أتدبست فى تاج :((((

كل ما أجى أكتب عن حاجة معينة تصادفنى حاجة تخدنى لسكة تانية غير الى أنا عايزة أكتب عنها.

كلمات من نور حدفتنى بتاج لا وإيه وكتبت أسمى منور عندها فى المدونة.

الأول كانت بتنوه وتقول التاج ده لواحدة هى عارفة نفسها يارب تجاوب وأنا أطنش المرة ديه قالت لك لا أحدفها به علشان هى عارفة أنى مش بحب أرد لها طلب بس يا(نو) صاضقينى صاضقينى (صا وض مقصودة) ديه أخر مرة بعد كده حأعمل نفسى ماشفتش الأسم خااااااااااااالص.

وهى ناصحة أوى جالها تاجين عملتهما فى تاج واحد كومبو السؤال الأول كان ليه أنا مدونة؟ والتاج التانى تكتب عن أى شىء بتحبه فقالت لك أضرب عصفورين بحجر جاوبت ليه أنا مدونة والشىء الى بتحبه هو التدوين لا نصاحة!!!!

 والأسئلة التدبيسية هى:

1- تعريف مختصر بالمدونة

أسمى زى ماهو مدون (منى) صحيح هو عادة البنات والسيدات مش بيحبوا يكتبوا الأسم الحقيقى أو كل واحدة بتحب تختار رمز معين بس أنا مش بحب غير التواصل بأسمى الحقيقى.

أنا عندى ولدين فى الجامعة كريم 21 وأكرم 20 سنة.

وواحدة من الأسئلة الى بتفقع مرارتى لما حد يسألنى عندك ولاد أد أيه فأقول ولدين يقوم الى يسألنى يقول لى معندكيش بنااااااات؟؟؟؟ أه والنعمة!!

أنا شخصية بسيطة مش بحب المشاكل ولا بحب التشاؤم أثور بسرعة جدا وأنفعل بشدة وده عيب من عيوبى الكثيرة بس بقدر الأمكان بأحاول أقلل من أنفعالاتى وكمان بروق بسرعة. 

أحب مساعدة الناس وتقديم أى مساعدة لو كان فى أمكانى تقديمها حتى ولو لم أكن أعرف الشخص الذى يحتاج المساعدة.

أعتبر نفسى مرحة (أتمنى أكون كذلك) وأحب الشيكولاتة جدااا.

وبصراحة أنا مش بعرف أتكلم عن نفسى خاااااااااااالص ماااااااااااااااالص بس ممكن أقول لكم حاجة لازم أقولها أنا بكره الشتااااااااااااااء جداااااااااا  وكمان بكره موضوع التيجين :))

2- مكانته العلمية والدراسية  التى وصل اليها والتى من خلالها يستطيع أن يقدم  خدماته للمجتمع

أنا خريجة أداب قسم اللغة الأنجليزية من جامعة القاهرة وفى بداية حياتى عملت كمدرسة لأنى كنت أحب هذا المجال جدا (بس مش فى مصر). ثم قررت تغير مجال عملى وأخذت عدة كورسات فى عدة مواضيع أتاحت لى فرص عمل فى مجالات أخرى. خدماتى للمجتمع أعتبرها من خلال عملى الجيد بصورة مشرفة وجيدة وأيضا تربيتى الجيدة لأولادى هى أفضل ما يمكن تقديمه.

3- متى كانت البداية فى التدوين (بالتاريخ )

