت الناس بتدوخ عليه لغاية لما تلاقيه فى الجمعيات التعاونية بالحظ وبالضرب. دلوقت فيه ناس لا تعرف حتى شكل المكسرات ولا عمرها سمعت عنها فى حياتها وبتدور على الأرز والعدس علشان تسد جوعها يعنى كمان مش بتدور على اللحمة أو الفراخ ولسة فيه ستات عايشة عصر ياى مش لاقيين ياميش ألطمى ياستيتة - حد فيكم عمره شاف ناس وهى بتدور على أكل من الزبالة أنا بقى شفت وبأشوفهم كل يوم والبركة فى النهضة اللى إحنا فيها كل يوم الناس ديه بتزيد. وتخيلوا فيه ناس كمان مش لاقية المياه النضيفة. وكما تلاقى كبار فى السن عايشين لوحدهم محدش داريان بهم لا بأكلهم ولا بشربهم.

المفروض رمضان ده شهر عبادة شهر الأحساس بحاجة الآخرين مش شهر اللغ والتزغيط السنة ديه أعتقد أنها فرصة مناسبة لتغيير سلوكيات العديد الأستهلاكية فى هذا الشهر يعنى مش ممكن نقضى رمضان فى عزايم مكلفة للغاية والناس الى بنعزمهم هم آهالينا وأصحابنا الى هم أصلا مش محتاجين يعنى لو فكرنا شوية حنلاقى أنه من الأفضل كسب ثواب إطعام الفقراء والمحتاجين والذين يستحقون أن نطعهم – صحيح رمضان يحب اللمة لكن لا يعنى التبذير يعنى اللمة ديه ممكن يتشارك فيها جميع المدعوين فلا تكون مكلفة على صاحب الدعوة ويمكن أن تكون على السحور بتكلفة أقل وممكن تكون بعد صلاة التروايح نتجمع على الشاى بالنعناع وحاجة حلوة بسيطة. مش معقول الست تقضى طول يوم رمضان جوة المطبخ علشان العزايم وحتى لو عندها من يخدمها فمن يخدمها أيضا صائم مع الأخذ فى الأعتبار الحر الشديد هذه الأيام وطبعاً ماننساش قطع الكهرباء وساعات كمان المياه بتتقطع علشان تكمل- على فكرة أنا بطلت أعزم حد فى رمضان عندى من 3 سنوات إلا أختى (مش حأعملها عزومة حتأكل الى بنأكله) ومش بكسف اقول أن العزايم ديه مكلفة (ماديا وصحيا) وأنا مقدرش عليها ومش بأروح لحد علشان مش بقدر أرد له عزومته بالنسبة لى رمضان شهر عبادة وهدوء ومش عزايم من طعام لا ينتهى.

فى يوم من أيام رمضان العام الماضى قامت قريبة لى بحساب ثمن الحاجات الحلوة التى أحضرها كل شخص وهو قادم لعزومة أفطار فقدرتها بحوالى 700 جنيه !!! أن مبلغ كهذا يمكن أن يطعم عشر أسر على الأقل. أن البعض لا يهتم بالصداقات ولا يعترف بها ويقول أن من واجب الحكومة أن تتكفل بالفقراء وليس المقتدر وأنه أما بنعمة ربك فحدث – الحكومة فى أى بلد وليس فى بلدنا فقط لن تقوى على عمل كل شىء للشعب وخاصة الفقراء - وما شاء الله الحكومة المبجلة بتاعة اليومين دول تجيب الفقر مش حتبعده - لذا جعل الله  مبدأ التكافل الأجتماعى والأنسانية فى القلوب وحثنا على الصداقات رغم أنها ليست فرض أيوه لكنها ترقق القلوب ويكفى أن ترى بسمة طفل فقير وفى يده طعام بعد أن يأس والده من البحث عن لقمة يطعهما له. ,ومع التذكرة أن الأصل فى رمضان أنه شهر الزهد ألف لام زين هاء دال - الزهد - وليس الفشخرة الكدابة والأكل بلا حساب والأهم الأحساس بحاجة الآخرين - ده فيه ناس بتطلع عيالها من المدرسة علشان تساعدها فى الشغل افتكر الناس لسة فاكرة حكاية الولد الى ابوه طلعه من المدرسة علشان يساعده فراح أشتغل عند نجار وهم بيشتغلوا فى طبلية وقع من البلكونة ومات وأمه ماتت بحسرتها أول مادفنته وأحنا لسة بندور على الياميش ونقول ياترى الكنافة أم كريمة ومانجة فى سيدرا حتبقى بكام السنة ديه فى رمضان؟؟؟؟

قلمى