تحت نفس الشمس... فوق نفس التراب
كلنا بنجرى ورا نفس السراب
كلنا من أم واحده... أب واحد... دم واحد
بس حاسّين باغتراب
من حنان الحب هل الغلّ جانا
من مرارة الغلّ جلجل صوت رجانا
نبكى بالغلّ الّى بيعكر حياتنا
ولا بالحب اللى هدهدنا وشجانا
يازمان الغربه ليلك بيحاصرنا
وفـ ضلامه المرّ طاوينا وعاصرنا
بس طول مالحب بيرفرف علينا
الجدور هنمدها ونصنع مصيرنا
تحت نفس الشمس... فوق نفس التراب
كلنا بنجرى ورا نفس السراب
كلنا من أم واحده... أب واحد... دم واحد
بس حاسّين باغتراب
******
نفس الشموس بتبوس على روسنا
نفس التراب يحضن خطاوينا
طب ليه نلفّ ونهرى فى نفوسنا
وليه نعيش ناكل فى بعضينا
آدى الحقوق وآدى اللى طالبينها
والحق تاه فى الباطل البطّال
وقلوبنا تاهت عن محبينها
ونجومنا عاليه بعيده ما تنطال
نفس الشموس بتبوس على روسنا
نفس التراب يحضن خطاوينا
طب ليه نلفّ ونهرى فى نفوسنا
وليه نعيش ناكل فى بعضينا
ليست هناك تعليقات:
إرسال تعليق
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))