14 أبريل 2009 فى المدونة العربية

19 يوليو 2009 فى المدونة الأنجليزية

4- كيف كانت البداية فى التدوين؟

 مرة قريت فى الجريدة: القبض على المدون فلان-  كان أول مرة أسمع فيها كلمة مدون سألت يعنى إيه مدون ديه قالوا لى دول ناس فاضية بتقعد تهاجم الحكومة على النت ماعلقتش وسكت ونسيت الموضوع. وبسبب الظروف الأقتصادية أضطرت الشركة التى أعمل بها لتقليل العمالة وكنت أنا من ضمن العمالة أياها. فقعدت فى البيت وقرأت كتاب أسمه أسكنرية\بيروت كانت الكاتبة بتقول فيه: أنها مكنتش تعرف يعنى أيه مدونة وسألت واحدة من صاحبتها فعملت لها مدونة وبعدين كتبت فيها وطبعوا لها الكتاب من المدونة- قلت الله يعنى التدوين مش هجوم على الحكومة وبس. فكلمت واحدة زميلة فى الشغل وسألتها أعمل مدونة أزاى قالت لى ده سهل أوى أدخلى على بلوجر وأنت حتعرفى. وفعلا ده الى حصل. دخلت على البلوجر وأخترت الأسم حتى من غير ماأفكر ونشرت قطعة نثرية قديمة وبعد كده أصبحت أحب مدونتى جدا لأنها براحى الخاص. 

5- ليه أنا مدونة ؟

أنا لا أعتبر نفسى مدونة لأن فيه ناس فطاحل فى التدوين ويكتبون أفضل منى مليون مرة أنا مجرد واحدة عادية بتحب الكتابة عن أفكارها فى حدود اللائق والمعقول مش أكتر. وأحب أن أكتب مايفيد الناس بقدر الأمكان أو التنبيه عن شىء معين أو المساعدة بشكل أو بأخر من خلال الكتابة وأيضا أضفاء بسمة على الشفاه أحيانا من خلال بعض الكتابات الساخرة.

6- وما هى طموحاتك فى هذا المجال؟

كذا حد قال لى أنشر الخواطر فى كتاب مع حكايات من دفتر التلوين بس أنا مش بشوف أن مواضيعى هايلة كده للنشر يعنى لاأظن أن الخواطر ستلاقى أى مجال فى النشر وبعدين فيه ناس متميزة فى هذا المجال مثل أحلام مستغانمى وشهرزاد وبالـتأكيد هن الأفضل. طموحى أن أحتفظ بالناس الجميلة التى تقرأ لى يعنى الحمدلله لم أفقد سوى نسبة قليلة من القراء منذ أن بدأت ويكفينى ولاء الناس التى تفتح النت وتيجى عندى تقرأ وبقالها معايا أكتر من سنة ده لوحده حلم لم أكن أتصوره- وأن أجد أكثر من 5 تعليقات عندى ده أنجاز ويكفينى. والأفضل من كل هذا هو تعرفى بشكل شخصى على العديد من هؤلاء الأصدقاء. وده شرف لى.

7- وماذا تسعى له بموقعك؟ إلى أى مدى تريد أن تصل فى التدوين ؟؟

أنا بحب مصر جدا ومش بحب التطاول عليها ولا الكلام عليها بشكل سلبى لأنها قيمة عظيمة ونفسى تبقى أحسن بلد فى الدنيا علشان كده بحب أكتب عن السلبيات فينا مش فى مصر كرمز والسلبيات التى أكتبها بكل أشكالها (بعيدة عن السياسة) مش تريقة منى أو سخرية لا بس لأنى عايزة الحاجات تتغير والناس تتغير وكل مرة بأكتب فيها بوست بيبقى نفسى حد يقراه ويحاول يغير ولو شىء بسيط. ودائما عندى تفاؤل أن بكرة أحلى من النهاردة.

8- إلى أي مدى أرغب في التدوين؟

كل ما ألاقى شىء مستفز لازم حأكتب

كل ما ألاقى خبر حلو لازم حأكتب

كل ما ألاقى معلومة أو نصيحة تفيد الكل لازم حأكتب

كل ما قلبى يوجعنى وأحزن لازم حأكتب

وكل ما أقرأ كتاب أو قصة لازم حأكتب وده بقى يوصلنا لسؤال التاج التانى وهو الكتابة عن شىء بتحبه وأنا أعشق القراءة والقراءة ثم القراءة وأعتقد أنه واضح ومش محتاج أكتب عنه لأنى كتبت عنه العديد من المرات وكمان أحب الموسيقى والسباحة ومشاهدة الأفلام الأجنبية.

وبجد أنا بكره مووووووووت موضوع التاج علشان كده مش حأبعته لحد وكل واحد براحته ولو أنى نفسى أدبس فيه ناس كتير زى ما أدبست بس يلا بقى كل واحد زى مايحب.

أتمنى أنى مكنش طولت عليكم ودمتم لى خير صحبة وعون وتشجيع.

قلمى